唔少人去日本遊行都會到杯麵博物館 DIY 番個合味道杯麵做手信，令人既羨慕又妒忌。依家去機場唔單止可以整到，仲有得玩全球第一個「出前一丁工作坊」。今日我依莉詩就去咗學習由麵粉開始 DIY 屬於自己嘅出前一丁。原本一個幾分鐘就煮好嘅麵，製作過程原來一啲都唔簡單架！
由麵粉開始 DIY 出前一丁
常餐轉出前一丁要加 $2，自己整反而要 $50，點計都好似唔多啱數。原來工作坊並唔係教你點煮，而係由搓麵粉開始，到切麵、炸麵、包裝，逐個步驟都係人手製。得到嘅唔止係一包屬於自己嘅麵咁簡單，90分鐘嘅製作過程由多位工作人員細心指導，過程相當互動，真係人工錢都係番到！
▲ 一開始每個參加者都需要著圍裙同戴上頭巾，每張枱都有塊大鏡俾你整理，相當貼心。如果都仲係戴唔掂，職員會幫你戴添啊！而頭巾最後仲可以帶走添！
▲ 之後就係用油精消毒雙手。女士們要注意，衛生嘅關係唔可以塗指甲油，所以我都只好忍痛拆晒啲 Gel甲。
▲ 眼前嘅麵粉同鹼水好快就會成為傳說中嘅出前一丁啦！
▲ 將麵粉倒進盆內，再撥出一個小孔，倒入鹼水，並用迅速攪拌同壓麵，製成麵團。
▲ 之後就用麵棍從上而下按壓麵團，壓至麵團可放入製麵機入口。
▲ 一舊原本手掌咁大嘅麵糰，經過製麵機反覆十幾次嘅壓製，最後變到好長好長呢！
▲ 切麵可以話係最好玩嘅時候，望住啲麵由負離子咁直變成攣毛真係好搞笑。
▲ 手製嘅麵當然無工廠整咁整齊，不過啲波浪都好靚架！
▲ 之後工作人員就會幫你拎啲麵去蒸，呢個時候就需要裝飾下個包裝。
▲ 無乜畫畫天份嘅我都係抄下人啲畫好了！
▲ 蒸好後，工作人員會將麵對折，再將麵餅放入炸架，用約 150 度嘅油進行「瞬間熱油乾燥法」。
▲ 滾油跳得好活躍呢！
▲ 最後由工作人員用機器將麵袋封實，自己嘅出前一丁就完成啦！
自己揀味合味道
除咗出前一丁，呢度仲有每年係商場搞都好受歡迎嘅合味道杯麵工作坊，$30 就可以從杯身包裝設計，到選擇湯底與配料，製作一個獨一無二嘅原創杯麵。
▲ DIY 杯麵同之前係商場玩嘅差唔多，事前用酒精消毒雙手，再揀一個杯。
▲ 係杯身上用專用繪畫筆設計杯身。
▲ 再係 4 種湯底同 12 款配料中，揀 1 款湯底同 4 款配料。芝士係呢度獨家，一定要試下啊！
▲ 之後就要將杯拎入「工廠」製作，每個步驟工作人員都會隔住玻璃同你講解。
▲ 工作人員會按你要嘅材料放入杯麵。
▲ 牛肉、豬肉、雞肉加芝士，真係夠晒份量！
▲ 最後透過壓力同熱力密封麵杯，並為麵杯套上收縮膜，用熱力緊緊封口。
▲ 我嘅 DIY 杯麵出爐啦！
▲ 另外仲可以將麵杯放入充氣袋，當手袋孭走添！
依莉詩：「上機前必玩一次！」
$50 有得學整出前一丁幾抵，玩完又有得拎走，係唔錯嘅好去處。不過工作坊係機場又遠咗啲，我諗都係上機之前，預早啲去玩比較好！
相關影片:
日期：2016年 11月 30日起
地址：香港國際機場二號客運大樓童夢城通識學園
報名詳情：網上或現場報名
分享到 :
最新影片
