iPad新價直擊　最新$5,980有交易

iPad o係先達開賣左兩日，相信大家就俾各大傳媒o既報道轟炸足兩日，o個個 $6,800 o既炒價已經入晒腦。但我又相信大家唔介意我繼續講 iPad，因為佢o既炒價已經開始插水，暫時最平 $5,980 就有交易！

首先大家要注意，其實全先達只有一間手機舖係賣 $6,800，呢個亦係 16GB 版o既最高炒價。但今次 iPad 首批貨 16GB 版o既數量勁多，根本邊間舖頭訂左機，都可以有現貨o係星期一運到番香港賣，所以先達係有勁多舖頭有 iPad 賣，就o係星期一當日，已有舖頭開價 $6,400，甚至係 $6,280。到左今日，仲有舖頭劈到 $5,980，聽班老細講，過多兩日應該可以劈到 $5,680 添！只不過 32GB 同 64GB 版o既貨唔多，賣o既舖頭亦唔多，先至俾人托住個價o係 $7,500 同 $8,400，冇跌過。

其實大家只要親身落先達行一轉，就會見到 iPad 多貨到得人驚，買家唔洗擔心買唔到，反而係 D 舖頭要擔心賣唔去。咁o既形勢，部機又點會炒得耐，睇怕好快就會插落四千幾o既正常價！

查詢：數碼匯（9315 6556）