還記得去年年底，Acer 就在台灣發佈了一部擁有 17 吋巨大熒幕的 tablet：Aspire Z3，今日這部「巨無霸」平板終於到了香港，究竟用落感覺如何？用來當做大「電視」睇波又得唔得？而家就同大家實試一下！
機身幾重當有 touch mon PC
在講功能之前先講講手感啦。其實 Acer Aspire Z3 講就講係平板，但實際上大家當它是一部擁有觸控熒幕的 AIO PC 好了，因為它的機身十分笨重，雖然唔洗插住電都用到一陣，而且拿住係屋企度四圍走都仲勉強可以，但要拿出街就實在太重了。
▲驟眼睇，Acer Aspire Z3 好似同一部普通 AIO 電腦分別不大。
▲跟機都有鍵盤滑鼠俾大家用。
▲另外 17 吋熒幕都具備觸控功能，可以當作「巨無霸」tablet 咁使用。
▲不過如果要當作 tablet 咁拿住出街就真係無乜可能了，筆者咁樣單手拿住半分鐘唔到都已經手軟。
兩種擺放模式迎合不同需要
Acer Aspire Z3 本身就內建有 17 吋巨大熒幕，以平板來說確實很大了。作為平板，它自然具備觸控功能，雖然跟機都有送一套鍵盤滑鼠組合，但大家想用手指操控手機或以虛鍵鍵盤輸入文字都無問題。此外，它設有兩種擺放模式：分別是直立式或較低角度斜放的模式，前者用來睇波睇片或者駁住鍵盤滑鼠當 PC 用就最適合，而後者就較適合以手指操控時使用，令大家雙手唔洗吊住來用。
▲機背設有一對 kickstand，一打開就可以擺放部機。
▲有兩種模式：一種是比較直立式的擺放方法。
▲呢種模式用來睇波睇片確實一流，而且可以配合鍵盤滑鼠操控電腦。
▲另一種擺放模式會是採用較低角度擺放，如果要用手指操控電腦，呢種擺放模式隻手就唔洗吊住來用。
▲當然，大家想平放在檯面用的話，收起一對 kickstand 就可以了。
睇波睇片效果算 OK
至於熒幕方面，Acer Aspire Z3 本身內建 17 吋熒幕，解像度不算太高，只是 1080p，但對於一般人來說已經夠用。至於材質方面，它採用了 IPS 面板，所以顏色算是比較自然向，可視角度都算高，最少在側面睇熒幕都未見有明顯變暗或者變色的情況，用來睇片或者睇波，一般都夠用了！唔信？大家睇睇下面一段歐洲國家盃比賽片段就知道了。值得一提的是，它內建的喇叭音效只屬一般，而且唔算好夠聲，建議大家在較靜環境下睇波睇片會較好。
▲Acer Aspire Z3 具備 17 吋 1080p 熒幕，用來睇網頁效果都算唔錯。
▲用來睇相睇片，效果都係較自然向，頗為舒服。
▲可視角度都算幾高，從側面睇都唔見有變暗變色情況出現。
▲用來睇波效果都算唔錯，唯一係聲好似唔係好夠大。
效能入門級主力文書
至於效能方面，Acer Aspire Z3 只配備了 Intel Pentium J3710 處理器、4GB RAM、128GB SSD 及 Windows 10 Home 作業系統，此規格雖然未至於像 Atom 機般低，不過用過幾個測試軟件來試此機，結論是用來打機的話，大家都係不要想太多了；不過用來睇下片做下文書工作都一定勝任有餘。
▲當作一部 AIO 電腦來用都算夠用，端子都好齊全：USB、HDMI 輸出等都有齊，就連 microSD 記憶卡讀卡器都內置了，可以用來讀取手機內的檔案。
▲不過它只內建 Intel Pentium 級數的處理器，效能始終不及採用 Core i 級數的機款。
▲採用 Geekbench 3 測試，單核心及多核心測試分別獲得 1,032 分及 3,415 分，算是一般水平。
▲另外，使用《PCMark 8》及《3DMark》測試，分別獲得 1,428 分及 1,288 分，從圖表看比一般 2013 年級數的辦公室電腦效能還要差一點點，可見它的效能只能用於文書處理，用來打機就不要想了。
總結：唔算太貴放廳都唔失禮
整體來講，Acer Aspire Z3 在設計上都幾靚，筆者覺得就算放係廳度當俾屋企人上網用，同時當作家居擺設都唔算失禮。至於效能方面只屬入門級，以 $5,198 這個價位而言，能買到一部設計 OK 兼具備觸控功能的 AIO PC，尚算合理。唔知大家又有冇打算在來緊父親節之前，買番部番屋企孝敬下老豆呢？
售價：$5,198
查詢：Acer（2821 0200）
