之前一直傳出 BlackBerry 會係今年推出旗下首部預載 Android 作業系統嘅智能手機，最近終於有聲氣了！該公司嘅 CEO John Chen 係接受 BNN 訪問時，就拿住呢部名為 Priv 嘅 Android 手機現身，據 CEO 係訪問中表示會係一部 5.5 吋大芒手機，亦會採用曲面熒幕，唔知各位 wire 民有冇興趣呢？
據 John Chen 係訪問中表示，呢部全新手機係以「Google」運作，而非直接用 Android 字眼，John 亦表示 Priv 會內建滑出式機械 qwerty 鍵盤，而該鍵盤亦設有感應器，可以好似 Passport 一樣，就算唔按下任何按鍵，都可以透過不同手勢操控手機。
不過係訪問中，該名 CEO 似乎連操作 Chrome 時都好似出現問題，要禁幾次先開到 APP，所有設定又未完成，睇來呢部機真係新鮮滾熱辣係生產線入面拿出來曝光，而唔係一早有 BlackBerry 員工設定好兼測試好無問題先拿出來。呢一方面，好似有啲失策喎……唔知呢個預備不足嘅 demo，會唔會打擊大家對 Priv 嘅信心呢？
來源：BNN
分享到 :
最新影片
