曾經聽過身邊朋友講：而家嘅隨身產品，好似 smartphone、tablet、laptop 等等，已經唔係一件「工具」咁簡單架啦，而喺潮流嘅象徵！講句老實話，呢句說話係十幾年前小編初初接觸 gadget 嘅年代，實在不敢苟同；但係今時今日，小編唔可以唔講句：產品顏色，對個件產品賣唔賣得，真係有好大關係呢！
隨身產品襯衫襯袋成潮流
仲記得十幾年前，個時出嘅隨身數碼產品，好似 PDA、PDA 手機（當年仲未叫做 smartphone 架）、手提電腦咁，絕大部分唔係黑就係白，而家諗番起都覺得幾悶。但小編一樣可以揀到啱用嘅產品來買，因為個時只係講求實用，外表設計靚唔靚，只係 bonus。不過個時都留意到身邊有啲好「色」嘅同學或者朋友，揀嘅多數都係日系品牌，好似：Fujitsu、Sony 咁。問番佢地點解？佢地嘅答案都係千篇一律：靚呀嘛！
個時，小編就開始懷疑自己嘅諗法：究竟一件產品走出「非黑即白」嘅框框，係咪就可以「突然變型」呢？講老實，呢個問題困擾咗我半年，到後來有個日本女同學同我講，先令我矛塞頓開：「呢啲唔同顏色嘅 gadget，係我哋女仔先會重視架，因為揀啱顏色，襯起衫同埋袋出街用都型啲靚啲呀嘛！你哋啲男仔，唔明架啦。」
個下，我個腦好似突然叮咗一聲：「係播！Gadget 原來都可以用來襯衫架喎！點解我諗唔到嘅呢？」呢種想法，而家當然係自然不過嘅事，但係當年產品「非黑即白」嘅年代，對於小編嘅震撼真係唔細架。後來再慢慢研究「產品顏色學」，先至發現原來唔同顏色嘅產品，唔單止適合唔同身份唔同場合去用，仲可以反映出用家嘅性格。
顏色表現性格
先講身份同場合先啦，大家覺唔覺得好多出去同人傾生意、或者要經常見客嘅人，佢地嘅隨身裝置好多都係黑、白、銀呢三隻顏色？其實呢三隻唔單止係最 common 嘅顏色，亦相對俾到人一種「專業」嘅感覺，當中仲係以黑色為甚。舉個好簡單嘅例子：大家去見投資顧問，又或者去見律師，通常見到佢地拿住嘅手提電腦或者 tablet 都係黑色嘅，大家就會明白架啦！另外，呢三種顏色亦可以俾到人一種「低調」嘅感覺，至少你拿住佢哋見客個時，客人唔會留意你部機多過留意你。當然，係全城都買唔到某啲品牌嘅指定產品，而你又買得到仲要係客面前 show 出來，呢個情況就例外啦！
另外有一樣嘢，小編都係近年先至領悟到。以前，一直以為紅色、青色、紫色產品多數係女仔用，藍色、黃色就多數男仔用，但近年呢個情況都好似轉變咗，例如：早排 Sony Xperia Z 出個時就出咗隻紫色，小編自己都有買番部，因為覺得呢隻紫色好中性，男仔女仔用都可以好型；又例如上個禮拜有水貨舖係韓國引入 Samsung 最新嘅 Galaxy S4 LTE-A，個隻藍色連小編身邊唔少女仔睇過都話靚。
當然，除咗上面嘅元素之外，其實產品顏色都可以某程度上睇得出一個人嘅性格，例如：用黑色機嘅用家，通常都係比較意志堅定、固執同埋自律嘅；而鐘意紅色嘅，因為呢種係一種讓人產生權力同埋控制慾望嘅顏色，所以用嘅人偏向係位高權重嘅人，而且性格比較精力充沛無時停；至於紫色，就俾人一種神秘而浪漫嘅感覺，而且擁有紫色物品的人一般都渴望知識，而且總在努力比現時做得更好；至於白色，我諗大家都會知啦，係一種代表純潔、神聖嘅顏色，而呢種人總係帶住好奇心觀察周圍嘅人，從而溶入身邊嘅人嘅圈子，所以要同佢地相處基本上係無難度嘅。
當然，呢啲都係小編對「顏色學」嘅少許認知，唔一定係啱，不過都可以俾大家作為參考嘅。或許大家可以因應自己鐘意咩色，從而去諗諗自己會唔會係呢一種人？所謂「物似主人形」，雖然唔係百分之一百準確，但間唔中用來了解下自己，都幾好玩架！
分享到 :
最新影片
