《殺破狼》，這套 10 年前的經典武打片，相信唔少鍾意睇戲的 unwire 讀者都記憶猶新。昨日這套經典武打片終於推出續集《殺破狼 2》，延續前作打打打的元素之外，仲俾咗 Edward 一種不一樣的感覺。究竟係點？昨晚睇完優先場後，就同大家分享一下。
雖說「續集」但 1、2 無乜關係
相信大家睇到經典大片有 2：續集這個標示，第一時間一定會諗：上集的延續、外傳、角色際遇繼續發展等等。為了好好準備，睇《殺破狼 2》前一晚，小編亦特意重溫了《殺破狼》。但睇完《殺破狼 2》後，就覺得有點無謂：因為除了演員有重疊（但角色大兜亂，雖然任達華仍然係警察，但手下變哂）、繼續打打打超重陽剛成分之外，整個故事都同第一集無乜連繫。
有人話《殺破狼 2》係《殺破狼》的前傳，但如是前傳，點解唔交待馬軍（一集，甄子丹飾）點解打到個犯變傻？點解唔交待重案組高級督察陳國忠（一集，任達華飾）點解咁針對王寶（一集，洪金寶飾）？所以，小編建議大家唔好俾《殺破狼》呢個名框住自己，因為 1 同 2，故事上真係無乜關係的，大家唔洗係 2 入面，搵番 1 的蹤影。
▲雖然任達華同第一集一樣都係陳 Sir，但班底都唔同哂，換做艾威、蔡瀚億等人，所以同第一集可以講係無乜關係。
故事性超重‧打得有道理
當然，既然《殺破狼 2》孭得《殺破狼》呢個系列的名，正如小編前文提過，照樣有好重的陽剛味道。雖然今集無咗第一集的打得之人甄子丹、洪金寶，綠葉亦無咗智叔等，但 2 的陣營依然強勁，好打之人找來 Tony Jaa 同張晉，而吳京就唔再係第一集的殺手，而係變咗忠字派。而且 3 人的打戲，各有特色：Tony Jaa 夠狼夠狠、吳京夠直接、張晉就夠瀟灑打交好似跳舞咁，片尾仲有場 3 人大亂鬥，真係睇到人好窒息，基本上成套戲都無「廁所位」。
而且，戲中雖然繼續著重「打打打」，但相比第一集，故事性真係重咗好多，唔少打鬥場面都唔係為打而打，而係為劇情舖排而設，好似 Tony Jaa 為救任達華同吳京而以一鬥多甚至犧牲自己、吳京為了 Tony Jaa 女兒就算傷咗入咗醫院都要走番醫療中心救 Tony Jaa 等，令人感到 120 分鐘的電影係一環扣一環，文戲、武戲不斷交織交錯，令人覺得每場打戲都係有需要而打，「打得有道理」。至於眾多打鬥場面，小編推薦大家留意片尾 3 大武打明星大亂鬥，以及中段的「泰國監獄大亂鬥」，尤以後者，吳京係戲入面的表現有種幽默感覺，令人睇到會心微笑。大家入場睇時，不妨留意。
▲Tony Jaa 犧牲自己以一對多為咗救任達華、吳京等人呢一幕，一樣睇到人勁肉緊。
唔再一味打‧Tony Jaa 文戲都掂！
之前大家接觸 Tony Jaa，相信不外乎都係來自《拳霸》、《冬蔭功》系列，而他表現出來，就係超級重陽剛味道的「打手」角色。但係《殺破狼 2》，Tony Jaa 除咗依舊好打之外，仲加插咗唔少同他患病女兒莎的父女情，可算係父親節前俾各位父親最大的「禮物」，因為戲入面 Tony Jaa 拿掐父女情的處理手法做得非常好：真摰而深情，係戲中的一大亮點。睇過《殺破狼 2》，相信大家會對 Tony Jaa 呢位演員有另一番的認識。
▲估唔到 Tony Jaa 做文戲一樣精彩！
▲戲中扮演 Tony Jaa 女兒莎的 Unda，小編睇完不禁大呼：巧打耳呀！
除咗 Tony Jaa 同佢女兒，任達華飾演的陳國忠與他侄子，由吳京飾演的志杰的叔侄情，亦是戲中的一大睇頭，尤其是接近中後段，任達華為救侄子及自己，不惜自斷手骨，然後並肩作戰的一幕，真的賺人熱淚。可以講的係，《殺破狼》如果係俾到大家平面上的視覺享受（打鬥的華麗），《殺破狼 2》俾到大家的感覺，就唔止係視覺享受呢個平面咁簡單，而係人物關係的發展的「直向深度」發展，令整個故事更加立體。
▲呢一幕任達華為救吳京同自己，自斷手骨，真係睇到都覺得痛！！
▲仲有吳京「自虐」一幕，真係睇到人氣都唔敢抖大一啖。
強烈鄭保瑞「黑色」風格‧希望是貫穿全片重點
今次的《殺破狼 2》，由上集葉偉信，改為今集的鄭保瑞執導。有朋友提及過鄭導的作品，有種很強烈的「黑色」風格，而係《殺破狼 2》，無論是場景舖設、燈光表現、角色設定、甚至人物之間的關係，呢種感覺更加係好濃烈，小編尤其對任達華與古天樂係樓梯聊天的一幕印象深刻，各位讀者入場觀看時可以自己感受一下。至於電影的主題，由 Tony Jaa 講出「希望、奇蹟」為題，當然大家都估到最終都係大團圓結局個種「老套」舖排。但老套還老套，點樣老套得來又引人入勝，從《殺破狼 2》呢套電影，就睇到鄭導及幕後團隊的功力。於此小編就不多述，交俾各位 unwire 讀者入場自行感受吧。
▲兩叔侄係泰國監獄入面的對話，都係一大睇頭。
最後，小編不得不說的，是《殺破狼 2》的英文名字「A Time For Consequences」，更能表達出整個故事的感覺，因為成套電影，俾觀眾有種好強烈的「因果」關係，而呢種「因果」關係放入角色之間的互動，就令故事性更加完整，例如：Tony Jaa、女兒與吳京；古天樂與恭碩良；任達華與吳京、古天樂與張晉等等。各種愛恨纏綿交織在一起，令人感到窒息之餘亦感拍案叫絕（尤其是最後 1/3 部分）。所以小編建議大家入場前同睇戲時唔好飲咁多汽水或飲品，唔係忍唔住要去廁所，隨時會錯失精彩劇情哩！（笑~~）
▲古天樂演大奸角，雖然只係「用眼神做戲」，但一樣好正！
▲張晉戲入面打嘅戲份雖然唔多（集中係片尾），但一樣好好睇，夠瀟灑！
分享到 :
最新影片
