早幾日 Samsung 發佈了最新的旗艦手機 Galaxy Note 7，最吸引的自然是它內置的虹膜辨識功能。其實這項解鎖功能並非十分新的技術，早在去年 Fujitsu 推出的 Arrows F-04G 已經用上，不過此機去到最近先完全解到鎖，究竟用落係點？而家就等 Edward 同大家介紹下。
虹膜辨識登記易反應快
Fujitsu Arrows F-04G 可以講係全球第一部內建虹膜辨識功能的智能手機，相比 Samsung 的 Galaxy Note 7、甚至採用 Windows 10 手機版 OS 的 Lumia 950 更加早。但早唔代表反應差，一來登記上都好容易，筆者幾乎是一 take 過，大約 3 秒左右就登記完成。至於辨識速度就與幾日前推出的 Note 7 差不多，大約 1 秒左右就可過到解鎖步驟，超級好用。
另外提提大家，不要以為虹膜辨識是使用前置鏡頭作感應，其實是機身前方左上角有一個專門用於虹膜辨識的小鏡頭，加上是採用紅外線辨識技術，所以筆者在比較暗的房間測試都一樣過到，大家就唔洗擔心了。
▲要留意的是，虹膜辨識器的鏡頭是位置左上角，而不是用右上角的前置鏡頭的。
▲在設定中開啟「Lock & Security」，就見到「Register iris」這個登記虹膜的選項，之後選擇室內一個光線較充足的地方，如果有戴眼鏡的最好除下眼鏡。
▲之後再如上圖般放置用手機正面對著自己，就可以輕鬆登記了。
▲至於效果方面，從上面影片大家就可看到解鎖速度十分快，基本上只要雙眼放於兩個圓圈的位置，不用一秒就完成解鎖，真係好快。
▲不過登記虹膜辨識後仍要像指紋辨識一樣，選擇多一個解 lock 方法，有圖案、數字密碼或文字密碼。
機身靚！但少少大部兼機厚影響手感
至於機身設計方面，筆者覺得 F-04G 是靚的，尤其是機背，雖然只是用上塑膠機殼，但加上花紋及藍色機身，真係好型。不過問題是機身都幾厚，成 10.5mm 厚度，令部機雖然只是採用 5.2 吋熒幕，但單手操控都只係勉強做到，對於手細的人來講，真係要拿過上手先決定到入唔入得手。另外，F-04G 亦擁有一貫日系手機都有的防水防塵功能，級數為 IP58，所以所有保護蓋內籠邊位都有膠邊作防水用途。
▲藍色機背雖然只是採用塑膠物料，但加入直紋設計，加上拋光物料，睇落都真係幾型。
▲機頂加入埋銀色塗層，睇落好似少少金屬感，更型。另外，3.5mm 耳機插孔亦是位於機頂。
▲亦設有不少日系手機都有的天線，用於在日本時收睇流動電視。
▲至於機身左側就設有與 dock 接觸的金屬點，打開保護蓋就可以見到 SIM 卡插槽及 Micro USB 插槽。
▲由於 F-04G 支援 IP58 防水防塵功能，所以保護蓋內籠邊位設有防水膠邊以防入水。
▲至於機身右側就設有開關鍵及音量鍵，開關鍵還要是 Tiffany Blue 色，都幾靚。
▲機底右下角亦設有不少日系手機都有的手機繩扣位。
▲由於機身都幾厚，達到 10.5mm，所以雖然熒幕只是 5.2 吋，但單手操控都有少少勉強。
2K 熒幕質素算不錯
F-04G 採用了 5.2 吋 QHD 2K IPS LCD 熒幕，質素方面都幾唔錯，基本上文字顯示都幾銳利，不用放大都睇到細字。此外，顏色方面感覺都幾準確，屬自然向，唯一是側面睇時有少許變暗，但這是 IPS 熒幕的「原罪」，都無計，不過整體而言都令人滿意的。
▲F-04G 採用了 5.2 吋 IPS 熒幕，解像度為 QHD 2K。
▲顯示質素都算幾唔錯，文字顯示銳利而清晰，色彩方面都算自然向，睇落幾舒服。
▲可視角度都算闊，側面睇未見有變色情況，但就會有一點點變暗，但一般使用影響唔算太大。
鏡頭、效能算 OK
至於其他方面的表現，F-04G 都算是中上。鏡頭上它採用了 2,100 萬像素及 Sony IMX230 Exmor RS CMOS 感光元件，亦支援 4K 拍片。質素上筆者試影過幾張，算是不錯，顏色都算自然向，不過如果對著強光拍攝的話，會見到有明顯紫邊情況，放大睇亦見到有油畫化情況，如果大家接受到的話，整體都算 OK 的。
▲採用了 2,100 萬像素鏡頭，亦支援 4G 拍片。
▲色彩方面都算自然向，可反映出現場氣氛。
▲不過如有強光的話會有明顯紫邊情況。
▲另外，如果 100% 放大相片瀏覽的話，會見到油畫化情況都幾明顯。
介面方面，F-04G 採用一貫 Arrows 系列的詳盡設計，要摸上手都要一點時間，幸好設定介面設計得都算簡單。當然，作為日系機，亦內建了大量日本網絡商的預載 APPS，如果未用過日系機的 wire 民，可能要點時間適應了。
▲採用一貫 Arrows 系列手機的介面。
▲內建 Android 5.0.2 作業系統，介面上相比其他手機來講都有少少複雜，要少少時間上手。
▲好彩設定介面採用 12 格設計，都算簡單。
▲另外程式切換介面中，點按左下角一個按鍵就可以所有 APP 關閉。
最後效能方面，由於是去年推出的旗艦機款，很自然地只是採用了 Qualcomm Snapdragon 810 處理器，但都有 3GB RAM、32GB 內置儲存空間及 Adreno 430 圖像處理晶片，用 Geekbench 3 測試，雖然單核心處理效能上只介乎 Motorola Moto X 及 LG Nexus 5 之間，但多核心還算比去年 Motorola 推出的 Nexus 6 高，所以效能上基本都可以應付大部分人的日常需要。
▲規格上，F-04G 採用了 Qualcomm Snapdragon 810 處理器，算是去年的旗艦配置。
▲其他規格包括：3GB RAM 及 32GB 內置儲存空間。
▲以 Geekbench 3 測試，單核心及多核心處理效能分別獲得 693 分及 3,269 分，算是不錯。
總結：虹膜係好用但機價仍偏貴…
整體來講，Fujitsu 這部 Arrows F-04G 都算幾好用，尤其是它的虹膜辨識解鎖功能，可讓大家在 Samsung Galaxy Note 7 未出之前已經體驗到呢種解鎖功能的方便性，確實值得一讚。不過它一來效能已是去年的旗艦級數，與今年的旗艦機比始終有一點距離，而且機身亦偏厚，手大的用家可能才比較合適使用。最麻煩是它的售價仍高達 $5,980，這個價位其實大家等多一會兒，可能補多少少已足夠入手全新的 Note 7 了。如果它的售價可以下調 1K 左右，吸引力應該仍在的。
售價：$5,980
查詢：三禾電氣（2374 0618）
分享到 :
最新影片
