兩個多月前英國舉行脫歐公投，投票結果顯示英國有過半數人民支持脫歐。有人話英國嗰次公投係「世代之爭」，因為當時民調顯示，支持脫歐的大部分都係上年紀的人士，後生的普遍反對脫歐。可惜最後由於後生仔的投票率遠比長者的低，結果就一如長者所願「成功爭取」脫歐。結果出黎之後，有不少報道指後生仔鬧爆脫歐，話老人為年輕人決定了未來，卻又不用承受後果；更有後生仔講話喺社交網絡上見到個個 Friend 都反對脫歐，以為多佢一票唔多，就冇去投票，唔知自己嗰票咁重要。
如果大家有緊貼時事，應該好似港女咁，近日個 Facebook 被立法會選舉的資訊洗晒板，有人被退選，又話 A 候選人出現關公災難，B 候選人被抹黑，C 派同 D 派網上開拖互相攻撃… 花生/資訊不絕於耳。
但大家千萬不要忘記，網民只佔現實生活的很小很小一部分，無論網上講到幾熱血沸騰，好多人（可能包括你父母，你老闆，甚至係你朋友）未必知發生緊咩事。因為社交網絡有一個弊病：佢係大家自製嘅回聲筒，只會不斷強化平時睇開同埋鍾意嘅嘢，如果冇睇開時事，冇食開花生，咁其他人可能一直都唔會有機會接觸到呢類資訊。你可以做嘅當然就係主動 Share 你的見解出黎，或者將資訊直接 Share 俾一啲朋友，等佢地都睇到啦。
同時，為免出現開首提到的「代溝」及「被代表」問題，其實大家可以抽少少時間出黎，離開你部電腦/電話，同屋企人/長輩討論下。其實香港有好多人因為平時冇留意開相關時事而揸唔定主意，未到最後一刻都唔會決定投票意向。如果呢個時候，你俾個提議佢，同佢講下貼身的社會議題，好可能就拉到一票架喇。
而如果你有長輩住喺護老院，就千祈要睇實佢啲身份證。行動方便的話，最好就梗係你親自去陪佢投票；唔方便的就要收好啲身份證，唔好俾人有機可乘吖嘛。公公婆婆上咗年紀，其實講到尾都係想啲後生嘅關心下，藉呢個機會去同佢地飲下茶傾下偈，享天倫之樂都幾好吖。
作為一個公民，無論個社會有幾不堪，如果已經登記成為選民，都有義務去投票，一人兩票，選出你心目中的代議士。星期日就係立法會選舉投票日，計埋今日，我地仲有 3 日時間為心水候選人拉票，你的一票好重要，大家加油呀！
Btw，順帶一提，前往投票的時候，票站內係 唔 可 以 使用電話及影相，更加唔好 post 你張選票出黎啦，唔好為咗呃 Like 以身試法喔。
分享到 :
最新影片
