LG 早前就在香港發佈最新的旗艦手機 G4，相信大家都睇過小編 的快速測試。但究竟呢部將會係 5 月 28 日正式開賣的新旗艦，用落係咪比上代 G3 好用？而家就等已試用了 G4 7 日的 Edward 同大家詳細講講啦。
熒幕初睇唔慣‧睇睇下都叫順眼
相信有睇之前小編 的 G4 測試的 unwire 讀者，都記得佢話過 G4 的 QHD 2K 熒幕有明顯偏藍現象。但實際使用上，呢種偏色又有冇影響使用體驗？經過 7 日 Edward 的「洗禮」後，我覺得初初睇個時其實都有啲唔慣，畢竟之前用的是 G3，熒幕色準個時覺得係好準的，一旦去到 G4，偏藍始終係有啲礙眼。
不過用了兩、三日，可能對眼已經適應咗，又覺得問題唔算太大，而且在叫做「純白」畫面下，啲字睇落都好似 sharp 啲。不過缺點係睇得耐對眼會有少少累，建議等市面出咗防藍光的保護貼時加番塊，咁就會好少少。當然，最有效解決問題的方法，就係希望 LG 在 firmware 更新個時，加入可讓用家調較熒幕色溫的軟件，咁就 perfect 池啦。
▲G4 的熒幕，色準沒有 G3 那麼好，但 Edward 覺得習慣了又未至於好影響觀感。
▲G4（左）及 G3（右）拍埋一齊，可以見到 G4 有明顯偏色佾！，但銳利度兩者都差唔多。
▲可視角度方面，G4（上）同 G3（下）唔係差好遠，兩部機側面睇都好清，G4 甚至好似仲好啲。
▲睇片方面，G4（上）的顏色明顯比 G3（下）鮮艷，而且明顯無咁多「爆光」情況，感覺其實較好。
皮背手感好但要打理
手感方面先講皮背啦。唔同水貨嘅係，LG G4 行貨只提供皮革機背選擇，而 Edward 試用嘅，就係紅色平面的皮革機背款式。今次 G4 就首次以親民價（相對其他真皮手機來講），提供人手打磨的真皮機背，手感真係比人造皮好百倍！
不過真皮機背的「代價」，就係平時要好好打理，唔止唔好掂到水或者任何液體（當然餸汁、咖啡、酒個啲就更加要避之則吉啦！！），而且最好得閒（建議一至兩星期一次）用專門抹皮的油抹抹機背皮革部分，咁樣就算用耐咗，都唔會失去了皮革表面本身的光澤。但對於「完美主義者」來講，或者有另一個方法：用舊了，直接買過個新皮蓋啦！
▲真皮機背手感其實真係幾好。
▲不過打理上會比一般手機麻煩，如果想保持光亮，可以用上圖呢種專門為皮革物料「抹油」的清潔膏。只需要唧少少落絨布度。
▲之後再抹在機背蓋上面，Edward 建議大家從手機將殼除落來先至好抹，以免抹油走進機背隙縫。
▲抹油前（上）及抹油後（下）睇落分別唔算好大，但摸上去真係有唔同的。
微彎機身認真好用
至於 G4 的機身，與上代的分別係採用了微彎機身（但未至於 GFlex 2 般彎得咁誇），老實這比 GFlex 2 的手感更好，而且微弧形熒幕加上中間較厚兩側收邊的機背設計，令單手操作的感覺十分好。此外，微彎機身亦令 Edward 有時將手機機面朝下放在桌面時，都唔會咁易刮花熒幕，呢點係值得一讚。至於機背的設計，拿係手的感覺係好嘅，但對於有些喜歡放手機在平面用（例如：檯面）的用家來講，用個時就會左搖右擺好難穩定。如果你都係呢類用家，又想用 G4 的話，就要考慮改變下使用習慣，拿住部手機來用啦。
▲G4 採用微彎機身，老實說真係比上代 G3 更好揸手。
▲G3 如果熒幕向下放在檯面，如果檯面有細砂石，其實好容易刮花熒幕。
▲G4 採用微彎機身，就算檯面有細砂石，當熒幕向下將手機放在檯面個時，都唔驚熒幕咁易被刮花啦。
▲不過彎曲的機背，就令手機唔可以「放定定」係檯面用。
電量認真唔夠一日用……
今次 LG 在 G4 上採用了並非最頂級，而係次一級的 Qualcomm Snapdragon 808 六核心處理器，好多人覺得 LG 如此做，除了為了避開傳說中的 810 八核處理器的過熱問題之外，亦希望令使用時間得以延長。發熱問題方面，808 處理器的 G4 Edward 用了多日，確實唔見有，無論係打機還是睇片，機身最「嚴重」都只係微溫（即使在烈日當空的夏天於室外使用……），所以算係合格有餘。至於使用時間方面，Edward 就覺得雖然 G4 用上 808 六核處理器，但由於電量仍然維持在上代 G3 的 3,000mAh 電池，加上仍然係用 QHD 2K 熒幕（雖然尺寸相同），所以仍有相同缺點：電量唔夠一日用。Edward 試過最長個日都係用到 9 個半鐘（連待機時間）。好彩 G4 採用可換電池設計，建議大家最好買多粒電，又或者長開省電模式，咁樣就唔怕一日唔夠用了。
▲用上非最頂級的 Qualcomm Snapdragon 808 1.44GHz 六核心處理器，但效能其實已夠平時使用。
▲用了 7 日，Edward 覺得 G4 的電量始終未能用上一日，都係有啲唔夠。
▲好彩係它採用可換電功能，唔洗帶尿袋，大家多買一兩粒電，就可以用到一日以上了。
▲又或者大家要長開省電模式，先可以一粒電用到一日了。
