昨日十一係咩日子？國慶？對於筆者來講，只留意到一件事：Apple 推出全新 Mac OS X El Capitan 的日子！筆者第一時間幫自己部 MacBook Air（2013）、iMac 5K 同埋新 MacBook 升級。用咗半日，究竟感受係點？各項新功能又好唔好用？而家就等筆者同大家分享一下。
升級都算快最多個半鐘完成
首先大家最擔心就係升級要好耐時間，筆者都有啲朋友講部機由係 App Store 按「下載」鍵到完成整個升級過程，需時幾個鐘甚至成日！究竟係咪真係要咁耐？筆者幫 3 部機升級：iMac 5K、MacBook Air（2013）同埋 New MacBook，3 部機逐部升級，最終一晚大約 6 個鐘左右內完全搞掂，而每部機升級都係需要 1 個至個半鐘左右，唔算好耐。至於昨晚點解要咁耐？好簡單：大家都搶住想第一時間體驗新 OS，server 塞車自然比較耐。如果大家今個 weekend 先搞升級，應該會快好多吧！
相關文章:
macOS 修復神器「Fix Tim」 免重啟修復 Wi-Fi、iCloud 同步失靈等復古靈精怪 bug
機身較熱手提電腦尤甚
另外，幾部電腦升級 El Capitan 後，筆者發現都有同一問題：機身比使用 Yosemite 個時熱咗少少，尤其係手提電腦上面更加明顯。例如：筆者部 MBA，之前用 Yosemite 個時平時使用機身都係冰冰冷冷，但升級上 El Capitan 之後，機底近鉸位中間部分會比較熱。但係咪熱到「辣大脾」個隻？咁又唔至於，大約都係 36 度左右，微溫囉。所以估計 El Capitan 的 Metal 部份使用更多的 GPU 作加速，間接讓溫度提高。
好似新嘅一樣！New MacBook 唔再窒
好啦，咁除咗部機熱咗之外，其他升級後感覺係點？其實 Edward 覺得之前係 Yosemite 上面各機表現都已經好好，可能我嘅機買個時一般都會盡量「打爆」spec，例如：MBA 就會加配 i7 CPU + 8GB RAM + 512GB SSD，但之前都有時會窒窒地，尤其是用 Safari 開十幾個 Tab 個時，呢個情況更係明顯（雖然都無乜幾可會開咁多個 tab，多數都係搵資料個時先至係咁）。不過升級去 El Capitan 之後，窒嘅情況一去不復返，就算開廿幾個 tabs 都未見有窒嘅情況，亦未見有「沙灘波」現身，表現好滿意。當然最明顯都係 New MacBook 上面，呢部係我唯一無打爆 spec 嘅機（Intel Core M 1.1GHz CPU + 8GB RAM + 256GB SSD），升咗 El Capitan 之後之前窒下窒下嘅情況完全無哂，就算係 Safari 開 10 幾個 tab 都唔見窒，係幾個桌面之間切換都好暢順（呢個情況係 iMac 5K 上面尤其明顯），感覺就好似一部新機一樣！可見 El Capitan 明顯有為系統流暢度進行微調，令無論新機舊機，多數情況下都有一定程度嘅效能提升。
不過你話係咪真係完全無 bug？又未必，因為我嘅同事部 iMac（2011 年中），升咗 El Capitan 之後，雖然都係好暢順，但 Safari 有次開咗 7 個 tabs 就出現「沙灘波」（即係 hang 機），不過又唔係次次係咁，都係「撞手神」。筆者估計應該都係 El Capitan 而家嘅始終係第一版本，有 bug 在所難免；加上同事嘅 iMac 已經係較舊型號（4 年幾前），雖然都已經有 12GB RAM，但效能點都無新機咁好。希望未來 Apple 會推 patch 修正舊機上面嘅問題，令大家部舊 Mac 可能再捱一年啦。
▲係 MBA 上面 Safari 開廿幾個 tab 都仲係好順。
