據 Apple 之前的記者會表示，今日將會是 iOS 9 正式推出的時間。雖然筆者執筆的一刻，手上的 iOS 裝置都未收到升級通知，但估計應是以美國時間為準，所以香港用家估計今晚至凌晨時份應該可以開始升級。究竟升級前應該要做咩？而家就等 Edward 同大家分享一下啦。
一）檢查係咪支援升級
第一件事，當然係檢查自己部機係咪支援升級至 iOS 9 啦。唔知咩機支援？查睇下圖大家就知道了。如果你見到愛機唔支援升級，咁就無謂哂心機白等，快啲去買部新機罷啦。
相關文章:
【教學】iOS 18.1 如何用 Apple Intelligence 只需 2 個設定 + 香港免 VPN 也可用 M4 MacBook Pro 開箱影片流出 3 個 USB-C + 標準 16 GB RAM + 跑分結果 【教學】iOS 18 延長電池壽命幫到手 一個設定保養電池
二）刪除不需要的資料
如果大家用緊嘅裝置，係只有 16GB 容量，呢一步就一定要做了。因為每年新 iOS 推出時，都有用家表示愛機唔夠位下載新 OS，搞到要 hard reset 部機之後先可以升級。雖然有消息指今年的 iOS 9 係體積上比舊年 iOS 8「纖體」咗唔少，但為安全計，建議大家先刪除愛機入面唔需要的檔案，例如：音樂、影片等，尤其係唔少串流煲劇、聽歌 APP 入面，都會俾大家預先下載定歌同影片，方便係離線情況下都可以欣賞得到，但一般呢啲多媒體檔案先係最佔空間的「元凶」！其次要刪除的就係好少用或者甚至無乜機會用嘅 APP，反正都係佔空間，不如升級前先刪除。其實而家好多嘢都已經備份去 Cloud，所以為保升級順利，都係預先移除，升級後下載番就 ok 了。
三）預先升級 APP 至最新版本
其實 iOS 9 的測試版本，由六月的 WWDC 起計算，至今 3 個月已推出了多個封測或公測版本，唔少係 App Store 上面嘅 APP 都已經升級至支援 iOS 9 作業系統。所以如果大家平時無乜動力升級 APP，但又想升級去 iOS 9 之後即時用到哂大部分 APP 又唔會出現撞 APP 情況，係升級前都係先 update 下愛機入面啲 APP 先啦，唔好咁懶！但記得係 Wi-Fi 環境下先好 update 呀，唔係都幾哂 data 㗎！
相關文章:
【教學】iOS 18.1 如何用 Apple Intelligence 只需 2 個設定 + 香港免 VPN 也可用 M4 MacBook Pro 開箱影片流出 3 個 USB-C + 標準 16 GB RAM + 跑分結果 【教學】iOS 18 延長電池壽命幫到手 一個設定保養電池
四）備份你的裝置
好啦，如果裝置支援升級至 iOS 9，又已經刪除不必要檔案同埋升級埋所有 APPS，大家都唔好太興奮住！因為係升級之前，為安全自然都係為部愛機備份好先啦！最簡單就係備份去 iCloud，萬一升級之後有咩三長兩短局住要 hard reset，都可以還原得番機入面嘅歌、相、片、APP 等。至於方法就好簡單，進入設定的 iCloud，再揀「備份」–>「立即備份」就可以了。但如果大家真係要用 iCloud 備份，建議大家最好係今晚 11 點前備份好，因為當 iOS 9 升級一出之後，以筆者經驗屆時 iCloud 伺服器都會超級繁忙，好多時都會備份失敗。所以，先備份先贏。
如果大家番唔切屋企或者去唔切有 Wi-Fi 嘅地方，將愛機資料備份去 iCloud，就唯有駁線接駁電腦，然後透過 iTunes 將資料備份去電腦啦。只要接駁後打開 iTunes（一般來講都會自動開啟），然後係「備份」度選擇「這部電腦」，之後再揀旁邊「立即備份」就可以了。
五）建議用電腦升級
做哂上面 4 步，大家而家就真係可以升級勒！不過嘛，如果大家急住想今晚到凌晨升級，希望聽日番工個時已經用到 iOS 9，雖然大家可以用裝置入面嘅 OTA 升級（設定 –> 一般 –> 軟件更新），但今晚一次過咁多人都想搶住嘗鮮，肯定會網絡大塞車，用 OTA 輕則要 5、6 個鐘先 download 得哂個 iOS 9，重則升級失敗隨時愛機變磚！（筆者以前試過啦，一殼眼淚……）所以為安全計，建議大家都係用 Lightning 線接駁電腦，透過 iTunes 升級啦！睇番第 4 步個張圖，接駁後大家只要點按「檢查更新項目」，然後按指示做就得㗎啦，好簡單！不過記住升級個時千祈唔好斷開愛機同電腦之間嘅連線，否則輕則升級失敗，重則隨時變磚！
另外，升級完成之後，好多人都會 feel 到部機變窒咗，以筆者經驗最好再來一次 hard reset，之後就透過 iCloud 或者 iTunes 接駁電腦（視乎你的備份資料備份咗去邊度），將備份檔匯入去 hard reset 後嘅裝置，咁就大功告成啦！
仲有一點提提大家，如果大家屋企有任何 Mac OS X 的裝置，建議優先考慮用佢地接駁裝置升級 iOS 9，因為以筆者經驗，接駁 Mac OS X 的電腦為 iOS 裝置升級 OS，會遠比接駁 Windows 的電腦穩定同快。
相關影片﹕
相關文章:
【教學】iOS 18.1 如何用 Apple Intelligence 只需 2 個設定 + 香港免 VPN 也可用 M4 MacBook Pro 開箱影片流出 3 個 USB-C + 標準 16 GB RAM + 跑分結果 【教學】iOS 18 延長電池壽命幫到手 一個設定保養電池
分享到 :
最新影片
