辛尼：「呢啲就係設計 ! 大脾用都好穩陣」Lenovo X1 Tablet 初步評測

作者

丫丫
發佈日期

2016-06-15
閱讀時間

6分鐘
字體大小

2-in-1 變形電腦平板唔少廠都出過，之不過唔知各位 wire 民有冇發現一個問題，就係好多呢類電腦在設計上都有一個缺點，就係當放上大脾用果時會左搖右擺，當然一般在室內放係枱上面用就唔會有問題，但如果坐車、機場等上飛機嘅時候用，好多時就會放上大脾用，呢個時候如果部機左郁右郁都幾唔就手。

放上大脾都咁穩陣

Lenovo 新推出嘅 X1 Tablet，最欣賞佢個支撐架設計，採用同其他產品相反的開合設計，因此當打開時就會變為一個平面，而唔係只係得一條邊咁做支撐，就算放上大脾用都依然咁穩陣，完全唔會擔心部機會有跌落地嘅危險。

鍵盤好好打

好多時呢類平板電腦配果個鍵盤為咗做得更薄更輕，按鍵都會較薄，最大缺點會令到按鍵嘅回彈感不足，對小編嚟講就唔多慣。Lenovo X1 Tablet 用嘅鍵盤設計同平時 Notebook 上面用嘅差唔多，按壓感較強，而且按鍵亦明顯覺得較「實淨」，唔會有「想爛想爛」嘅感覺。至於鍵盤同部平板中間都係採用磁力吸實，同好多近期 2-in-1 產品一樣，只要將個鍵盤較為接近就會自動對位吸實夠晒方便之餘又唔洗驚個鍵盤會甩出嚟。

加舊電用足 15 個鐘

可以當平板又可以當手提電腦用，其實將部機放落袋隨身攜帶就最啱，部機嘅續航力就變得較重要，如果唔係要帶埋個充電器就會降低便攜性。X1 Tablet 基本上都已經可以用到 10 個鐘，基本上應付工作要足用一日都絕對足夠，但如果各位 wire 民諗住搭長途機睇片或者只喺出個短 Trip 用嘅話，就可以選配多一舊電池（生產力模組），除咗可以額外用多 5 個鐘之外，電池本身都有額外嘅擴充介面，當中包括一個 HDMI、USB 同埋可以接駁 OneLink+ 擴充座嘅介面，當裝上電池之後，成部機當然會重咗，但當接駁鍵盤之後，由於機身較高令到鍵盤的傾斜角度可以更大，其實對於打字來說會更舒服。

返工返學都夠用

揀得 2-in-1 機嘅用家點都會拆低個鍵盤當平板用，但好多時部機用得耐就會好熱，X1 Tablet 為咗令部機用落無咁熱，處理器就揀咗 Intel Core M 系列，講真要效能就未必會揀 2-in-1 機，但試過就算 Core M3 版用落都好順暢，睇片都唔會窒下窒下。加上仲有埋 Stylus Pen，加埋 WRITEit 軟件可以喺任何要輸入字嘅地方直接手寫就得，打網址覆 Email 甚至學生哥用嚟 Jog Notes 都咁方便。

有齊各種升級配件

講到擴充功能，好多廠商都未必會為 2-in-1 平台設計好多產品，Lenovo 今次除咗可增加續航力嘅電池之外，其實 OneLink+ 擴充底座甚至連投映機都一樣有。當中投映機同電池一樣直接駁落平板使用，只要 2 米就可以有 60” 畫面，係屋企得閒無嘢做玩下投映睇戲都唔錯。至於 OneLink+ 擴充座，最大賣點就係可以等大家駁多 2 個 Mon 同埋有 LAN 用，對於上班一族返工就駁部 X1 Tablet，放工只要拎走部機就可以收工。