▲至於機身溫度，就算 Edward 運行安兔兔時，機背最熱位置（鏡頭左邊）都係 32 度左右，完全唔會熱。
影相真係堅靚夠 Detail
至於影相方面，今次 G4 都係重點，相比上代 G3，Edward 覺得最大進步係對焦準繩度高咗，同埋儲存相片的速度亦快咗唔少，即使 save 相落 SD 卡，都唔會好似上代咁要等一陣，而家先叫做對得住「旗艦」系列呢個名。另外，G4 的相機唔止解像度由上代 1,300 萬加大到今代的 1,600 萬，感光元件大細亦由上代 1/3 吋加大到今代的 1/2.6 吋，光圈更加由上代的 F/2.4 加大到去今代的 F/1.8，最重點係佢的 OIS 光學防手震，今代加強到支持三軸防震！咁嘅功能有咩好處？好簡單：唔開補光粒的情況下，想係餐廳影靚食物相，又或者想係室外影靚靚夜景，手持都會比上代更易影到清晰、銳利而色彩自然的相片，Edward 係食日本菜的時候，就用 G4 影了碟枝豆，發現連豆上面的細毛都影到，真係好厲害！所以對手機影相質素有要求的用家，G4 應該可以滿足到你的要求。
▲G4 在鏡頭上，無論規格定係表現，比上代 G3 都係大強化。
▲大家可以見到，G4 係室內唔用補光燈，都可以影到咁清晰的相片，就連枝豆上的小毛都清晰可見！（按圖可放大睇原相）
▲至於拍攝夜景方面，配備 F/1.8 大光圈及三軸防手震的 G4（上），表現真係比只有 F/2.4 光圈及雙軸防手震的 G3（下）好好多！（按圖可放大睇原相）
▲將兩張相放大 100% 來睇就見到，G4（上）的油畫化情況，比 G3（下）真係好咗好多。另外 G4 雖然仍有雜訊，但已是可接受水平。
如果想再玩得 Pro 啲，G4 仲有個全手動攝影模式俾大家揀，唔止可以影到 RAW + JPEG 相片，所有相機設定，包括：白平衡、對焦模式、ISO、快門速度（30 秒至 1/6000 秒）、AE-Lock 等都可以俾大家揀，對於想用手機影長時間曝光、車軌、星軌等的朋友，G4 都可以滿足到大家。但相信絕大部分用家，應該都寧願用佢嘅自動 mode，因為手機影相最緊要係咩？快而準是也！
▲G4 首次加入手動模式，大家可以更彈性按需要微調相機設定，而且更可以影 RAW + JPEG！
▲加上支援 microSD 記憶卡擴充，真係影幾多 RAW + JPEG 相都無問題啦。
介面唔再窒‧進一步智能化
上代 G3 講真除咗鏡頭之外都算好用，但都仲有另一個問題，就係個介面。雖然可以有好多位可以個人化，但係用得耐之後會窒窒地，感覺好似用緊部中階甚至入門手機嘅介面咁，真係幾無癮。而係 G4 上面，LG 採用了全新的 UX 4.0 UI，設計上係繼承上代感覺，但係用咗幾日，發覺窒下窒下嘅情況完全消失，整體用落極暢順！呢一點，Edward 覺得真係好抵讚。
▲採用 UX 4.0 UI，介面完全無咗上代 G3 個種用一排就會窒下窒下的情況。
另外，G4 新加入的 Smart Settings 功能亦好好用，同埋都好智能，例如：當大家駁好咗藍耳牙機，系統會感應你平時駁住藍牙耳機個時會成日用咩 APP，例如：KKBOX。試過幾次之後，佢就會係 Smart Bulletin 度問你係咪第日駁親藍牙耳機都自己開 KKBOX 呢隻 APP，真係好智能。但當然，都會有認錯的時候，例如：佢就試過問 Edward 駁咗藍牙耳機係咪開 Gmail！（關乜事？！）不過 LG 肯進一步開發 Smart Bulletin，令部手機更個人化，係好事來嘅。
▲Smart settings 中，系統會按用家使用情況，建議用家設定不同的場景模式。
▲不過有時嘛……都會有失誤的時候……（看來系統覺得小編太勤力，駁住藍牙耳機唔係聽歌而係要 check email……）
▲另外如果相機開了 GPS 功能，每張相片會記錄了拍攝位置，而 Smart Bulletin 會按拍攝位置，讓大家回顧所有相片，都幾特別，去旅行用最啱！
Edward：係舊電唔夠用唧，但好彩可換電！
整體來講，試用咗部 LG G4 一個星期，感覺其實都幾唔錯：一來真皮底蓋對於小編來講已經係加分，另外影相、流暢度、手感各方面都令人好滿意，而熒幕個度，當然未算完美，但其實 LG 第日加番個可俾大家自行調較色溫的軟件，已經可以解決問題。唯一解決唔到嘅（其實所有 2K 熒幕手機都有相同問題……），就係粒電好快用完，真係一日都唔夠！但好彩 G4 採用可換電池設計，想用足一日唔插尿袋？買多粒電就得！平時會成日 share network 俾電腦用、又會成日打機的超 heavy user？買多兩粒電隨時換夠用啦掛？當然，買多一兩粒電都係要錢，但而家嘅手機，郁下都過 6k，G4 定價 $5,698 仲要單雙 SIM 同價，平咗嘅錢買多兩粒電，抵番哂！
售價：$5,698（單、雙 SIM 同價；皮革機背，隨機附送香檳金色塑膠機背蓋）
查詢：LG（3543 7777）
分享到 :
最新影片
