昨日筆者就報導過，今日開始 uberX 將會大減價，只要在九龍或新界上車，就可以有八折優惠。今日放工筆者實在很疲累，加上公司身處九龍，反正順便就搭了一程 uberX 回家，順便在車程中與司機聊了一會。想知係咪堅平咗？司機會唔會少咗收入？下文有更多內容：
唔覺難截咗
有讀者之前就擔心，減了價如果令司機收入減少，作為乘客會唔會難了 call 車？筆者就一於試試，由牛頭角出發，目的地就是在將軍澳寶琳。筆者 call 了車，不用十多秒已經有司機接了單，然後等待 10 零分鐘左右（本來應該是 6 分鐘就到，可惜司機行錯路所以遲了到達）就已經上得車。
真係八折無花無假
由於無塞車，車程與平時一樣，10 零分鐘經過將軍澳隧道就到達屋企樓下，完全無兜路。至於車資方面，前日筆者同樣搭過 uberX 回家，那時候連隧道費的車資是 $73.62，而今日減價後同樣連隧道費的車資是 $57.55，計一計，真係八折有找喎！平時筆者搭的士回家都要 $70 左右，而家 $60 唔洗就番到屋企，抵到爛！
有補貼機制司機未必蝕
之前有讀者就擔心，咁樣減價，對於司機來說會唔會收入少了？筆者就趁十多分鐘的車程與司機阿文（化名，司機不願意上鏡）聊了一會。他表示帳面上的確是有機會賺少了，但其實 Uber 方面亦有補貼機制：「基本上 Uber 系統會不停塞單俾司機，當你這張單差不多到達目的地時，就會在該目的地附近搜尋有沒有新單，如果有就會俾單司機。當然，司機可以選擇接與不接，接了自然要做，如果選擇不接，系統亦會計算在內。至於補貼機制係點？系統會計算塞了幾多張單俾司機，一日完成後會計算俾了司機的單與真正完成的單的百分比，如果 100% 全接的話，Uber 會將減價後司機少收了的差價補給司機，這情況下司機自然無損失，乘客亦有著數，Uber 又多了人用，基本上是一個三贏狀態；但如果司機只是接了 7 成單，補貼差價就只會補貼 7 成，所以不接的單愈多，補貼就愈少，司機的收入自己大減。」
百份比機制確保易叫車
可能有 wire 民會擔心：咁如果司機會食飯或上洗手間，剛巧有單派入來而接不到，這樣似乎有點無辜吧？阿文就表示其實這情況，司機可以停止不再接單，系統就不會再派單給司機，這時司機就算食飯、上洗手間或放工，由於不會收到新單，所以自然不會影響接單百分比，亦不會影響補貼額了。
阿文認為，對於乘客來說，這個機制可以確保更大機會有車載，是好事來；對於 Uber 來說，他們收的手續費未有因為減價而少了，所以亦是贏家；對於司機來說，他覺得這種制度反而減少他們同時接不同平台乘客的機率，因為沒有司機想少了補貼而導致收入減少，就唯有不停努力做，接多點客增加收入。對於司機來說，似乎只是被「縛死」較難轉會，但對於收入來說，勤力一點的話，其實是不會少賺了錢。
Cetah 新 APP 客少但做住先
筆者臨落車前，亦有問阿文一句：其實現時有土炮的類似 call 車 APP Cetah，會否考慮轉會呢？阿文就表示暫時不會：「其實我都有 join，但覺得好似勁少乘客，所以暫時都係觀望住先。如果遲啲多番啲客，唔排除兩邊一齊做架，始終多咗收入，對司機來講都係好事吧？」
