港女科技一週:Maker Faire Hong Kong 廢物即場自製玩具

讚好此文:

四月 13, 2017 •數碼港女週記, 獨立評論

上周末,港女誤打誤撞去咗理大個 Maker Faire,見到好多小朋友即席由無到有自製「玩具」,真係好想玩埋一份!

其實港女早幾年已經有聽過 Maker Faire 創客活動㗎喇,佢地由最初嘅 Mini Faire 開始做到愈來愈大,今屆就用晒成個 PolyU 嘅 Campus 舉行,唔講真係唔知原來咁大型同熱鬧。Maker Faire 有好多活動,例如有展覽、工作坊、比賽、遊戲等等,可以俾參加者體驗一下「get your hands dirty」落手落腳 DIY 嘅感覺。

港女當日喺現場見到好多小學生,部分係學校帶,部分係家長帶,全部都玩得好投入好開心,佢地仲有好多機會試做唔同手工、木工、電工,例如其中有一個焊接工作室,小朋友有機會親手試做焊接;另外一邊有幾條跑道,小朋友首先要利用唔同物料製作小木頭車,然後攞住製成品去跑道試行,個個都好興奮雀躍。

▲ 最正其實係啲家長唔俾喺隔離幫手,睇完哥哥姐姐示範之後,小朋友可以一手一腳自己做,係咪睇見都想試下?

▲你地睇下小朋友啲表情,好奇心發自內心流露出嚟,港女企喺一邊睇都覺得好玩。

啱中學生玩嘅活動都有唔少㗎,例如四驅車比賽,個個都有一箱工具改良自己架車,港女以為自己睇緊卡通片;另一邊嘅航拍機障礙賽都好刺激。適合大人玩嘅活動就冇咁多,當日港女想試玩接駁電纜㗎,但因為需時頗長,要成一個鐘,咁啱要趕住走,搞到我與它無緣,下次有機會我一定會再挑戰。

▲個個都好認真咁睇同玩,有一秒港女真係覺得動畫/漫畫成真。

▲隆重介紹:駁。電。纜。電纜平時埋喺地底不見天日,而家佢俾齊工具你跟師傅學嘢,將斷開的電纜接返埋。平時邊有咁多呢啲機會呀!

其實港女自細就好鍾意做呢啲手作嘢,諗返以前細個嗰陣,會利用屋企嘅「垃圾」,例如廢紙、布碎等,同阿妹一齊製成玩具自娛。但港女自從上咗中學,因為要專注讀書就冇玩嚕,真係浪費晒我嘅想像力!等我搵日拉埋阿妹一齊懷緬下過去,同佢重拾童年時光,一齊整下玩具玩先!

▲認真,港女細個真係冇咁多呢類型活動,最多咪去下科學館。唔知係咪我童心未泯,我真係覺得呢啲活動好好玩,可唔可以俾我落手做一次?

 • 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags: , ,

讚好此文:


Comments are closed.

unwire TV



更多同類文章:

最新文章