之前我們都報導過 Apple Pay 今日已正式在香港推出，如何登記及使用亦已教了大家，可能大家會問：為何我不用八達通或者直接拿信用卡俾錢，而要用 Apple Pay？Apple Pay 真正用落又係咪好好用？而家就讓筆者去可以用到 Apple Pay 的 3 間店舖：麥當勞、萬寧及 Apple Store 為大家試試。
第一站：IFC 麥當勞
測試前當然要先醫下肚！第一站我們先來到位於 IFC 的老麥。筆者手持的是 iPhone 6s，並已預先登記了信用卡在 Wallet APP 內。究竟是否真係可以買到？而家就用 iPhone 入面的 Apple Pay 功能同大家實試一下！
▲大家可以見到老麥的收銀機已經貼著「現已接受 Apple Pay」的標誌了。
▲首先揀好用邊張信用卡俾錢先。
▲然後點餐，唔係好肚餓，都係叫住杯細可樂解解渴先。
▲跟住拿住部 iPhone 移近 POS，就會顯示出要大家用指紋辨證的畫面。
▲將手指放在 Touch ID 上，很快就出現 Done 字樣，過程大約 1 至 2 秒左右。
▲完成！之後大家會收到一個 notification 代表交易成功。
▲回到 Wallet APP 一睇，可以在信用卡下面見到最近一次的交易，證實是成功的！
▲筆者再用八達通同樣在老麥試買同一件物件，付款速度自然是比 Apple Pay 快一點，基本上是即時扣數。不過這是由於 Apple Pay 需要讓 POS 向銀行拿授權才能成功付款，所以慢 2 秒左右，是十分合理的。
▲另外，大家可以從上圖看到，右方是用 Apple Pay 付款的收據，它與一般用 VISA PayWave / MasterCard PayPass 的收據是一樣的；反而用八達通付款（左），會有八達通卡的號碼。
第二站：IFC 萬寧
好了，醫飽肚，可以去 shopping 了！首先先去萬寧買少少嘢食啦，而今次筆者就試下用 Apple Watch 進行 Apple Pay 付款，又睇下有冇 iPhone 咁方便？
▲首先見到萬寧內，付款的 POS 位置已寫著「歡迎使用 Apple Pay」的牌，證實可以使用了。
▲這就是用作 Apple Pay 付款的非接觸式感應機，可見它與一般用在 VISA PayWave、MasterCard PayPass 或者銀聯閃付的機是一樣的，只要認證上圖恆生銀行上方的標誌，有此標誌的店舖，就可以用 Apple Pay 了。
▲好啦，買包朱古力先！首先點按兩下 Apple Watch 的右側按鈕，就會出現這個介面（如果你的 Apple Watch 是單獨拿出去使用，就需要先入密碼為手錶解鎖）。然後再選擇好希望用作付款的信用卡。
▲之後熒幕對著 POS 付款機並移近。
▲與一般用非接觸式信用卡一樣，POS 會向銀行拿授權，不用 2 秒就可 Approved，交易成功！
▲成功買到朱古力了！
第三站：IFC Apple Store
去到 shopping 第三站，筆者一於想幫自己隻 Apple Watch 買過條新錶帶，既然在 IFC 自然係去 Apple Store 啦！今次就再用 iPhone 進行 Apple Pay 付款，看看效果又如何？
▲揀了條紅色錶帶，是時候付款了！可見為了 Apple Pay，Apple Store 都換了部全新的 POS 手提付款器，它表面是一部 iPhone，但……
▲背面其實是 NFC 讀取器，可以讀取 Apple Watch 或 iPhone 傳出的 NFC 訊號，用於 Apple Pay 付款。這個付款器同樣可以用於 VISA PayWave / MasterCard PayPass 付款之用。
▲好了，Apple Store 職員先用了該付款器掃描了 Apple Watch 錶帶包裝盒上的條碼。
▲之後，在裝置熒幕會出現產品的銀碼，然後該職員會點按介面右下角的按鍵付款，之後會選擇 Others，就會出現上圖機背熒幕顯示的非接觸式付款標誌。
▲今次筆者就選擇了渣打信用卡，然後將手指放在 Touch ID 並移近該付款器。
▲之後該 POS 就會向銀行拿授權，完成後會顯示「批核已完成」，成功付款！
▲最後就與以往在 Apple Store 購物一樣，輸入自己的姓名及電郵，方便職員將電子收據 send 回給你，shopping 完成！
總結：真係好方便！可惜搭車唔用得……住
試過 Apple Pay，筆者覺得真係好方便，尤其是對於各位使用 iDevices 的 wire 民來講，以後出街真係可以只係帶住 Apple Watch / iPhone 加埋八達通 + 身份證就得，連銀包都唔洗帶就可以去 shopping，真係爽到震！而且所有信用卡本身可以唔洗帶出街，一來唔驚整爛或者被人偷導致大損失，二來唔洗驚信用卡用得耐晶片會壞搞到用唔到，可以等要碌卡買比較貴的物件先拿出街用，真係爽好多。
至於效果方面，筆者覺得與之前用支援非接觸式付款的信用卡差唔多，都係 4 至 6 秒可以完成整個付款過程，真係好方便。不過大家要留意，各間銀行的非接觸式付款的金額上限都唔同，一般來講都係用來購買 1,000 元或以下金額的物品才用得到，如果超過此額，可能要另外向銀行拿認證，又或者要大家用回一般實體信用卡，所以 Apple Pay 一般來講，都係比較適合購買金額較少的物件，又或者兩、三位朋友外出食飯時找數使用。
暫時 Apple Pay 而家在香港可以用到的地方都算幾多，唯一筆者覺得美中不足的，就是乘搭交通工具時未能使用，最多是搭 Uber 時可以用來俾車費而已（需要等 Uber 更新 APP 後才能使用），令大家始終仍未能放棄不帶八達通，只帶電話 / 手錶 + 身份證出街就得。如果未來 Apple Pay 可以用來搭巴士、地鐵或者小巴，咁就真係正到爆了！（神之音：八達通點會肯放過你呀，唉……）
