話說《逃學威龍》有一幕係周星星同學出貓，又要出動晒電話、call 機同埋膊頭有花果啲人。不過而家咁多位 Wire 民你有福了，因為我最近係網上搵到一隻震驚七百萬人嘅出貓錶，佢講到好神，不過真實用上去係點就唔知喇，所以我水哥決定親自訂返嚟用下佢先！
Unwire 聲明：本網站絕不鼓勵任何人以任何方式作弊及在公共場合做行為不檢之事，本文章純為水哥探討新科技，以供讀者娯樂之用。
要靠特製眼鏡才看到錶面
首先睇下隻錶外觀：睇落四四方方有啲似 Apple Watch，戴上手，錶帶係橡膠製嘅，幾舒服，遠睇人哋都只會覺得係一隻錶 (梗係啦，出貓錶都係錶姐…)咁隻錶係要點用呢？佢嘅錶面係特製嘅，要戴上佢附屬嘅專用眼鏡先可以望到錶面嘅顯示內容，所以 unwire.hk 讀者們，戴咗佢你哋睇緊啲咩，係無。人。知！
▲無咗副眼鏡，係乜都睇唔到。
▲ 盒內有出貓錶、耳機線、特製眼鏡，一套過就係咁。
成篇課文搬入去，背默 100 分..
話明「出貓錶」，佢嘅主要功能梗係俾你出貓啦。佢有文字閱讀器，不過只支援純文字檔案 (即係記事本個種格式) 。內置 4GB 容量，以一本倚天屠龍記嘅文字 2MB 嚟講，佢可以裝到 2000 本倚天屠龍記嘅內容。你入咗本百科全書落去都無問題。所以，唔好以為佢只係出貓咁簡單，你開緊會 / 上緊堂都可以「明張目膽」咁睇小說。因此，假如真係要出貓 (本網站勸大家唔好！)，unwire.hk 讀者們可以將啲 Notes 打入電腦，再過落隻錶度。咁樣就可以係考試嘅時候神不知鬼不覺咁出貓喇。佢內置有條 USB 線可以用嚟叉電，同時都可以用嚟過資料 (相、文件、片)，由於佢隻錶只得一個 3.5mm 插口，所以乜都係靠佢架喇。
▲由於你隻手不嬲都係咁擺，人地遠睇唔會覺得你望住隻錶抄緊嘢。
▲ 3.5mm 插口負責聽歌、過資料同叉電，一「窿」玩晒。
特設「緊急制」消滅罪證
如果咁唔好彩老師起疑咁點算呢？呢個時候只要按一下錶右下角粒掣，佢就會變咗時鐘介面。
如果 「AV 仁」當初識咁睇 佢就唔會搞到咁
副眼鏡當然仲可以用嚟睇啲平日唔見得光嘅嘢啦，例如美女圖。有時開會好悶，但係又未必可以拎部手機出嚟提下神，呢個時候隻錶或者會助你分下心做其他嘢，嚟對抗公司沒完沒了嘅會議…睇相呢，支援嘅格式都比較大路，有 JPG、GIF 同 BMP 。不過 Mon 好細，我諗睇到盲都未睇到個重點。唔怪得 AV 仁用 iPad 睇美女圖啦，的確係舒服啲嘅。睇片呢，支援格式得兩種，講你都唔識：AMV 同 AVI ，入落隻錶之前又要轉檔，轉完檔又未必睇到，就算睇到都勁低質素，不如你都係返屋企上 thisxx 算啦。
水哥：售價連運費將近 $1000 抵唔抵見人見智
雖然話係「出貓錶」，但係其實佢嘅功能都唔少，可以聽歌、睇相睇片、睇書、連計時、日曆都有，聽歌方面都唔差，有埋均衡器俾你 tune 埋，我覺得可謂做到足。不過佢售價加埋運費都要約 $920 港紙，即係將近成千蚊，無返咁上下貨點對得住啲用家，所以抵唔抵就見人見智啦，同埋，長氣都要講一句，千祈唔好喺 DSE 度出 Cheat 咁多位考生。
相關影片
分享到 :
最新影片
