之前都為大家介紹過 Nintendo 最新推出的 Switch 遊戲機如何進行開機設定及主介面操控介紹，筆者亦終於有點時間上手用一用、玩一玩這部老任最新推出的遊戲機。究竟玩落如何？機身重唔重？點樣係幾個模式之間轉換？尿袋又差唔差到電？而家就等 Edward 一一為大家講解啦。
相關影片:
Switchの初體驗 三少女實試三個玩法
機身不算重但幾長
首先講講機身啦，Nintendo Switch 本機簡單點說就是一部左右兩側有槽位的 6.2 吋輕觸控熒幕平板，而左右兩側槽位就是方便大家插入一對 Joy-Con 手制，方便遊玩時操控。重量方面，即使插入一對 Joy-Con 手制，但都不算太重（官方表示裝上一對 Joy-Con 手制重量也只是 398g），拿出街玩都唔會太重負擔。不過加入一對手制後，會令本身已有點長的機身更「橫」，帶出街玩的時候沒有其他手提遊戲機（例如：PS Vita、3DS 等）方便。另外，當大家以一對 Joy-Con 手制玩時，要同時操控輕觸式熒幕，亦因為機身十分「橫」，所以會比較麻煩。但事實上，以 Joy-Con 上的按鍵，已可操控絕大部分的功能（除非大家輸入文字時不想用遊標慢慢揀），所以這缺點亦不是太大問題。
▲即使裝埋對 Joy-Con 手制，其實 Switch 機身都唔算重，阿 Gi 作為女仔都覺得帶出街玩無問題。
▲用電子磅量一量，Switch 主機本身重量為 299g。
▲至於一對 Joy-Con 手制合起來剛剛好 100g，即係一邊都係 50g 左右。
▲加起來的話，度得 401g 重量，雖然比官方聲稱的 398g 重一點點，但這也算是可以帶得出街玩的重量。
▲不過 Switch 裝上 Joy-Con 手制後機身確實有點長，與 iPhone 7 Plus 比較一下大家就知道有幾長了。
▲所以拿出街玩其實都有少少麻煩。
尿袋都差到電！會否出多過入仍需時間驗證
既然 Switch 可以帶出街玩，相信各位 wire 民肯定有兩個問題會問：可以玩到幾耐？又可唔可以用尿袋差電？先講前者吧，官方表示可以達到 2.5 至 6.5 小時，但會因應遊戲而定，例如：玩《薩爾達傳說 荒野之息》的話，就可以連續玩 3 小時。但即使官方的消息準確，都有另一問題：呢個遊玩時間好似都唔太夠吧，尤其是如果搭長途飛機時玩，又或者一班朋友出街係老麥玩，就真係唔太夠。筆者亦試過用外置差電器（俗稱：尿袋）為 Switch 差電時可行的！接駁後，左上角會顯示現時電量 %，亦會顯示「Charging（差電中）」，代表差電成功！不過官方表示 Switch 的電壓為 5V 1.5A / 15V 2.6A，究竟如果不用原裝差電火牛而是用尿袋為 Switch 差電，會否出現「出大過入」，令 Switch 電量永遠差唔滿？呢個就真係要多少少時間先至試得真了。
▲究竟用尿袋幫唔幫到 Switch 差電呢？
▲證實係得嘅！差電時左上角會出現差電中的提示，而電池圖示會轉為綠色。
相關影片:
Switch機能評測 出街可用尿袋充電？
相關文章:
Nintendo Music 串流平台登場 月費 31 蚊任聽經典遊戲配樂 大型遊戲生活館 Assemble 即將開幕 結集大量 Switch 遊戲和人氣週邊商品 Pokémon 開發商逾 1 TB 資料外洩 多款 Pokémon 遊戲提早曝光
三種模式切換超簡單
