無論大家用邊款手機，「冇電」總是每日要面對的嚴重問題，除了帶備「尿袋」或後備電池，去年有廠商已開始嘗試快速充電，正如 Oppo Find 7 等極少數支援得到。不過，HTC 近日在香港發佈 Rapid Charger 2.0 充電火牛，重點是支援 Qualcomm 的 Quick Charge 2.0 技術，究竟佢充電同你屋企隻火牛有咩分別，想知就等小編 同你試一試。（以下有更多資料。）
並非 HTC 獨享，其他手機都用得！
介紹 Rapid Charger 2.0 前，相信讀者對這個賣成 $249 的 USB 火牛存有疑問，都難怪呢個價錢都夠買 USB 拖板，咁點解要為 HTC 手機買個專用火牛呢？首先，小編 要更正大家一點，這個 Rapid Charger 2.0 其實並非 HTC 專用，因為佢採用的技術其實來自 Qualcomm 的 Quick Charge 2.0，意思即係兼容最低條件係 Qualcomm 裝置（並非所有），而根據 Qualcomm 官網資料近年推出的 Snapdragon 200、400 到 805 等都支援（Snapdragon 600 除外），但前提還要睇廠商有冇封印此功能（補充：靠跟來 6 接點 USB 線探測），如果唔太清楚 Qualcomm 官網都有列出兼容名單，但名單主要係貴機為主，同時 HTC 官網本身亦有類似名單。
參考網址 ＜按此＞
充電加速之迷
回歸 Rapid Charger 2.0 重點「快速充電」，根據 Qualcomm 資料指 Quick Charge 2.0 可提升充電效率達 75% 之高，究竟點解咁快？其實只要睇睇火牛上輸出數值就略知一二，因為它除了基本 5V/1.67A，下面還有兩行分別是 9V/1.67A 及 12V/1.25A，簡單說即係加高電壓來提升效率，原理唔算好複雜，而為免過高電壓損壞手機 Qualcomm 才於處理器上加入保護，要使用 Quick Charge 2.0 認證火牛才能解封（之前 Nexus 6 跟的是 QC 2.0 火牛），但情況跟之前 Oppo 的 VOCC 加大輸出(A)不同。
▲ 火牛上有列出多種電壓輸出。
▲ 從 USB 電源監察器可以看到 HTC Rapid Charger 2.0 電壓會高於正常 5V 。(監察器最高只可量度 7V，測試時並無使用)
相關文章:
【評測】小米 Buds 5 Pro Wi-Fi 詳細評測 市場首款 Wi-Fi 連線真無線耳機 + 佩戴感舒服 + 表現有驚喜 + 使用夠「長氣」 Qualcomm 新旗艦 CPU 規格初曝光 效能提升 25% GPU 表現增 30%
Desire Eye 1 個鐘充 80%
講完咁多理論，當然要實地試下有幾快！小編 找來幾部手機包括 HTC Desire Eye、Desire 816、Sony Xperia Z3 及 Oppo Find 7 一齊試試，結果 Desire Eye (2,400mAh) 用了 1 小時 26 分；Desire 816 (2,600mAh) 用了 2 小時 19 分；Sony Xperia Z3 (3,100mAh) 用了 2 小時 10 分鐘（約) 。以平均 2 小時來說，效率最明顯係首 1-1.5 小時充滿約 80-90%，其後就會減速，小編 認為時間只係快咗少少，因為我嘗試 Sony Xperia Z3 分別用 Rapid Charger 2.0 及 1.5A 火牛各充一次，發現兩者首個小時差距 5%（即 1A 輸入的才有更大差距），但 Desire Eye 僅用 1 小時就充滿 80%，由此證明並非所有手機效率都相同，因，但即是如此效率比 Oppo VOOC 僅用半小時充 80% 電量有段距離。
▲ 在 HTC / Qualcomm 兼容 List 內的 Desire Eye，只須 約 1 小時 33 分就可充滿 2,400mAh。
▲ Desire 816 本身並不在 HTC 兼容 List 內，而它用了約 2 小時 19 分來充滿 2,600mAh。
▲ 在 Qualcomm 兼容名單下的 Sony Xperia Z3 用了約 2 小時 10 分來充滿 3,100mAh 。
效率實驗
▲ HTC Desire Eye 首個小時已充電約 80%。
▲ Sony Xperia Z3 首個小時只充滿約 52% 電量。
▲ 使用 1.5A 火牛，Xperia Z3 首個小時大約充滿約 48% 電量，可見用 Rapid Charger 與否分別唔太明顯。
▲ 同 Oppo Find 7 的 VOOC 技術相比，當時首 30 分鐘已充滿約 80%。
▲ 在使用 HTC Rapid Charger 2.0 充電，Desire Eye 的機背溫度都有微微升溫。
小編 ：定位尷尬 獨立買唔太值
轉眼就玩咗成日充電（浪費光陰..），小編 認為 Rapid Charger 2.0 概念實用，但問題在於充電效率尷尬，因為 1 小時充 80% 或 1.5 小時 80% 唔算極之快，用途上對於整天在辦公室的「白領」快慢 1-2 小時作用不大，相反外出的的又未必有時間等 1-1.5 小時，更莫講話屋企呢！（大把時間）此外，快速充電還有縮短電池壽命的風險，有得換電故然不用怕，但如果情況如 Samsung / LG 買充座 + 後備電池（即係可換電），那快充就已冇價值；相反冇法換電快充較可取，但長遠可能要提早維修，所以如果並非像 Nexus 6 隨機跟這種 Quick Charge 2.0 火牛的話，相信這個價錢一般人還是會考慮 USB 拖板或外置電池。
售價：$249
查詢：HTC (3077-5588)
相關文章:
【評測】小米 Buds 5 Pro Wi-Fi 詳細評測 市場首款 Wi-Fi 連線真無線耳機 + 佩戴感舒服 + 表現有驚喜 + 使用夠「長氣」 Qualcomm 新旗艦 CPU 規格初曝光 效能提升 25% GPU 表現增 30%
分享到 :
最新影片
