昨日一年一度的灣仔會展電腦展終於開幕，呢幾年電腦展都俾人「散貨場」嘅感覺，好多人入場唔係為睇新嘢：龍友為影女、一般人為執平嘢、廠商就為散貨（尤其係死貨），所以真係會購物嘅人流，近年唔少參展商都表示愈來愈少。究竟今年電腦展係咪仲係咁？Edward 就係昨日第一日入場視察咗一陣，而家就同大家報告一下 6 個現象，大家睇完再睇呢個 weekend 值唔值得入場啦。
現象一：電競節猛人鬥技
今年電腦節，同時亦係大台舉行香港電競節，參展商一連 4 日請來各路猛人及著名 YouTuber，係大台展開連場惡鬥，遊戲就包括：英雄聯盟、CS:GO、爐石戰記、街頭霸王及 FIFA。仲有專業比賽主播及賽評，係參賽者比賽個時進行即場評述。如果你係鍾意玩電競的 wire 民，都值得去現場欣賞比賽實況嘅！睇到累個時，仲可以去旁邊嘅贊助商攤位拿番杯提神飲品飲番杯添。
▲第一日比賽就引來唔少市民圍觀！
▲參賽者係台上進行死鬥，第一日比賽嘅遊戲就係 CS:GO，現場唔止會係大熒幕展示比賽實況，仲有大熒幕展示比分，好 pro 呀！
現象二：唔少嘢玩唔驚悶
電腦展除咗可以執平嘢之外，對於無興趣購物嘅 wire 民，入去都唔驚悶，因為都有唔少嘢可以玩：唔止可以玩投籃、睇走音歌舞，仲有參展商以多部相機，為大家拍攝慢速對峙相片，模擬自己身為街霸主角同遊戲入面嘅角色激鬥嘅場面，都幾過癮架！
▲有參展商以多部攝影機，讓大家可以模擬自己身處街霸遊戲入面同唔同角色激鬥嘅慢速對峙相片，過癮！
▲仲有得玩投籃遊戲添，十足成個嘉年華咁！
▲仲有新晉「歌手」係參展商台上獻技，不過歌藝嘛……咳咳咳，見仁見智啦。
現象三：首日人流勝去年
昨日係電腦展首日，根據以往慣例，第一日一般都唔算多人流（亦係記者採訪好時機，因為唔驚太迫人好難影相 LoL）。但今年無論係 Edward 目測定係唔同參展商嘅觀察所得，人流都似乎比舊年多咗唔少。希望今年電腦展係未來幾日，都可以旺丁又旺財啦。
現象四：唔係無新品架！
以前電腦展一向都俾人有種「散貨場」嘅感覺，今年呢種感覺都仲係有，因為第一日唔少參展商嘅產品都已經開始劈價求售，但 Edward 行勻全場後，都發覺有極少量新品，例如：Dell 最新嘅超薄 XPS 手提電腦、Letv 之前叫停嘅 Le Phone 1 超級手機、以及下圖首次抵港嘅 Pebble Time 行貨。如果想睇新品，都可以去行下嘅。
現象五：大量航拍產品發售
今年航拍可以話係熱潮之一，呢個現象就漫延至電腦展。今年就有唔少攤位有唔同嘅航拍機發售：有啲一千幾百有一部，有啲就成萬幾蚊，有啲就報 course 送航拍機，選擇好多！如果大家想買番部來玩玩，不妨入場睇睇。
現象六：美食博覽賣唔哂繼續賣？！
每年電腦展之前，就係美食博覽。當然電腦展主題肯定係 gadgets，但 Edward 發覺係場館最後一行，竟然有唔少「唔啦更」嘅參展商，賣嘅就係美食博覽入面都見到嘅廚具、濾水器等產品。莫非美食博覽賣唔哂，諗住係電腦展繼續清貨？
總結：有時間都可以行下嘅
老實講，如果你問 Edward，今年電腦展值唔值得入場睇，Edward 會答你：有時間咪入去睇下囉！畢竟如果你要買平嘢，各參展商嘅陳列室，或者各大腦場（旺電、高登、黃金等）相同產品都係做緊一樣或者差唔多嘅價位，而且個啲地方人又相對無咁多（尤其係呢兩日 weekend），買嘢都舒服好多。但如果大家行開灣仔，又無乜嘢做，入去行下睇下電競比賽，又或者感受下現場氣氛，都無妨嘅。
