每年就到暑假，通常都會有所謂「勵志式」電影上畫，今年的勵志電影，小編覺得不是第二套，而係呢套《壹獄壹世界》！點解？有齊年青人 –> 墮落 –> 沉迷金錢 / 權力 –> 「老師式」角色說教 –> 忽然省悟 –> 重新做人貢獻社會，不是說教式電影還是什麼？
說教式結果淡過清茶
其實成套片，講說教就真係無屈佢嘅，話說男主角于日晨（王宗堯飾）是一個時下唔少人都好憎，成功靠父 / 母幹的富二代，終日吃喝玩樂溝女唔在講，重點係有種不可一世的咀臉。一次「樂極生悲」意外駕車撞傷 / 死阿婆（印象中劇情無交待，但 wfc），因而鎯鐺入獄。本以為是《監獄風雲》年代的黑暗環境，但原來而家已經係比較文明的黑暗，佢仲搵到「秘技」，點樣可以繼續係監獄入面過住「二世祖」的生活。直至另一個二世祖肥仔阿積（張建聲飾）入獄，仲要坐埋同一個倉，而阿積又記番起同于的恩怨情仇（話說坐監前于同阿積的女朋友意外發生了一夜情，於是引來阿積的仇恨），處處係監倉針對于，于更懷疑阿積對企係于一方壞他好事的伍仔（蔡瀚億飾）的女兒，以及達叔（廖啟智飾）下毒手，於是打算「買起」阿積，但最終卻引來達叔阻撓，更進一步向于說教，叫佢凡事要忍，唔好睇表面同咁衝動，唔止令于決定爭氣做番個好男人，之後仲知道伍仔女兒同埋達叔跌親都真係唔關阿積事。于出獄後更追番離佢而去的女朋友美瑤（李梓言飾），最後拉埋天窗仲要生咗個女，而惡人阿積就算出得番監，但最後都係俾仇家斬死：好人有好報、壞人有報應，傳統說教式電影的大團圓結局（真係差在未一齊 BBQ）。
如果你問作為無睇過原著的小編，我會覺得成個故仔個舖排好傳統，感覺就好似飲緊杯清茶咁，淡而無乜味，無驚喜無乜 juicy 元素（劇情上），成套戲其實都係教導年青人唔好凡事睇表面同咁不可一世，因為真相未必係咁簡單。另外仲有做人要爭氣、要珍惜等等，都係透過達叔把口講出來。你話唔好睇咩？又唔至於，但就算好睇，我覺得都唔係因為劇情，而係其他元素。
好睇在於「高登」+ 專用語元素
俾著以前，小編睇呢類戲，真係坐定定睇到半個鐘都已經係算俾足面；但呢套戲，雖然劇情傳統到唔傳統，但係就坐足全場，而且感覺其實都唔多冷場，點解？因為導演孫立基同埋編劇胡耀輝係套戲入面，加插了唔少高登術語，好似「講呢啲」、「打 J」等等，作為一套本身就係出自高登講故台作家小姓奴的作品，感覺好合理，而且呢啲高登潮語仲要出自黃光亮、姜皓文把口，已經令本身平平無奇的劇本添上唔少 juicy 元素。另外，據聞電影本身真係有入真的監獄取材，所有場景、術語感覺都俾到觀眾真監獄的感覺（但係咪咁像真小編真係唔知，畢竟未坐過監亦唔想坐 LoL）。雖然呢兩個元素似係細微細眼位，但貫穿整套電影，就俾到人一種投入感。
女角只係花瓶。堅係男人戲
當然，睇得呢套電影，唔少港產片都會好重視女角，而且最好就有咁性感得咁性感，務求劇情唔掂都可以吸住你班麻甩仔啲「睛」先。但係《壹》片中，女角全部都只係花瓶（其實唔係上網搵番，都唔知 coffee 係套戲入面有戲份 LoL），絕大部分場面都係男人戲，講嘅係義氣（于日晨 x 伍仔）、偽父子情（于日晨 x 達叔）、（類似）朋友反目（于日晨 x 阿積）……當然唔少得梗係打交場面等等啦。但你話係咪男人睇先開心？小編就唔太覺，當日入場，笑得最大聲嘅反而係女觀眾囉！
有空一睇無妨
如果你問小編：《壹》片值唔值得入場睇？小編會答你：你有冇時間？話哂香港人「日理萬機」，日日 OT 唔在講，放假隨時係屋企都要開工，或者照顧家人，又或者同朋友聚一聚。如果做哂呢啲嘢，又或者朋友見面除咗食飯就真係唔知講咩好，一睇無妨。但如果真係無時間，我覺得都係慳番個幾十蚊戲飛錢好了，因為最終你出場得到的，只係「阿媽係女人」的說教結論。
