夏天黎到，唔少人都趁住假期去沙灘玩水曬太陽。但係近幾個星期，就有唔少市民發現大嶼山及港島南面的沙灘先後湧入大量塑膠垃圾，有一啲守護海洋的組織，如海洋守護者協會（Sea Shepherd Hong Kong）、海洋恢復聯盟（Ocean Recovery Alliance）等，就已經開始「做嘢」，希望引起大眾的關注，更有團體已經去信環境局局長黃錦星投訴污染狀況，不過仍未得到政府回應。
港女最近就發現左由兩個澳洲人－Andrew Turton 及 Pete Ceglinski 於半年前成功研發的智能海洋垃圾收集筒。Andrew 本身係造船的，亦經常出海，佢發現無論去到邊度，都總係逃不出垃圾的手指罅；而拍檔 Pete 就好鍾意衝浪，亦係一個工業產品設計師。佢地兩個喺西班牙開展「The Seabin Project」，用左 4 年時間，製作一個可以自動收集海洋污染物的收集筒，包括清理油污。
呢個收集筒設計於船塢、小港口，及一些有固定設施的海岸使用，可以清走一啲因為潮脹、海浪、風吹等而積聚的飄浮垃圾。同時亦因為收集筒需要接駁水泵製造吸力，將垃圾吸進筒內，所以岸上要有固定的位置。水泵同時可以將水吸進過濾層，所以飄浮垃圾就會自己流進筒內，水泵亦有助處理油污、洗潔精等液體污染物。雖然呢個收集筒未必適合用喺今次香港遇到的情況（因為實在有太多垃圾），不過的確可以幫到手收走垃圾。
不過無論呢啲工具幾高科技都好，始終都係治標唔治本，如果我地一日唔減少製造垃圾以及好好處理垃圾，點清都係無用架。其他國家的污染飄到過黎，其實我地係控制唔到，尤其當涉及空氣、水資源、海洋等自然環境，但喺我地用自己的資源幫人地清垃圾的時候，我地都要檢討下自己係咪己經做得好做得夠。
求人不如求己，我地應該由自己開始，實行減廢，膠少陣。反正而家有親咩事都係「自己香港自己救」架喇（灰），港女喺度呼籲大家如果見到垃圾積聚的情況，千祈唔好猶疑，大家一齊幫幫手，合力清潔，等大家都有一個乾淨舒適的環境，享受夏天去沙灘玩樂的時光。
相關文章:
中電助有需要家庭換變頻冷氣 合資格家庭最多可換 2 部冷氣 英國關閉最後一間燃煤發電廠 結束一個半世紀燃煤發電 2024 年夏天為有記錄以來最熱 炎熱氣溫導致健康隱患
分享到 :
最新影片
