香港地寸金尺土，尤其是蝸居就算掛牆都未必可以擺得落大尺寸電視，加上大家現時都習慣機不離手，外出時用流動裝置個熒幕打機、睇片都叫夠，但當返到屋企繼續用個細小熒幕就未免太細。加上不少人就算外出工作做 Present，都未必所有地方都有 Projector 設備可供使用。
同 iPad Air 2 差唔多重
講到投影機，各位 wire 民都可能會覺得「這種機會不是屬於我的」，首先投影機一般都好大部，屋企要夠大先有足夠距離做投射，又點會適合一般的香港人玩，就算大家真係有足夠的空間，又會覺得投影機只可以在屋企使用，對現時工作咁忙碌的香港人來說，真正可以留在屋企睇戲的時間都不多。如果有一部投影機重量同 iPad Air 2 差不多，加上體積細細平時可以拎返工同見客做 Presentation，返屋企就可以用嚟睇戲甚至駁電話/平板電腦打機，甚至帶埋去出 Trip 都仲得，仲有超短投影距離的話，唔知大家又會唔會有興趣呢？
▲Ricoh 這款 PJ WXC1110 流動投影機相當細小，要隨身攜帶都絕對容易，只要放落袋就行得。
▲還附送了便攜袋，將所有電線等配件全部放入去之後，總重量約 1.2kg 未算太重。
40cm 超短投距離
Ricoh 近日就推出了一款超輕便投影機 PJ WXC1110，體積細到同一個銀包差唔多，而重量更只有 450g，同大家平時用開的平板電腦差不多，放落袋拎出街或者放入行李出 Trip 用都咁方便。以往投影機較難打入一般家庭市場，最主要原因是一般需要較遠的投射距離，Ricoh PJ WXC1110 最短投射距離只需 40cm，就已經可以有大約 24” 的影像，只要將投射距離增加至 1 米左右，咁大家就可以享受到 60” 畫面，咁當然 60” 畫面相對來說，最佳觀看距離就要有大概 5 米啦。如果以一般房間床頭與床尾約 2.5米的距離計算，投影機與投影位置之間的最佳距離約 50cm，就可以得到約 32” 畫面，對於睇戲或打機來說已經有不錯的效果。
▲機身頂部設有操控鍵，其中還有指示燈會提醒用家溫度過高需要注意。
▲除了機身頂部的按鍵之外，還附有遙控，就適合坐在梳化或床上進行控制。
▲透過設定大家可以調整亮度、對比度、色溫以及畫面變形自動調整功能。
相關文章:
PENTAX 重投菲林懷抱 今夏推半格直度輕便菲林機
開燈睇畫面都夠光
揀選投影機的時候，除了投影距離之外，另一個要考慮就是亮度和對比度，雖則大部份人使用投影機都會在較暗的環境下，但如果想在家中取代傳統的電視或者熒幕的話，長時間在較暗環境下觀看，雙眼會較易疲勞。PJ WXC1110 投影機不但擁有 600 流明，在同類型產品下屬於較高水平，而且更設有 Bright Mode 可將對比度提升至 40000:1，因此就算在開燈的環境依然可以睇得清畫面，相當適合家庭環境使用。
▲鏡頭擁有 600 流明，更可以透過開啟 Bright Mode 令對比度立即提升至 40000:1。
▲除了有自動對焦功能，還可以透過機身前方的對焦環進行微調。
▲雖然在全黑環境下會有最佳畫面，但就算開燈情況下，都可以睇得清，對於平時在家中看電視會更舒服。
打機睇片乜都得
講真，如果各位 wire 民真打算購買投影機，最好就梗係有幾盡用幾盡，打機又用睇片又用，睇戲來說這款 PJ WXC1110 投影機都叫交足功課，解像度最高有 1280 x 800 pixels，而且仲內置了 Media Center 功能，播片、睇相唔駛駁住電腦，只要插入 SD 記憶卡或者 USB Drive 就可以直接播放相片、音樂同電影，夠哂方便！而且佢仲可以直讀 1080p 高清影片而且效果仲非常流暢，加上高對比同流明，即算唔用投影機專用布幕直接射落白牆都有相當不錯的效果。但要留意如果用來打機的話，流暢度和同步率更加重要，由於這款投影機並未支援 Airplay 或 Miracast 功能，如果要將流動裝置的遊戲畫面投射出來，就需要利用到標準 MHL 線（HDMI – Micro USB）接駁至機背的 HDMI 位置，但要注意流動裝置是否可以支援 MHL。實測試玩賽車 Game Need For Speed，由於是透過 HDMI 線連接，因此十分流暢而且沒有 Delay 問題，操控上完全沒有任何延遲，但由於要駁線關係，或者會有少許不就手的感覺，但整體來說可以接受，因為可以享受比熒幕大數十倍的遊戲體驗。不過由於佢只是內置單喇叭，音量雖算足夠，但就未去到震撼的效果，若果對音質有要求最好就透過機身背面的 3.5mm 接駁外置喇叭了。
▲機身背面有 HDMI 可接駁電腦或利用 MHL 線接駁流動裝置、USB 和 microSD 直接讀取內容。
▲實測試過透過 MHL 接駁電話玩 Need For Speed 這類需要較高操控的遊戲，都依然十分流暢亦沒有延遲。
建議售價： HK$5,880
查詢：Ricoh (2833 1188) 或 Ricoh Hong Kong 總代理
相關文章:
PENTAX 重投菲林懷抱 今夏推半格直度輕便菲林機
分享到 :
最新影片