Switch 的另一特別，就是它可讓玩家以 3 種不同的模式打機，分別為：TV 模式、桌上模式及手提模式，這種設計令 Switch 既可是一部家用遊戲機，亦可以是手提遊戲機，彈性超大！另外，筆者發現切換不同模式玩十分容易，以下就為大家介紹一下點樣切換啦。
TV 模式
Step 01
首先，要確保底座已連接原廠 USB Type-C 火牛，以及用 HDMI 線連接了電視。
Step 02
在 Switch 上拆出一對 Joy-Con 手制，至於是否需要將手制插入手制支架中就隨大家喜歡了，筆者就覺得咁做會玩得比較舒服。
Step 03
至於剩下的 Switch 平板部分（即是主機），就將它熒幕向前插入機座。
Step 04
一插入去，畫面就會飛去電視，咁就成功切換至 TV 模式了！
桌上模式
Step 01
要以桌上模式玩？只需要從底座拿出 Switch 平板部分（即是主機），之後拉出機背的 kick stand，之後就可以將主機穩放在桌面了。
Step 02
之後拿住一對 Joy-Con 手制，就可以用桌上模式玩架啦！另外，有些支援雙打或多人遊玩的遊戲，亦可以每人拿住一邊 Joy-Con 對打添！
手提模式
Step 01
至於手提模式亦好容易轉換到，只要將一對 Joy-Con 手制插回 Switch 平板部分（即是主機）。
Step 02
之後同時按下兩邊 Joy-Con 的 L 及 R 鍵，令 Joy-Con 手制與主機完成接駁，再按一下 A 鍵，就可以用手提模式玩了，超簡單！
電視畫面更華麗！最高 1080p
至於畫面方面，筆者其實都有點掙扎是否要講呢一點：畢竟 Nintendo Switch 的遊戲畫面，與現時其他家用遊戲機比較（例如：PS4 Pro、XBox One S），肯定是輸成條街！不過嘛，有玩開老任遊戲機的 wire 民都應該深深明白：玩老任遊戲機，絕對不會以畫質衡量，而是看遊戲的可玩度。以今日買到的其中兩隻遊戲《俄羅斯方塊》及《薩爾達傳說 荒野之息》比較，可玩度其實都幾高，尤其是後者，相信各位 Link 的愛好者應該都「很想要吧」？值得留意的是，之前都有提及過 Switch 的熒幕只是 720p 解像度，但設定中如果用手提或桌上模式玩，最高似乎只可以去到 480p；但只要與電視接駁進入 TV Mode，就可以最高去到 1080p 解像度，畫面華麗及細緻程度大大提升！筆者亦拿來《薩爾達傳說 荒野之息》試過在手提模式及 TV 模式上的畫面分別，發覺在電視上玩畫質確實好好多，當筆者放大相片 100% 來睇，就見到在平板熒幕上的一間間在電視上沒有了，而且細緻度高了很多，大家看看下圖遊戲中的草就知道了。
▲在 Switch 熒幕上玩《薩爾達傳說 荒野之息》的畫面效果。
▲使用 TV 模式在電視上玩《薩爾達傳說 荒野之息》的畫面效果。
▲100% 放大兩個不同模式的熒幕顯示來睇，可以見到第二張的 TV 模式，畫面細緻度確實比第一張的手提模式上的顯示好好多。
機身玩一陣都唔熱
另外，對於有不少 wire 民來講，可能都會擔心 Switch 如果玩得耐，會唔會機身發熱？筆者由於測試時間有限，所以就未能超長時間試玩，不過都以手提模式玩了《薩爾達傳說 荒野之息》15 分鐘左右，之後再用測溫槍量度機背各部分的溫度，從下面的結果大家就可見到，最熱的部分為機身右邊的機背位置，但也只是 31.4 度；而一對 Joy-Con 手制的位置，左右更分別只是 26.8 度及 28.8 度，可以說是十分「冷靜」。所以大家就不用太擔心玩得太耐機身會變暖手蛋了。
▲究竟 Switch 會唔會玩得耐機身發熱呢？
