各品牌今年都出了旗艦機，等咗咁耐終於等到 Sony 推出 Xperia Z3+，雖然佢係 Xperia Z3 強化版，外表又冇大改變，如果你都想知 Xperia Z3+ 又咩特別之處就記得留意小編 初步評測。以下有更多資料：
老實說 Xperia Z3 同 Z3+ 小編 遠睇都分辨唔到，因為兩部機真係好似樣，但佢情況同 LG G4 一樣拿起才會知有咩分別。首先，拿起 Z3+ 第一個感覺係輕咗，重量比 Z3 輕約 10g，機身會再薄少少，但手感難察覺分別，感覺跟拿 Z3 差唔多。其次，Z3+ 亦採用 Z4 Tablet / M4 Aqua 新防水設計，Micro USB 唔洗蓋都可防水，藉此機身只剩下 MicroSD 同 SIM 卡槽的蓋，外表上更美觀。最後，Z3+ 提供水映藍、星鉑金、月夜黑、及雲石白等 4 種顏色，冇紫色亦冇紅色，感覺跟 Z3 時差唔多，但兩者分別係 Z3+ 邊框會呈現反光，而 Z3 就沉色。
▲ Z3+（右）機身會比 Z3（左）薄少少。
▲ 改良防水設計後，Micro USB 已經不用蓋。
▲ 剩下的蓋內藏 MicroSD 及 SIM 卡槽，SIM 卡屬 Nano SIM 設計（包括 Dual SIM）。不過，小編 發現 SIM 槽頗難拔出。
▲ 濕水已屬小事。
▲ Z3+ 邊框會比較反光，而底部亦多了 Micro USB 接口。
▲ 前置喇叭用返 Z2 時邊緣幼坑設計，但大家放心我現場試過打電話都好大聲。
▲ 由於改用防水 Micro USB，所以 Docking 亦直接改用 Mirco USB 介面。
Z3+ 型號已告知你係加強版，它依舊配備 3GB RAM 及 32GB 儲存空間，而改動就只有換了 Qualcomm Snapdragon 810 處理器，雖然略欠驚喜（冇 4GB RAM），但論性能已屬頂級，於 Antutu 可錄得 53,000 分，成績拍得住 S6 Edge。此外，Z3+ 開賣就有單卡及雙卡版本，單卡支持 300Mbps (Cat 6)；雙卡支持 150Mbps (Cat 4)，而且機內玩配備 MIMO 多天線設計的 ac 制式 WiFi。最後，音效上除了 Hi-Res Audio，當然唔少得追加 LDAC 藍牙技術，藉此使用無線耳機都有更佳音質。
▲ 搭載 Qualcomm Snapdragon 810 處理器及 3GB RAM，於 Antutu 可錄得 52,000 – 55,000分，成績已屬頂級水平。
▲ 3GB RAM 裡面，閒置時大約有 1.7GB Free RAM。
▲ 內建 32GB 儲存空間 （可擴充 MicroSD），實際可用大約 21GB 空間。
▲ Xperia Z3+ 提供單卡及雙卡版本，當中雙卡設計為 4G（SIM 1）+ 2G（SIM 2）。
▲ 內建電池為 2,940mAh（比 Z3 稍細），配合 Stamina 省電模式官方聲稱足夠 2 天用量。此外，Z3 + 亦支持 Quick Charge 2.0 快充功能，但原裝火牛暫時只有 5V /1.5A 輸出。
▲一樣支持 PlayStation 4 Remote Play。
▲ 相機介面跟 Z3 差唔多，主要分別係新增更多模式，流如 AR 面具等等…
▲前鏡頭跟 Z3 同屬 2,070 萬像素 G Lens 鏡頭．相機反應都很快，相片細節解像力高，但有輕微「油畫」。（可曬相級別）
▲ 前鏡頭升級至 500 萬像素及 25mm 廣角，相片質素大有進步，單看眼部細節就知道了。
【現場評測】Sony FE 24-50mm F2.8 G 現埸實試 新焦段+輕巧+畫質媲美第一代 G Master 外媒證實 PS5 Pro 傳聞 預料或在今年年底推出 俄羅斯普京促自主研發遊戲機 要能夠與 PS5、Xbox Series X|S 抗衡
這次 Z3+ 會使用 5.2 吋 Trilumions 屏幕，解像度維持 1080p，簡單說即係同 Z3 一樣，面對其他品牌（HXX、LX、Samxxxx）都用 2K 屏幕，這點確實有點失望。不過屏幕同 Z3 相比，白平衡明顯冇咁藍，相比 S6 Edge 仍是屬冷色溫微藍，但冇論點 Sony 最正係提供「白平衡」讓大家調整。亮度當面，正面睇 Z3+ 會比 S6 Edge 更光，但側睇仍是 S6 Edge 的 S-AMOLED 較優勝。
▲ Z3+（中）白平衡會比 Z3（右）冇咁藍，但同 S6 Edge（左）相比就仍算偏冷微微藍。
▲ 正面睇 Z3+ 畫面比 S6 Edge 更光，但打側睇 S6 Edge 的 S-AMOLED 仍然佔優。
▲ 色溫問題可透過「白平衡」選項來調整。
試玩完 Xperia Z3+ 小編 初上手覺得驚喜唔大，但試落其實都幾體貼，事關好多改動都係從「細位」著手，外觀改變唔大，但拿起及用落就會察覺分別，與其說冇驚喜，倒不如話 Sony 將 Z3 強化，因此我覺得 Sony 最聰明係將型號改為 Z3+。當然冇 2K 屏幕、冇指紋同紫色通通值得扣分，但考慮到售價 $5,698 都仲算合理（冇開天殺價），同其他旗艦機 (One M9+ / S6 / G4 ) 相比，我覺得 Z3+ 算係穩陣，價錢最平（同 G4 同價），又唔洗重新習慣新野（如彎芒），當然售價再平少少會更有說服力喇！
售價：$5,698 （單卡 / 雙卡）
查詢：Sony（8203 8863）
【現場評測】Sony FE 24-50mm F2.8 G 現埸實試 新焦段+輕巧+畫質媲美第一代 G Master 外媒證實 PS5 Pro 傳聞 預料或在今年年底推出 俄羅斯普京促自主研發遊戲機 要能夠與 PS5、Xbox Series X|S 抗衡
