Canon 今日發布左 G3 X ，小編就緊係第一時間試玩啦！ G3 X 既出現就係為左填補返大 Sensor 長炮機產品既空缺，而呢類產品第一時間會諗起 Sony RX10 ，但 RX10 岩岩已經出到第二代啦， Canon 依家先出，咁到底呢部 G3 X 又會有咩過人之處呢？
無內置 Viewfinder 勝在 LCD 亮度夠高
Canon G3 X 配備一吋 2,020 萬 CMOS 以及 DIGIC 6 數碼影像處理器，具 25倍光學變焦遠攝鏡頭，明打 Sony RX10 ，不過兩者相比起來，其一最大分別就係佢無左個 EVF 。對用慣 Viewfinder 既用家， Canon 亦有照顧到，可以配置返 EVF-DC1 。不過一般用家又唔需要太擔心， Canon 為左避免係強光係咩都睇唔到既情況出現，係 G3X LCD 上提升左亮度，係過去 S120 機款既 1.3 倍，對於鍾意 Liveview 多過 EVF 既小編黎講可以話係好貼心啊！
防塵防水滴設計 不過唔可以雨中使用
其實 G3 X 一直強調非常適合去行山同溪澗用，不但係因為焦段相對較長，用黎影動物同埋生態就岩晒；而且係因為佢配備同中階 EOS 相機同級既防塵防水滴。 不過要留意既係，佢仍然唔可以係雨中使用，同埋要裝返 Hotshoe 蓋，所以要係有水既環境下用佢就仍然係無可能啦，不過佢既裝嵌同橡膠都有做密封處理，所以就算被潑小小水都唔驚。
相關文章:
【評測】Canon EOS R5 Mark II 全能高像素無反相機 AI 對焦性能大提升 + 人像與風景試相放大睇 【現場實試】Canon EOS R5 Mark II AI 動作優先對焦 + 註冊人物優先對焦功能實用
要廣夠廣要遠夠遠 最緊要變形唔算大
我覺得買佢既最大優勢係佢有 24-600mm 既焦距，要廣角有廣角，要微距有微距。不過好多時 Zoom 得遠既時候，唔少機都會出現嚴重變形。但係 Canon G3 X 去到 600mm 咁遠小編都覺得變形其實相當唔錯，可以接受喎。大家可以睇下圖，雖然天氣唔好，但都可以清楚睇到對面太平山既樓，而且都唔係好覺變形既情況，相當之不俗呀。不過，由於佢去到 600mm 最大光圈得 f/5.6 ，可能唔少人會詬病，但其實 RX10 雖然有恆定 f/2.8 ，但最遠端得 200mm ，少左足足三倍，而且相信好少會低光環境下用到咁遠，所以並唔需要太介懷。
多種拍攝模式 岩晒懶後製既用家
其實除左 PASM Mode 之外，對於一啲非專業用家黎講，拍攝模式就最重要架啦。今次 G3 X 加入左相當多既拍攝模式，當中包括：相機新增左 B 快門，有需要長時間曝光既時候例如影煙花同星軌既時候就岩晒；而且仲有星空拍攝模式，用家可以輕鬆影到星空相同拍 Time-lapse 縮時短片；如果想發揮創意，更加可以選擇 Creative Shot ，佢就會係影相後從 46 種濾鏡中幫你揀五種隨機效果，岩晒唔想成日返到屋企做 edit 既用家們。
配備強化遠攝構圖輔助功能 遠攝搵主體非常方便
其實呢項功能按鈕早已出現係 SX60 HS 呢類長炮機，所以 G3 X 上都配有呢個功能其實都係理所當然的。佢可以幫用家 zoom 到遠端偏離主體既時候，只要噤住個按鈕，就可以拉闊返焦距搵主體，更可以係過程中變焦決定最後遠攝構圖。小編覺得呢個功能相當實用，皆因去到遠端時如 200mm 時，一個唔小心拎歪左要重新構圖可能就要先 zoom out 番，有左呢個 button 就方便好多。
Billy ：「真正做到兼顧畫質既一機走天涯」
正所謂「一吋長一吋強」，更何況今次 G3 X 做到 600mm 比用家，對於有拍遠端需求如動物既用家們可以話係好消息啊！而且一吋感光元件帶來既畫質的確唔錯，機身亦比過往天涯機細，小編都會考慮入手部黎做旅遊機。有興趣既買家就記住， G3 X 會係 7 月 7 日正式公開發售，零售價為 $6,980 。
更多試機相：
相關文章:
【評測】Canon EOS R5 Mark II 全能高像素無反相機 AI 對焦性能大提升 + 人像與風景試相放大睇 【現場實試】Canon EOS R5 Mark II AI 動作優先對焦 + 註冊人物優先對焦功能實用
分享到 :
最新影片
