說真的，而家資訊科技咁發達，有部電腦或者電話，download 個 Google Earth，成個地球都可以捐窿捐罅俾你去暈晒，點解都仲要山長水遠搭飛機去實地考察？ 因為去旅行，並不純粹去睇風景，而在於感受當地文化風俗同人情。

^埃及開羅一家「茶館」，El Fishawy，你可以飲薄荷茶飲咖啡飲果汁食水煙跳舞占卜，但不能飲酒，因為伊斯蘭教禁止飲酒。

呢個旅程除左有 Google Map 幫手，其他絕大部分時間都係靠人。係呀，好多人同我講有恐怖分子，有鹹濕佬，有強盜，有騙子，但大家都忽略左呢個世界其實都有好多好人，因為去完一個旅行，你除左會炫耀戰利品送一份簡單的手信俾你朋友，你唔會同人講：「我一去到以色列，第一個同我講野的人微笑著同我講 Welcome to Israel 呀」，但你會同人講：「唉，我係埃及搭的士，個司機話冇散紙唔找返3蚊俾我囉。」你骨子裡唔覺意假設左「人人都喜歡睇人仆街的」，而且總是放大了負面的遭遇。事實上，上面講的兩句都是我係旅途上的真實遭遇，但我會選擇 highlight 前者，因為呢句咁簡單的 Greeting，令我諗多左好多野，例如：我係香港會唔會 Welcome 訪港旅客呢？係文化問題定係我怕醜點解我冇諗過要同人講 Welcome 呢？等等；而後者較少同人講，就算講都會附加說明：人地啲的士司機係靠貼士維生，佢安全送你到目的地冇車你去荒山野嶺打劫已經好好，個 3 蚊豪俾佢。

獨自去旅行，離開 comfort zone，人總會變得比平時敏感，危機感大增，作為一個典型香港人 90 後都市病患者，三不五時就會陰謀論咁諗，到底面前呢個人係咪想呃我錢？佢無啦啦走過黎吹水係有咩目的？總不能夠相信呢個世界會有咁大隻蛤乸隨街跳有人只為同你傾計而傾計，只為幫你而 approach 你，只想你了解他們熱愛的地方而向你熱情介紹。

舉個例，我地係死海的旅館食早餐，食食下有個滿頭白髮，頭戴帽仔（即是猶太教徒）的伯伯自己走埋黎，問我地邊度黎，黎做乜呀，信咩教呀，去過邊度邊度未呀…云云，跟住自我介紹：我同老婆退左休架啦，過黎度下假，我都去過香港喎…跟住仲可以自己打圓場，再走去第二度同其他人傾計。開頭有一刻我以為可能做錯左啲咩（你知宗教國家有好多不成文規矩），所以佢走過黎同我地講野，點知其實只係為左傾計而傾計，成個過程好自然，唔會令人尷尬同不安，傾完個刻我覺得好神奇，點解可以咁 friend。

有一個仲勁，當我同朋友等緊巴士去下一個景點的時候，佢揸架車埋黎，話可以兜我地去個景點的門口，只收 100 蚊，抵過搭巴士又唔到又要行一段路。我同朋友當然猶疑，佢係咪想昆水，定想打劫我地，但見佢 show 晒導遊資格證，又戴住個 Q 嘜牌，又見佢咁熱情，咁就同佢講下價：90 蚊啦，佢話 okok 再講啦，咁我地就膽粗粗上佢架車。上左車之後發現，執．到．寶，原來佢係地理學家＋沙漠愛好者＋植物學家，沿路不斷同我地講解該區的歷史，沙漠的奧秘，仲用沙漠植物做埋實驗，證明沙漠中的植物生命力頑強，一遇水即刻生長。落車時我地俾左 100 蚊佢，諗住學到咁多野，佢唔找就算啦。點知佢主動找返 10 蚊俾我地，仲依依不捨送我地走，教埋我地離開要去邊搭車。你可能覺得我地好天真，找返 10 蚊返黎係天經地義架嘛，但係個刻我地身處異地，佢大可以老作個理由出黎唔找錢，而我地根本冇牙力同人拗，佢找錢係人情。

好多時係外國，尤其係語言不通，只能比手劃腳的時候，你會發現溝通不在於大家說了些什麼，而是大家表達了些什麼來建立互信。去旅行的時候，沿途風景再美，影的相再靚都好，印象最深的始終係人與人之間的真實互動（無論是好是壞），現階段我仲未諗到有咩科技可以取代到呢方面，除非真係有叮噹道隨意門啦。

^耶路撒冷中哭牆附近的一角。不要以為他們全部都很嚴肅，我遇到一位也是這個派別的猶太教徒熱情地打招呼，仲同我地講恭喜發財。

相關文章:

【教學】iPhone 用家必學旅遊小技巧 教你 Spotlight 查詢航班資料、匯率 ＋ 離線地圖功能