如果你有留意到，近排 Facebook 狂推播片功能，有片的 Post 多左好多，尤其係個啲貓貓狗狗兔兔BB 的片，有時真係令人招架不住成日想㩒入去睇 :3 。而上個月，Facebook 亦都緊貼潮流，加推「直播」Facebook Live 功能，不過好可惜，只限有 Facebook Mentions 的藍剔人士使用，好似我呢啲毫不起眼的平民百姓就連試玩的機會都冇，雖然我的宅宅生活都冇咩好直播 share，但有時無聊總想試下玩新功能架嘛，你地話係咪先！
我相信有冒險精神、鍾意試新玩具的人不只我一個，有公司就食正呢個位，整左個叫「17」的 App，俾平民玩直播，我見到有唔少網絡紅人都有玩，我梗係唔執輸，首先上網睇睇隻 App 邊個整先 （你知啦，近來有好多強國 App 有伏丫嘛 XD），先下載試玩。一 search，見到竟然咁快就有繁中版，通常外國 App 都唔會咁快有中文版，原來隻 App 係台灣野，咁我都放心少少，就開始玩喇～
界面同用法同 Instagram 一模一樣，會唔會俾人告抄襲架？ 不過佢除左有直播，仲有一個「無限俾 Like」功能，即係當你見到一張相/一段直播，你好鍾意，你就可以瘋狂俾 Like，所以當你見到一個人明明得 30 個 Followers，但有 7,000 幾個 Like，你就知道，Like 數係不足以反映人氣架！
另外，不得不提的就係佢個直播功能，非常易用，按 Start 就可以開始對住空氣做 Live，老實講，其實就好似公開版的 Facetime，同全世界視象通話，分享你 坐係屋企 ON99 個樣 的趣事。琴晚試用，我就唔做直播啦，反正都冇人睇，我去左睇人地啲直播，悉逢我又開 OT，很夜先返到屋企，我就一路睇住個靚仔直播，一路食飯（媽呀，我好毒！我認我空虛寂寞凍?），其實真係好似有人同你食飯傾計咁，幾得意的。係呢個人人係記者的年代，如果有突發事件，人人都可以用黎做直播，不過佢冇錄影功能，播完就冇底…
不過，我諗我唔會玩好耐，首先個 App 簡直係燃燒 Data 同電，仲搞到我部電話好似著火咁熱！另外，因為驟眼睇呢個平台啲人太過猖狂，打開 Find Friends，個個都好暴露，而且多人睇個啲直播都係有好多不良意識的，同我呢啲走鄰家女孩路線的良家婦女實在好唔夾?。
之但係咁，我其實覺得 17 好有潛力做個人網台，如果俾我主持一個節目，我都有諗過不如開一個讀書 Channel，每日直播同大家讀半小時書中精選段落，一來唔使逼人講＆聽廢話，二來有人讀書你聽有一種重返童年的感覺（唔係用特別的讀書技巧！），哈哈～書可以觀眾揀又或者我自己揀，之後又可以去 Post 張相出黎係個度討論?，嗯，發夢真係好容易！現實邊鬼度會有人睇你讀書同討論，一定覺得你勁悶啦～～我都係玩返 Facebook 同 Instagram 算。
分享到 :
最新影片