▲主機機背中間位置，在玩 15 分鐘後度得 28.9 度，完全不熱。
▲至於主機機背左、右兩部分，也差不多：左邊為 29 度，右邊位 31.4 度，雖然係熱少少，但肯定唔覺辣手，亦與暖手蛋的效果有極大距離。
▲至於一對 Joy-Con 手制，左右兩邊分別也只是 26.8 度及 28.8 度，同樣不熱。
相簿無得睇相睇片功能太單一
去到最後，相信大家都有個疑問：Switch 係咪只可以用來打機呢？畢竟內置了有個相簿功能，用來睇相同影片又得唔得？筆者就將相片及影片放入 microSD 記憶卡並放入 Switch 內，試試可否在 Switch 上欣賞，當打開相簿後，就發現全部都只是之前在 Switch 內擷取的熒幕截圖，可見它的相簿功能確實很單一，如果大家想用 Switch 做遊戲機以外的功能？暫時似乎就未做到了。
相關文章:
Nintendo Music 串流平台登場 月費 31 蚊任聽經典遊戲配樂 大型遊戲生活館 Assemble 即將開幕 結集大量 Switch 遊戲和人氣週邊商品 Pokémon 開發商逾 1 TB 資料外洩 多款 Pokémon 遊戲提早曝光
unwire 記者們又點睇？
試玩完 Nintendo Switch，各位記者們又點睇呢？而家就等 Edward 問問他們啦。
阿 Gi
感覺很新鮮，試玩過《薩爾達傳說 荒野之息》畫面好卡通化，感覺都真係幾靚。整體來講部機幾好玩，值得一玩。
評分：4 / 5 分（5 分為最高）
娜姐
試玩過《俄羅斯方塊》，感覺都幾好玩，畫面幾靚。不過唔太喜歡部機太「橫」，玩落有種「唔知點咁」的感覺。最鍾意都係駁住電視玩，比用桌上模式兩個人睇住 6.2 吋咁細熒幕玩爽好多。
評分：3.5 / 5 分（5 分為最高）
PKC
對上一次玩老任遊戲機已經係十幾年前，可能男仔都係比較喜歡畫質較華麗的遊戲機，玩過 Switch 之後覺得都係一般般。但好欣賞 Switch 可以既係家用機又係手提機的設計，畢竟而家都好少機會可以坐定定對住部電視打機，可以同一隻遊戲又用手提 mode 玩，有需要又可以駁番電視，又可以放係檯面同朋友係街度對打，真係幾過癮。
評分：3.5 / 5 分（5 分為最高）
Edward
試玩了一段時間，真係好 like Switch 的設計。之前最近似的設計，已經係 PS4 x PS Vita 的做法，但如果要兩部機玩埋同一款遊戲同一個進度，首先要隻遊戲在兩個平台都有 game 出，其次就是要高價買哂兩隻 games 番來，之後仲要用雲端儲存過資料，整體都幾麻煩。Switch 一部機可以變身家用機又可以做手提機，而且買一隻遊戲可以玩哂幾種 mode 的做法，真係好欣賞！但而家已推出的遊戲畢竟不多，所以評分會低少少。如果未來可以推出多點運動遊戲，例如：Winning Eleven，咁就可以重溫細個 6、7 個朋友一齊踢波的開心回憶了。
評分：4 / 5 分（5 分為最高）
天恩：
其實有幸早陣子在日本上過手，當時感覺是有點重。令我回想以前帶著 PSP 1000 打 MH ，Ridge Racer 的年代，手會打到有點酸。PSP 1000 的重量是 280g 還要比這台 switch 輕上一點呢！直到換了重量大減至 189g 的 PSP 3000 手酸才得到改善。 Switch 機不太適合地獄型長打，再者機身非常長，令兩手臂有點張得太開，超越了最舒適的角度。在手提機的人體工學上，我給予它的分數不高。
