舊年 SHARP 推出了 Crystal X 呢部擁有極幼邊框的手機，今年年頭 Sharp 就推出呢部「神機」的迷你版：AQUOS Serie mini SHV31，設計同 Cyrstal 相差唔多，但就採用了 4.5 吋 1080p IGZO 1,677 萬色熒幕。想知更多就繼續閱讀以下文章啦！
青春四色 幼框防水
身為 Crystal X 嘅迷你版，SHARP AQUOS Serie mini SHV31 有桃紅色、藍色及黑色、白色 4 色選擇，材質用上類似 iPod Touch 嘅亮面設計，望落非常青春 Feel。沿用幼邊框設計，但係就唔夠 Crystal X 咁幼，機身方面，厚度為 9.9mm，拎上手厚咗啲，不過籮文就覺得咁樣手感更加實在。同 Crystal X 唔同，SHV31 支援 IPX5/IPX7 防水防塵規格，只要蓋好 SIM 卡卡同 SD 卡槽嘅防水蓋，喺水深 1M 嘅地方浸水 30 分鐘都無問題，而 USB 同耳機位嘅防水蓋呢？原來 SHV31 嘅 USB 位同耳機位用左內置防水設計嘅，唔洗防水蓋㗎。
▲SHV31 有桃紅色、藍色及黑色、白色 4 色選擇，材質用上類似 iPod Touch 嘅亮面設計，望落非常青春 Feel
▲左側音量鍵
▲右側開關鍵
▲MicroSD、Sim 卡槽及耳機孔設於機頂
▲而 MicroUSB 位則於機底
▲機身方面，厚度為 9.9mm，拎上手厚咗啲，不過籮文就覺得咁樣手感更加實在
4.5吋 1080p 靚芒 密度高達 490ppi
採用了 IGZO 1,677 萬色熒幕，將 1080p 解像度塞到 4.5 吋細小屏幕，像素密度高達 490ppi，細緻度非常高，籮文用盡眼力都睇唔到有起格情況。雖然屏幕太細，睇片係冇咁爽，但係 SHV31 屏幕用上 Sharp 自家研發 IGZO 技術，亮度比一般使用 AMOLED 、 IPS 等手機更高，烈日當空都可以清?閱讀，色彩亦尤其鮮豔。而喇叭方面，聲音非常清?，但係音量都唔算好大。
▲將 1080p 解像度塞到 4.5 吋細小屏幕，像素密度高達 490ppi，細緻度非常高，籮文用盡眼力都睇唔到有起格情況
▲雖然屏幕太細，睇片係冇咁爽，但係 SHV31 屏幕用上 Sharp 自家研發 IGZO 技術
▲亮度比一般使用 AMOLED 、 IPS 等手機更高，烈日當空都可以清?閱讀，色彩亦尤其鮮豔。
上手即 Unlock 防偷窺用唔洗 Mon 貼
SHV31 作為一部日系機，唔少得一啲得意功能，就好似 EDGEST Effect 功能，螢幕解鎖或者有來電打入時螢幕邊框就會有幻彩效果，同埋 Magic Grip 功能，用家只要手握到機邊就可解鎖螢幕，唔再需要雙手一齊解 Lock 。而籮文覺得最特別嘅係一個叫做 Veilview 嘅功能，令用家喺正中央先可以清楚睇到手機嘅畫面，如果喺側面望就睇唔到，防偷窺 Mon 貼都慳返！
▲SHV31 作為一部日系機，唔少得一啲得意功能，而籮文覺得最特別嘅係一個叫做 Veilview 嘅功能
▲用家喺正中央先可以清楚睇到手機嘅畫面，如果喺側面望就睇唔到，防偷窺 Mon 貼都慳返！
1,310 萬像素相機 質素一般般
擁有 1,310 萬像素鏡頭，比 Crystal X 多 10萬像素，影相表現同 Crystal X 一樣，都係麻麻喎。 由於冇 OIS，昏暗環境影相就好易有鬆郁矇情況，就算環境夠光，相片放大油畫情況都嚴重，而前鏡頭更加只有 120 萬像素，依個人人都自拍嘅年代，得120 萬像素實在不能接受。
▲夜間相片放大後有油畫情況，不過白平衡好準
▲由於冇 OIS，昏暗環境影相就好易有鬆郁矇情況，雜訊少少明顯
規格比較入門
機內搭載 Qualcomm Snapdragon 801 處理器及 2GB RAM，性能都唔弱，但比較同期 Snapdragon 805/810 或 3GB RAM 就稍為落後。支援 4G LTE 網絡、支援 VoLTE 功能、內建 Wi-Fi 802.11ac 及內建 2,120mAh 容量電池。作業系統方面，採用了 Android 4.4 KitKat。
籮文：「外型夠晒靚仔 可惜規格麻麻」
依部身為 Crystal X 嘅迷你版，基本上除了屏幕較細之外，其餘均與 Crystal X 相同，就算係外型都 Keep 住同一個風格一樣咁靚仔。可惜規格已經係過氣，尤其係前鏡得 120 萬像素，實在係好弱雞。但係外型夠型，又要防水，都攞返唔少分。
分享到 :
最新影片
