剛剛係琴日九展星影匯《日本動畫精選》所播放嘅《回憶三部曲》，小編就睇咗兩部：其中一部係《樂園追放》，而另外一部就係呢部《喬望尼之島》。兩部實屬不同類型的動畫電影各有特色，而《喬望尼之島》比小編嘅感覺係簡單而寫實，想知到底有咩咁吸引？
故事簡單純樸 一筆一劃勾勒治癒系畫風
故事講述日本一個小島係二戰後受蘇聯軍侵略， 10 歲嘅淳平同 7 歲嘅弟弟寬太與爸爸及爺爺由原本幸福生活瞬間變成一片混亂，而就係被蘇聯進駐期間，兩兄弟認識左蘇聯少女 Tanya ，三人一開始並無受戰事影響，因而能成為好朋友，可惜到最後仍要被逼分開。至於相愛嘅淳平同 Tanya 最終並無碰面，淳平只能係 56 年後重回小學完成畢業典禮時重遇 Tanya 孫女，故事就此告一段落。故事有如鐵達尼號，感人寫實，而《喬望尼之島》是否真實故事就不得而知了。對於呢類故事，電影保留著現實畫畫一筆一劃嘅感覺，粗糙卻意外的舒服，加上哥哥弟弟賣萌嘅場景畫面，令比較 heavy 既劇情得到緩和，亦都不時感覺溫暖，很有治癒系動畫的 feel 。
無大團圓結局 「但這是最好的結局」
雖然小編認為有啲偏向治癒系，尤其是前半部時，但始終後半部劇情比較沉重，（唔知是否因為真實故事）弟弟寬太在回到日本前不幸死去而哥哥淳平亦過了 56 年亦無重遇 Tanya 。而小編仍然覺得這是最好的結局，因為淳平係細個時因怕醜錯失左同 Tanya 跳一場舞既機會， 56 年後重遇 Tanya 孫女，係人生最後階段填補返呢個 56 年既缺憾，亦都以所有人最初的模樣在銀河鐵道上跳舞作結尾慢慢淡出。或者唔需要每套電影都「耍狗血」一定大團圓先係圓滿結束，或者咁樣先至係最好最溫馨既結局。
不吸引眼球卻觸動人心的小品
短短的 90 多分鐘，情節唔豐富卻充實，視覺唔震撼卻舒服，結局唔完美卻最好。這種極具真實感的治癒系小品，一直都係小編鍾意嘅日本動畫類型之一。睇《喬望尼之島》需要準備好嘅唔只係你對眼，而係你個心：用心睇先會感受到裡面的每個細節。不過有一點小編始終唔係好 buy：就係溫暖同沉重劇情之間換得好快好密，變相好難 follow，而且情節高低起伏太大都未必是好事，可能就係「真實」所帶黎嘅小小壞處吧。
評分： 6.5 / 10 分