▲係 iMac 5K 上面用 Mission Control 都比之前係 Yosemite 上面用順咗。
開機超快！Safari 載入「快到無影」
另外，El Capitan 係各部 Mac 上面，我只能用兩個字來形容感受：快 + 爽！唔止開機快過以前最少一倍，就連 Safari 入面 load 網頁，係相同 Wi-Fi 環境下速度都比以前快好多，例如：係 MBA 上面 load unwire 主頁，以前通常都要 5 秒以上先 load 得完，而家係 2 秒唔洗已經 load 哂兼可快速 scroll，真係可以話「快到無影」。
相關文章:
macOS 修復神器「Fix Tim」 免重啟修復 Wi-Fi、iCloud 同步失靈等復古靈精怪 bug
打字 bug 仍有但好好多
之前 Yosemite 上面，我使用 Chrome 瀏覽器 + Yahoo 奇摩輸入法嘅速成編輯 unwire 稿件，有時會出現無咗選字欄嘅情況；但係 El Capitan 上面，呢個情況似乎唔再發生，無論係 Chrome 定係 Safari 上面都可以順利用速成打字揀字，真係令筆者倍感安慰。不過筆者同事就表示使用原生倉頡輸入法，會出現輸入字碼但揀字對話框消失嘅情況，估計同樣都係初版本嘅 bug 來，希望 Apple 可以盡快解決吧。
中文字靚咗易睇咗
今次 Apple 係 El Capitan 入面加入咗全新嘅字體，英文加入之前已係 Apple Watch 同埋 iOS 裝置上面用嘅 San Francisco，而中文就加入蘋方字體。英文來講，可能筆者都已經用慣 iPhone、iPad 同埋 Apple Watch，感覺無咁大震撼；反而中文字體蘋方，就真係令我印象深刻：因為用上新字體後，比起 Yosemite 入面嘅中文字，尤其係細字或者幼線條嘅中文字，都會清晰咗好多。據 Apple 官方表示，呢款字體係特別為數碼顯示器而設，而且連線條粗幼都有 6 個程度，Apple 今次呢份細心，真係值得一讚！
▲El Capitan 上面中文字加入蘋方新字體。
▲新嘅中文字體，係瀏覽中文字，尤其係線條較幼或較細嘅中文字，會比係 Yosemite 更加清晰。
Split View 感覺一般
Apple 亦係 El Capitan 入面加入全新 Split View 功能，其實用法就好似 Windows 嘅 Snap 一樣，可以將兩個程式左右各佔熒幕一半，令大家可以邊睇住一邊，同時係另一個視窗入面工作。但其實之前係 Yosemite 個時，筆者都一直用緊一隻擁有相同功能，名為 BetterTouchTool 嘅 APP，而係 El Capitan 上面，呢隻 APP 都照用無問題之餘，用落其實比 El Capitan 內置嘅 Split View 方便，最少一拉一放就得，唔洗好似 Split View 咁，要禁住視窗左上角嘅綠色制之後再拉咁麻煩。所以如果你問筆者，除非大家對原生功能情有獨鍾啦，否則都係建議用番 BetterTouchTool 方便啲。
▲Split View 功能效果好似 Windows 嘅 Snap，但用落就真係唔太好用，要禁個綠色制之後再 drag，唔夠 user-friendly。
▲筆者寧願用番 BetterTouchTool，向熒幕左右拉就可以，唔洗禁其他制。
新版 Safari 好好用
另外，升級 El Capitan 之後，新版 Safari 都係一個值得一讚嘅功能。首先，佢嘅 pin 功能真係好好用，可以將一啲經常瀏覽嘅網頁向左一拉就縮到去分頁瀏覽欄最左位置並只顯示一個細 icon，唔止慳番唔少分頁瀏覽欄嘅空間（對於好似筆者呢啲用緊 1,366 x 768 解像度 MBA 11 吋嘅用家來講簡直係恩物！！），而且就算關閉咗瀏覽器，下次開機個時，呢啲 pin 咗嘅網頁都會繼續保持係分頁瀏覽欄最左方，方便大家隨時開番來睇，令我唔洗再入書籤或者 search 番都可以開到呢啲網頁，真係好方便。
