最近，自從 iPhone 6s 炒燶了，身邊就有唔少朋友都換左新電話，出親街都話要買殼同 mon 貼，小女子當然奉陪到底，同佢地睇到啱為止。有時，佢地會問我意見：「你用開邊隻架？有冇好介紹？」跟住我就拎部電話出黎，佢地一見到就話：
「嘩，妳裸跑喎！」
無錯，我而家唔單止冇用殼，就連 mon 貼都冇黏，望住佢素顏的樣子，加上日日同佢零距離親密接觸，感受佢最原始的纖薄質感，覺得很好。啲人成日話要「個人化」部手機，黏張閃令令 mon 貼呀，買幾個唔同顏色的殼來換季襯衫呀… 前者我尚可接受，因為電話個 mon 的確係幾脆弱，一個唔覺意跌左落地爆 mon，咁就係咁大，黏張 mon 貼保護下，咪當搽啲防曬喺塊面囉。但係我覺得個殼真係可免則免，除左因為我奉行簡約主義原則，最大的原因係人地生產商辛辛苦苦整到部電話薄 0.01 cm，你又加個殼包住佢，完全係化左濃妝的女人！我接受唔到囉。
話就係咁話，但利申，其實我之前都有用過 case 嘅，不過就都係啲好薄，同冇乜花巧野嘅款，就好似我真人咁，哈哈哈。後來我覺得，個電話唔用殼手感好啲，加上有幾分歲月的痕跡（即係跌鬼崩左、同刮花左少少），有啲蒼桑感，其實咪更加個人化。其實我都幾念舊，我個電話已經跟左我兩年，係我第二部智能電話（第一部電話都有好多故仔，而家仲用緊，也有 4 年了），佢同我經歷過好多驚險時刻，佢身上每一道痕跡都有一個故事，所以就算佢係素顏我都係咁鍾意佢。
就算，我聽日換部 iPhone 6S ，我都會奉行原則，一於照樣祼跑！大家一齊加入我啦~
分享到 :
最新影片
