SH-06G 係一部日系摺機，機側有自動開蓋制，一按即彈。雖然係行 Android ，但冇 Google Play，冇 Touch Screen，冇 4G 最高支援 3.5 G。仲有冇乜好玩？繼續閱讀以下文章。
一㩒彈開蓋
機蓋外面有一個細小嘅 LCD Screen，只要按下機側按鈕就可以顯示時間，除咗時間，有電話打黎嘅時候當然會顯示 Caller ID。機身左邊鉸位有一粒開蓋按鈕，一按蓋掩就會彈開，不過要小心，彈開蓋時力度可以會搞到用家甩手，成部機彈落地。
▲機身左邊鉸位有一粒開蓋按鈕，一按蓋掩就會彈開，不過要小心，彈開蓋時力度可以會搞到用家甩手，成部機彈落地
▲機蓋外面有一個細小嘅 LCD Screen，只要按下機側按鈕就可以顯示時間。
▲除咗時間，有電話打黎嘅時候當然會顯示 Caller ID。
Keyboard 可以當 TouchPad
方向制外圍及中間確認制，甚至機面 LCD 外圍都有金色設計，黑色金色夠晒 Vintage 又豪氣。冇 Touch Screen，用上最復古嘅 Number Pad， 上方亦有相機、瀏覽器等快捷鍵，用某啲 APP 時 Touch Cruiser EX 功能會自動啓用，可以用手機鍵盤作為 Touch Pad 使用，如果功能沒有預設開啟，用家只要按住接聽鍵就可以手動開啟。
▲只要按住接聽鍵就可以開啟 Touch Cruiser EX 功能
▲開啟 Touch Cruiser EX 功能後，箭咀會出現，用家可以用手機鍵盤作為 Touch Pad 使用
冇 Google Play 又要裝 APP？唔係話唔得嘅
SH-06G 係冇 Google Play 嘅，咁要點樣裝 Apps 呢。籮文就試過用另一部手機先下載 Apk 檔，再用藍芽傳送到 SH-06G，最後係成功安裝到 Instagram 架！所以唔係話唔得嘅… 不過煩嘅囉。
▲最後係成功安裝到 Instagram
防偷窺? 唔洗 Mon 貼
一個好多 SH 系列手機都有嘅 Veilview 功能，令用家喺正中央先可以清楚睇到手機嘅畫面，如果喺側面望就睇唔到，防偷窺 Mon 貼都慳返！其實近睇都可以睇得到少少畫面，文字就難以閱讀，不過唔好諗住用黎 Full Screen 睇某啲相片或者影片，我話你知，你隔離啲人實睇到。
▲只要開咗 Veilview 功能，基本上冇影響正面睇畫面。
▲但喺側面睇，只會睇到好靚嘅圖案！
主鏡500萬像素 前鏡？冇前鏡架喎
SH-06G 搭置 500 萬像素鏡頭，不設前鏡，自拍少陣啦！廠商一定係知道影相功能對用家黎講係好重要（但係得500萬像），所以有一粒相機快捷鍵。相機介面都好簡單。按確認鍵就拍照，可以用 Touch Cruiser EX 功能選擇對焦點，最高可以拍到 1920 x 1080 嘅相片，1280 x 720 影片。講真，500 萬像素黎講，成像都算清?，顏色亦唔錯，都幾驚喜。
▲廠商一定係知道影相功能對用家黎講係好重要，所以有一粒相機快捷鍵
▲相機介面都好簡單。按確認鍵就拍照
▲老實講，雖然得 500 萬像素，但出黎效果都喜出望外，樽上文字全部都閱讀到，顏色亦非常鮮豔
▲加多隻貓，啲貓毛成像清?，一條一條好細緻
隨機附送精美充電座
依部機比較值錢嘅一個地方就係一個附送精美充電座，用家返到屋企就可以將手機插入充電座，當係一個座檯鐘。但就算放上充電座，機面時間亦唔會長著，所以正確來講應該係「要㩒制先識顯示時間嘅座檯鐘」。
▲充電座後方照插 MicroUSB
▲但就算放上充電座，機面時間亦唔會長著，所以正確來講應該係「要㩒制先識顯示時間嘅座檯鐘」
籮文：「冇 Google Play 自裝 Apk 但佢係日系摺機」
如果你話「冇 Google Play 唔掂」籮文就覺得對於摺機迷又或者喜歡懷舊嘅朋友，依部的確係正嘢。仲記得籮文小時候用嘅 Nokia 十六和絃手機，如果要轉鈴聲就要上網搵 條水蛇春咁長嘅 Code 自己逐粒音打入手機，經過努力後聽返自己努力後嘅成果，嗰種成功感係好正。依家要換鈴聲㩒粒制就係。 頭先當我需要時間去嘗試於 SH-06G 入面裝 App，幾經測試最後成功，我搵得返啲啲成功感。科技係用黎方便人類，但有一啲嘢係科技俾唔到你，就係感情。
分享到 :
最新影片