▲新版 Safari 嘅 pink 功能好好用，常睇網頁拉去分頁瀏覽欄最左邊就可以了。
▲就算關咗機之後再重開，pin 咗嘅網頁都仲會係度，要開番仲方便過放入書籤。
其次就係記事功能，以往大家如果要記低某網頁留待之後睇，都會 highlight address bar 入面條 website，再 Command + C 複制之後，再係打算記下嘅地方禁 Command + V 貼上先得；又或者索性將呢個網頁放入書籤。但而家要記低個網頁，只需要禁右上角嘅箭咀鍵，之後再揀備忘錄，咁就可以將網頁放入備忘錄，超級簡單，禁兩個制就搞掂。
另外，有時睇網頁開咗幾個 tab，突然之間有啲網頁會自動播片出聲，萬一身處要保持寧靜嘅地方，部電腦突然出聲又唔知係邊個 tab 出聲，都幾尷尬。新 Safari 就加入讓標籤頁靜音嘅功能，大家可以指定邊個標籤頁靜音，又或者索性將所有標籤頁都靜音哂。咁大家以後遇上呢個情況，就唔洗禁鍵盤上面嘅 mute 鍵，都可以叫部電腦「收聲」啦。
相關文章:
macOS 修復神器「Fix Tim」 免重啟修復 Wi-Fi、iCloud 同步失靈等復古靈精怪 bug
新功能多數夠實用
除咗以上提及嘅新體驗外，El Capitan 仲加入咗唔少實用嘅新功能，例如：照片入面加入「延伸功能」，可以下載 3rd party APP（例如：修圖程式），然後利用內置照片 APP 就可以直接修圖，唔洗開多個 APP 浪費系統資源；地圖係某些國家（例如：英國、美國等）加入交通工具功能，可以外遊時用地圖搵前往景點嘅交通工具同埋查詢相關班次，唔洗左搵右搵 3rd party APPS 查詢相關資料；電郵 APP 入面利用兩指向右滑就可標示電郵為已閱讀，向左滑就可以刪除電郵，連 click 動作都唔洗做；Mission Control 新增可以俾大家真正全熒幕使用一個程式，增大工作空間；手寫輸入法視窗比以往更大，令大家可以同時寫兩個中文字……等等。呢啲新功能，令大家係使用 Mac OS X 上，更加得心應手。
▲可以係內置 APP 入面加入延伸功能，咁樣就可以係內置 APP 入面用到 3rd party APP 入面嘅功能，例如：係照片 APP 入面加入更好用嘅執相功能。
▲外遊個時，仲可以用地圖 APP 查詢前往景點嘅公共交通工具。
▲電郵 APP 入面要標示電郵為已閱讀又或者刪除郵件都更方便。
▲Mission Control 而家仲可以將程式設定為全熒幕顯示，對於擁有較低解像度熒幕機款嘅用家來講，用起來會比以前方便好多。
▲中文手寫輸入的方格，係 El Capitan 上面都大咗，大家可以同時寫多過一個中文字，加快輸入文字速度。
總結：免費升級唔一定差呀！
其實 Mac OS X Apple 已經連續幾代俾用家免費升級 OS，事實上幾代下來，Apple 已證明免費嘅嘢未必係差！而今代 Mac OS X El Capitan，雖然有人覺得有啲功能係左抄右抄，但筆者覺得就算退一萬步真係抄，都要抄得其所吧，因為最終用家最重視嘅，都係使用感受：只有使用感受夠好，用家先會繼續支持！今次呢個全新 OS，如果你問 Edward 感受如何？我會答大家兩個字：爽、快！就算係舊到好似同事部 iMac（2011 年中）機款，裝上 El Capitan 之後都算暢順，呢點都係筆者始料不及嘅。除非大家用開嘅程式不支援係 El Capitan 上面用，否則筆者覺得 El Capitan 確實係值得升級！
相關文章:
macOS 修復神器「Fix Tim」 免重啟修復 Wi-Fi、iCloud 同步失靈等復古靈精怪 bug
分享到 :
最新影片
