話說昨晚，突然之間有好多朋友寫住咩食蟲呀，唔記得著 bra 呀，著粉紅色 T-back 呀嘅 status，我都覺得好奇怪，但以為朋友真係做出怪事或者有精神病，又或者 facebook account 俾人 hack 左亂 up 廿四，所以就 like 咗佢 status 然後問佢咩事啦，點知原來呢個喺一個遊戲，你 like 咗或者 comment 咗就中招，要揀番個答案 post 喺自己個 status 度，認真無聊之餘搞到我串哥無名火起，唔打篇文罵爆都真係訓唔著！
濫用朋友關心權
其實，本來呢啲小學雞遊戲，串哥讀書個時已經玩過，咩你要去同個女仔表白，如果個女仔應承左，就代表你贏；如果你俾人請食檸檬，就要罰俾朋友位位一舊！今時今日，中左招，就要自 post 一段無聊對白，遊戲規則就係咁簡單。有啲人會覺得：少年總有輕狂時，「玩下唧，就咩要咁認真」？
老實講，個時玩「追女仔輸左要罰錢或請食飯」呢種遊戲，事後最多都係俾個女仔覺得你利用佢既感情過橋，憎你既最多都係呢個女仔。今時今日，大家都知 facebook 幾咁深入民心，大家既生活已經唔少得呢個平台既存在！當然，facebook 入面有你既舊同學、同事、老闆、客戶、男 / 女朋友，甚至一定不能少既：真心朋友。人咃見到你既古怪 status，如果一個男仔寫住「今日唔記得帶 Bra……」云云，就梗係知你玩嘢；但喺如果寫啲中性啲既，例如：「好似鐘意左佢..點算？」又假如你呢排啱啱甩左拖，又或者「久旱未逢甘露」，朋友見到你呢個 status，自然 like 爆而且想關心下你問下邊個啦！點知你就覆佢下面呢張圖嘅訊息：
喂大佬，佛都有火啦！諗住關心下你，點知你係濫用我嘅關心係度玩我，我罵你幾句以後唔鬼理你已經算便宜左你，我真喺有諗過嚴重到同呢啲人割蓆絕交！
狼來了嘅故事聽過未？
後尾我串哥冷靜落來，諗下點解呢種咁無聊嘅遊戲，點解仲會有人玩落去？最慘既係：有啲人中左招，明知係一個局，都要繼續玩埋身邊其他人？當然，我同身邊一啲朋友了解過，佢地不外乎都係話：「都市人壓力咁大，拿呢啲無傷大雅既嘢來玩下當解下壓唧，認真你就輸鳥！」
哦，明白！原來你係為左解壓而玩我，何必？生活壓力大就可以隨隨便便玩人哋架啦咩？你細個老師無教你《狼來了》個故仔咩？你玩得人多，第日你真喺有事，人哋仲會關心你麼？所以唔係一句「玩下唧」就大哂，你係成年人，唔識批判思考架咩？人哋玩乜，明知喺玩人嘅嘢你都要照做，唉，唔識講！
其實大家出得來社會做嘢，都知道工作只有愈來愈忙，朋友只有愈來愈少。Facebook 上面你 add 嘅人，有幾多個朋友會喺你寫 status 個時都 like like 你？而呢班人入面，又有幾多個只喺「花生友」？有幾多個先喺真心想關心你嘅？呢種 facebook plank，你 post 出來「花生友」自然樂此不疲同你玩落去，但你既「真心」朋友呢？想關心你，點知原來你玩佢既！好呀，咁唔睇重段關係，算囉！
拿，就喺咁啦！你諗住「玩下唧」，撞著個性格認真兼拿個心出來同你做 friend 既老死，一段大好友誼就咁玩完！幾無謂哩……
所以呢，都係個句啦：玩緊既，唔該收手啦，因為呢個真喺一個好無聊兼傷害人嘅遊戲。如果你仲要堅持玩落去？都喺個句：
如果要我串哥貼上面呢堆 status 嘅，交已絕，係咁！
