唔知大家有冇玩開網上遊戲呢？我自己就好少玩嘅，但係近排見到有人 share 啲 cap 圖出黎，幅圖入面有好多個唔同顏色唔同大細的圓形係度，我仲以為係小畫家，睇真啲原來上面有個網址，咁我就手多多咁 search 下睇下究竟係咩黎啦。
第一個 result 就係高登 post，㩒入去睇下，睇唔明… 於是唯有自己上去試下有咩咁好玩。
其實個遊戲非常簡單直接，就係弱肉強食的世界，食得越多就越大舊，越大舊就越容易食到野，富者越富，就係咁。除左食野，仲有兩粒制：w 同埋 space。㩒 w，就可以分裂啲仔出黎，你可以自己食返，亦可以請人食；㩒 Space，你就將自己分裂成幾舊，方便你用圍攻的方式食人地。
▲入到個網度，你只需要輸入名稱，再揀埋 server（以地區劃分），就可以開始玩
▲右上角有個 Leaderboard，話俾你知最大粒個頭 10 位
呢個遊戲本來就係咁簡單，冇其他規矩。
但係後來，我發現左一啲好得意嘅野，而係同你改個名有密切關係。我第一次玩的時候改左個名，叫「[HK_G] 新手」，好明顯係亂改，我粒菌就隨住箭咀方向移動，見到大粒就避啦，見到細粒就食啦，愈大粒就行得愈慢。
後來我行到過去粒超大菌隔離，個名係有「HKG」係入面，諗住死梗啦，但係！佢竟然冇食我不特止，仲放啲仔出黎俾我，我頓時覺得「人間有愛」，你幾時見有錢人會失驚無神袋錢入你袋丫！除此之外，當有人要退出遊戲個陣，佢仲會將自己過晒落「隊友」度，「犧牲小我完成大我」。
因為好奇，我就去唔同地區的 server 睇下啲人係點玩啦，我發現亞洲國家的人零舍團結。
呢個情況主要發生係 East Asia 同 Oceania 兩個 Servers：
首先，大家都會以名稱組隊，例如 [VOT]、한국 XXX 等等，然後一齊夾攻人地，跟住成個 leaderboard 就變成自己友，好威威咁樣樣。
香港人都會架喎（當然我唔知佢地係咪真香港人），通常會有暗號以茲識別身份，後面會再加創意名稱或者佢地想宣揚的訊息，例如「我要真普選」d friend，上到頭 10 位就會有其他人睇到，都未嘗唔係一個賣廣告的方法 XD
可能因為個遊戲按地區劃分，原本一個超簡單超自由的個人 Game，自我發展出潛規矩，體現「團結就是力量」的大道理。玩左幾次，我開始懷疑呢個 Game 會唔會係一個人性實驗，用黎研究唔同國家的人的民族性…（諗太多 LOL）。
後記：團結就是力量？
當然你可以「單拖」落場玩啦，不過如果你的目標係第一位，有人幫真係好啲架。
