上文提要：去到耶路撒冷就落大雪，整個城市都被白雪覆蓋，好靚亦都好大鑊。
有咩咁大鑊？首先，你對中東有咩 concept 先？未去之前，我腦中的中東就係石油、打仗、沙漠、駱駝同伊斯蘭教。沙漠，即係好乾同好熱啦，同落雪根本大纜都扯唔埋，點會預佢落雪？！而去到同當地人傾計的時候，更發現佢地個邊嚴重缺水，因為佢地幾乎一年 365 日都好好天，雨都唔多滴，落雪都唔會全國落，因為耶路撒冷係以色列境內海拔最高的地方，先會一年落一次半次雪。
而個一次半次就係咁啱得咁橋俾我地撞到正一正。
人地落雪就好似我地黑色暴雨咁，人人好開心全世界停工停課，封晒路，交通工具停駛，對於像我呢種沒頭沒腦沒準備的旅行者來說，唯有採取一貫人生態度：見步行步。
＾巴士全部停駛泊晒係度，車頂鋪滿雪。
＊小插曲＊
話說場雪係夜晚先開始落，第二朝一擘大眼就見到窗外的「奇景」，又凍又肚餓嘅我諗住出去食個早餐，暖下個胃，係 hostel 的 pantry 就有個來自南美的姨姨同我講：「出面啲舖頭唔會開架啦，就算想開都開唔到，因為封晒路呀。」飢寒交逼的情況之下，我即刻面都青埋，姨姨見我咁慘慘豬，就話：「阿妹，我有幾隻蛋同啲 homemade 芝士呀，煮個奄列你食好冇？」 ㅠvㅠ 好呀！
＾係成世女食過最感人的早餐
去到聖城，果然第一樣要學會的是感恩。
跟住兩日無驚無險咁過。耶路撒冷係一個好特別的地方，會令人相信奇蹟真係會發生，當中有好多感人的場面，但礙於版面所限，如果大家有興趣，請留個言話我知，另文再敍。
完左耶路撒冷的行程之後，啲雪已經溶得七七八八，天氣變好，就搭巴士落死海度假區。個日我地計好時間，去巴士總站買車飛搭車啦，點知個櫃枱話冇車去，因為溶雪關係，死海又係地球上陸地最低點，去程條路浸左。同時又由於有演習，全世界都要撤離巴士站，而個時已接近黃昏，再晏啲就乜車都冇得搭（人地唔係香港，比較早收工）。呢個時候，本想請教 Facebook 神，但因為時差（朋友都係香港人丫嘛…），我地最後又搵左 Google Map 幫手 XD
Google Map 除左定位，仲有個功能，就係「交通資訊 ＆ 規劃路線」，只要你輸入左起點同終點，佢就會幫你搵交通工具，教你「幾多點係邊度搭咩車」，當然唔係次次都準，但係外國冇乜得揀的情況之下，都未嘗唔係一個好辦法。
由於圍繞住死海個條路封左，我地唯有揀一條唔經個條公路的路線，即係兜個大圈。亦由於巴士站封左，我地係個刻淨係可以選擇搭的士去隔離個城市轉第二架巴士，或者留低唔走。最後經過一輪商討，我地決定搭的士。因為驚俾人賣豬仔司機唔識路，我地成程車開著個 Google Map 的導航模式。司機係我地的群眾壓力循循善誘之下，一邊談笑，一邊追尾班車。皇天不負有心人，我地最終搭左港紙 700 左右嘅的士，俾我地追到架尾班車去死海。
差啲唔記得講，去到轉車站先知，原來個度並唔係「隔離個城市」，而係公路的中間…（就當係城隧轉車站 d friend 吧）所以當日如果追唔到架巴士，就要訓街了。
你唔好睇我而家好輕鬆，當中的忐忑不安心驚膽顫真係有苦自己知。呢個故事教訓我地一定要買上網卡、一定要識上網、一定要用 Smartphone、一定要識用 Google Map 自由行去旅行千祈唔好坐定粒六，以為 plan 好左就乜都唔使驚。DoDo 姐都有講：「意外，就係意料之外」，再鋒利既刀都有生鏽的一日，去旅行最緊要心理質素好，面對任何突發野都可以鎮定面對先得架！當然你可以選擇跟團去，或者徹底啲直情去冒險，咁就唔同玩法啦。不過，多得呢個 trip，我地先可以 fully utilize 個 Google Map，同埋有一段咁驚險難忘的回憶 🙂
其實個旅程都未到一半，仲有好多刺激野，不過唔知大家仲有冇興趣。如果想睇，可唔可以講聲，唔係我就唔寫嚕～費事悶親你地啦！
＾聖城中的雪人，有天然spotlight打落去，好似識發光咁 😀
分享到 :
最新影片
