之前兩個測試，證明 iPad Pro 真係聲音畫面都無問題。而 iPad Pro 另一個大家都幾關心嘅，就係個效能，因為相比其他 iPad，iPad Pro 係規格上認真係超班：唔止採用最新嘅 CPU，RAM 仲多好多！究竟用起來係咪真係勁咗？而家就等 Edward 同大家試一試啦。
4GB RAM + A9X CPU 超爽快
iPad Pro 可以話係有史以來效能最強嘅 iPad，因為佢唔止採用最新嘅 A9X 處理器，而且記憶體仲有成 4GB RAM 咁多，相比 iPad Air 2 / iPad mini 4 嘅 2GB RAM，足足多咗一倍。呢個升級其實都好合理，因為 iPad Pro 熒幕比次大嘅 iPad Air 2 足足大咗接近 3 吋，系統自然需要更強硬件去維持暢順運作。筆者無用跑分來試佢究竟比其他 iPad 強幾多，只係試過某啲都幾耗資料嘅 APP，例如：Essential Skeleton 4 呢個採用 3D rendering 效果嘅人體骨骼展示 APP、Procreate 呢款專業畫畫 APP 等，發覺係運作個時都十分暢順，尤其是 Essential Skeleton 4，係放大縮細、旋轉骨骼個時，都有超級暢順嘅效果。相信如果拿呢部機用來繪畫 3D 圖像、甚至拿來處理影片剪接，應該都會有上佳效果。
▲開 Essential Skeleton 4 睇 3D 人體骨骼圖，無論係放大縮細定係旋轉骨骼圖，都完全暢順。（有片為證，影片製作中……）
多工表現極優勝•同時 run 3 個 APP 都無問題
另外，係多工處理方面，iPad Pro 嘅 4GB RAM 亦俾到用家超級暢順嘅效果。佢有齊 iPad Air 2 / iPad mini 4 上面都有嘅雙開 APP 功能，影片亦支援懸浮視窗，筆者係開啟 Safari 瀏覽網頁嘅同時，亦開啟咗 Procreate 3 畫畫，同一時間亦使用內置「影片」APP 加上懸浮視窗模式播放《破風》HD 解像度影片，發覺 3 個 APP 同時運作都有好暢順嘅效果，無一個係有窒或者彈 APP、hang 嘅情況出現，可見 4GB RAM 係 iPad Pro 多工處理上，真係發揮到佢應有嘅表現，如果大家係打算拿部比手提電腦輕嘅機款外出工作，iPad Pro 應該都係多數情況下幫到你。
▲同 iPad Air 2 / iPad mini 4 一樣，都可以雙開 APP 使用。
▲同一時間用 3 個 APP（左邊用 Chrome 睇網頁、右邊用 Procreate 3 畫畫，右下角開咗影片 APP 睇《破風》HD 版，同時運作無一個 APP 會有窒嘅情況出現。
可能有啲讀者會比較在意打機效果又如何？筆者試咗幾款遊戲，包括港人比較鍾意玩嘅 Clash of Clans、白貓同埋 P&D，以及筆者鍾意玩嘅 Real Racing 3、SimCity BuildIt 等，全部都有好暢順嘅效果，唯一係白貓、P&D 呢類要打直部機玩嘅遊戲，長時拿拿住部機對手會比較累，但暢順度方面完全唔洗擔心。唔信？遲少少有片為證！
▲真係從未試過拿咁大~~~~部機玩 P&D 同埋白貓……視覺效果震撼好有啲恐怖。
▲用來玩 Clash of Clans 同埋 SimCity BuildIt 都係爽皮到爆，同係 iPhone 上面玩真係無得比！
▲不過最正都係玩賽車 game，似乎拿住部 iPad Pro，可能機身較大，感覺較易操控，亦比較易贏 LoL！
總結：唯一擔心係電量……
整體來講，iPad Pro 係效能上，由於採用最新規格嘅硬件，所以就算好似上文提及，Edward 同時開啟 3 個 APP 使用，都會有只係用一個 APP 個時嘅暢順效果，呢一點真係值得一讚。筆者唯一擔心嘅，反而係 iPad Pro 嘅電量。雖然 iPad Pro 內裝有 10,307mAh 容量電池，官方亦表示可以連續用到 10 小時，但筆者朝早 11 點半左右拔除充電火牛（當時 iPad Pro 電量係 100%）後，去到夜晚 8 點左右，就已經剩下 40% 左右，而中間筆者只係進行今日呢幾篇文嘅幾項測試，以及中間用過來上 MyTV 睇咗一集劇集，同埋上咗一陣高登 only。如果真係要用畫畫 APP，尤其是畫 3D 圖嘅 APP 畫足幾個鐘，究竟可以捱到幾耐？筆者始終係第二日用部機，真係未答得實大家。但筆者就建議大家最好就唔好長開熒幕，就算開都唔好好似筆者咁開到成 100% 亮度（其實 iPad Pro 熒幕都幾光，除非係太陽底下用，否則一般情況一半至 70% 亮度都夠），咁就可以用到一日甚至更長時間啦。
相關文章:
【評測】MacBook Pro M4 2024 詳細效能評測 + 選購指南分析 7 大要點 【評測】Mac mini M4 2024：進階用家最應該買的 Apple 電腦 效能、日常應用詳細評測分析 【教學】iOS 18.1 如何用 Apple Intelligence 只需 2 個設定 + 香港免 VPN 也可用
分享到 :
最新影片
