如果買一份禮物，女朋友又鍾意，自己又可以大飽眼福你話幾好呢？咪心邪住，我依莉詩想介紹的是早前係 Indiegogo 集資廣受注目的 Axent Wear 貓耳機咋！
超萌貓耳識播歌
Axent Wear 最突出的當然係耳機上的兩隻貓耳，戴上頭，無論貓奴定動漫迷都會覺得好萌。而貓耳同耳罩上都有 LED 燈效，有紅、藍、綠 3種顏色選擇，玩味十足，可惜只有一種色，如果可以 3隻色漸變轉色應該更有科幻感。最令人意想不到的是，貓耳唔止係裝飾，更係個外置式喇叭，係聽音樂的同時，又可以同朋友分享音樂。不過喇叭的音量唔算好大，音質同用手機播歌差不多，而且開咗喇叭的時候，耳機會時不時發出吱吱聲，所以我建議唔好邊戴耳機，邊開喇叭了。
▲ 雖然貓耳機可以摺得埋，而且附送一個收納盒保護耳機，不過 size 都幾大，拎出街有一定難度。
▲ 開頭以為貓耳可以拆落嚟變番普通耳機，但原來係唔得嘅！
▲ 貓耳唔止係裝飾咁簡單，仲係外置喇叭，不過要求就唔好太高啦！
▲ 貓耳同耳罩都會著燈，夜晚用好有科幻感。
▲ 耳機上半截可以 360°旋轉，而下半截可以調節長度，不過轉軸比較脆弱，轉動時要小心呢！
煲劇聽歌剛剛好
呢款耳機本來就只係睇外型，唔會期待佢的音質，官方聲稱耳機有 40mm 的驅動元件和 20Hz-20KHz 的音質頻率，聽落唔會係最好，不過用嚟普通煲劇聽歌已經夠。而且耳罩的軟墊式設計都算舒適，用嚟長時間煲劇都唔覺太攰。音質方面都算清澈，不過低音唔多準，幸好我用嚟試聽《雷克雅未克》都仲感受到人聲同背景聲的層次。
▲ 耳罩左面有耳筒線位同收音咪位兩個插頭，方便打機之人外插收音咪。
▲ 而右面有音量掣、喇叭掣同 LED開關，中間有micro USB充電孔，充飽一次電大約需要 2.5小時，可使用5小時。
依莉詩：「聽落比想像中好聲！」
其實貓耳機只係純粹睇外型，對女仔嚟講音質亦未必有太高要求，我覺得用嚟普通煲劇、聽歌已經好夠。雖然耳罩有D 重，不過的軟墊式設計都算舒適，亦沒有夾頭問題，用嚟長時間煲劇都唔覺太攰。至於外型上，貓耳確實好可愛，除了 LED左右亮度唔太均勻外，做工都算好。不過如果 LED 燈可以漸變轉色就更有科幻感。就快情人節，送俾體型嬌小的女朋友做禮物，佢又鍾意，你又望得開心，一舉兩得吧！
售價：$1,199
查詢：Oregon Scientific (23031889)
地址：中環國際金融中心商場1019B舖、港島東太古城中心256舖、銅鑼灣崇光百貨10樓
相關文章:
電視牆壓死貓裝修公司 FB 出道歉片 網民：點解得兩粒螺絲咁少又冇爆入牆
分享到 :
最新影片