生於香港其實手機及社交資訊已經霸佔了很多人大半天的時間，以往公共交通工具玩手提遊機的人買少見少，大多都是玩手機遊戲。任天堂遊戲大多是趣味重、易入口，很容易吸引一家大細玩，這定位在手機遊戲的年代顯得兩邊不到岸。它的方便性不如手機，對女性來說，威力更比細細台 NDS 摺機 + 任天狗的殺傷力低 。是沒錯 NDS 在香港有過輝煌的年代，但隨著手機性能提升，連大廠都投入手機遊戲時，不可以再跟以往作比較了。
我覺得任天堂很著重跟朋友在現場一起玩的感覺，如果你本身是一位 online game 或個人機迷，switch 實在很難去吸引到你要特地帶一台又大又重的東西出街，在家中亦已有畫質看高十線的 PS4 及 Xbox One 。
估計它會跟 Wii 一樣，初頭讓人覺得很新鮮，但當家中的 Party 散去又會被打入冷官。Switch 也是用來招呼朋友一起歡樂的佳品，定位目標沒改變只是可以街外家中兩用，隨時分享給朋友雙打而已。
在滿身 Gadget 的年代，要說服人每天多帶一件電子產品上身比以往難得多。我心目中的手提遊戲機，應該是 PS Vita 的設計但可以直接執行 PS4 遊戲的機種，這才是真正家中及街外二合一的體驗，而不是回到過去的質素體臉。有時經典還經典，當你眼睛習慣了好東西，玩回原始畫質感覺總有點失望。
其實打了一大段字，可以用簡單一句來總結：「我是毒 L 沒朋友也不是任天堂迷，Switch 不合我」
評分：3/ 5 分（5 分為最高）
總結：老任遊戲機睇畫質傻的嗎？
總括而言，任天堂今次推出 Switch 這部定位同時可以是家用亦可以是手提遊戲機的裝置，確實很聰明！當然，很多人一直會覺得：嘩，今時今日咁嘅畫質？點鬥呀？但大家又記唔記得，當年 NDS 畫質同樣不及其他手提遊戲機，但一樣賣到成行成市？確實任天堂的遊戲機，一直以來都不是最著重畫質，他們更睇重的是遊戲性，所以在他們主機推出的遊戲，唔少都好好玩，這對於著重遊戲性、內容，而不是最著重視覺效果的玩家來講，確實是市場上的最佳選擇。當然，Switch 在畫質上相比以往的 NDS、3DS 等，肯定已經是大幅提升了極多，大家看罷《薩爾達傳說 荒野之息》的遊戲畫面，相信都會認同筆者所言。亦有些讀者會覺得：一部機只是用來打機，不能做其他多媒體功能，似乎競爭力不足吧？但正如筆者前文所言，任天堂的遊戲機就是著重玩遊戲，其他的多媒體功能，筆者相信任天堂絕對有能力加進去，但如果效果不及其他品牌的遊戲機，倒不如專心做好「玩遊戲」這部分，似乎更加實際吧？
有何改善空間?
但 Switch 是否完美，完全沒有改善空間？當然有！最大問題就是它不支援藍牙耳機，令大家在車上玩時，一定要靠有線耳機，確實有點麻煩。但其他的東西，筆者都覺得很滿意了。另外提提大家，畢竟 Switch 擁有大達 6.2 吋的熒幕，如果大家要拿出街玩，「意外永遠是意料之外」，萬一跌在硬地就 GG 了，所以一定要買番塊玻璃貼保護熒幕，最少跌落地都唔係熒幕本身先爛吧。另外，相信唔少 wire 民都仍然會玩遊戲卡而非日後從 eShop 內買遊戲，所以像以往 NDS 一樣，為自己買個可以放入多張遊戲卡及機身的保護套，亦是十分實際吧？
相關影片:
Deer率先試玩 任天堂Switch玩後感！
相關文章:
Nintendo Music 串流平台登場 月費 31 蚊任聽經典遊戲配樂 大型遊戲生活館 Assemble 即將開幕 結集大量 Switch 遊戲和人氣週邊商品 Pokémon 開發商逾 1 TB 資料外洩 多款 Pokémon 遊戲提早曝光
分享到 :
最新影片
