仲有幾個月電動方程式賽車 Formula E 香港站就舉行，大家係咪好想揸番轉呢？依家除咗係 觀塘 有得揸 Crazy Cart 玩飄移，最近元朗都開咗個 15000呎室外試車場。今日我依莉詩就冒住會曬燶的風險去揸「大膽車」！
室外場更大更真實
今次呢個室外場叫 Mr.Car ，位於元朗馬田村旁，雖然日曬雨淋又唔多就腳，不過車場面積有一萬五千呎，差唔多有 4個籃球場咁大，同時可以俾 8架車落場，而且賽道有十幾個彎，每個彎位亦足夠兩部車同時過彎，玩落就更真實，更有賽車快感。當中更設置咗個五連髮夾彎，俾你連續玩飄移，無論比賽定一個人練車都相當刺激。
▲負責人 嘉豪 表示元朗主要都係食嘢多，想提供一個好玩的地方令元朗更多元化。
▲ 元朗對市區的人嚟講可能好偏僻，不過我地坐西鐵去朗屏站轉 K68 接駁巴士就到，都唔算太難複雜。
▲ 車場面積有成 4個籃球場咁大，而且有個 5連的髮夾彎俾你飄移過夠。 嘉豪表示賽道每兩個月會轉一次，比客人有大 D 新鮮感。
▲ 賽道主要由車軚砌成，嘉豪表示係喺四周收集番嚟，主要想環保，循環再用。
▲ 雖然 walk-in 就可以試車，不過嘉豪話星期六、日同平日夜晚放工後都比較多人，如果十人或以上建議先預約。
▲ 5歲以上的小朋友都可以玩架！
小朋友都可以揸「大膽車」
呢個試車場同觀塘嗰個一樣揸玩具車。不過 Crazy Cart 可以輕鬆做出飄移效果，所以都相當刺激，只要一手拉住飄移桿，另一隻手將手軑轉向相反方向，兩個後轆就會 360度轉，瞬間飄移入彎。而呢度只提供 Crazy Cart XL 版，車速比較快，但小朋友或者磅數輕的女士就可能較難控制。
▲ Crazy Cart XL 最高負重 240磅，車速比較快，但小朋友或者磅數輕的女士就可能較難控制。
▲ 入彎後，拉起飄移桿，車底就會升高並為後轆解鎖，令後轆可以 360轉向。
▲ 想飄移的時候記得睇清楚個箭咀，因為軚盤圈數細，扭少少軚已經可以 180度，扭太多好易打白鴿轉架！
▲ 如果想拍底自己飄移的英姿，可以加 $60 租隻 Action cam 裝係車旁。
▲ 雖然時速只有 20km/hr ，不過大家都要著齊保護裝備先可以上場架！
依莉詩點評
上次都講過，我本身無乜方向感，玩賽車 Game 已經唔叻，玩飄移真係越級挑戰。我建議初學者頭一兩個圈唔好用支飄移桿住，跑熟條賽道先。 而呢個場我覺得夠晒大，而且用車軚砌成，好有野外的感覺。10分鐘時間話多唔多，話少唔少，係室外嚟講已經玩到出晒汗，所以都係夜晚嚟比較好。
車先生 Mr.Car 有限公司 Crazy Cart
相關影片:
分享到 :
最新影片
