早兩日 Microsoft 係美國舉行記者會，推出一系列吸引產品，包括：Surface Pro 4、Surface Book、Lumia 950 及 950 XL 等。兩日後旋即係香港舉行記者會，雖然呢啲新產品仍未現身，但都一次過哂冷展示超過廿款預載 Windows 10 機款。究竟佢哋正唔正？就等 Edward 帶大家去現場，精選 5 部最「吸睛」機款同大家介紹下！
▲今次 Microsoft 一次過展示超過廿部預載 Windows 10 的機款，有些是早已曝光過的款式，有些則是全新機款。而家就等 Edward 精選 5 部吸引機款介紹俾大家啦！
抄足 Surface Pro？Lenovo Miix 700
今次講起新機，最特別應該都係呢部 Lenovo Miix 700，其實睇外形真係抄 Microsoft Surface Pro 抄得好足，不過佢嘅機座位就支援多角度擺放，呢點就真係比 SP 強啦。至於規格方面，佢採用全新 Intel Core M5-6Y54 1.1GHz 處理器及 8GB RAM，另外亦備有 Core M7 處理器機款，亦可另配支援 Intel RealSense 3D 技術的鏡頭。熒幕方面為 12 吋 2,160 x 1,440 解像度，亦支援 3G / 4G 網絡上網。售價為 $6,998 起。
▲唔睇真真係唔知呢部係 Lenovo Miix 700 而唔係 Microsoft Surface Pro。
▲設有絞鏈式轉絞，可以好穩陣用唔同角度擺放 Miix 700。
▲機身左邊只有一個 USB 端子。
▲右邊就設有開關鍵、音量鍵、另一個 USB 插槽及 HDMI 輸出插槽。
▲唔止同 Surface Pro 一樣 microSD 記憶卡插槽設於被機座覆蓋的位置，就連 3G / 4G SIM 卡插槽都係呢度。
▲Lenovo Miix 700 規格。
火紅魅力！HP Pavilion x2
另一部比較吸引的 Windows 10 新機，應該都係呢部 HP Pavilion x2。吸引重點自然係部機嘅全身火紅顏色，真係好搶眼。另一搶眼點係熒幕右下角位置見到「B&O」字眼，可見一部細細合體機，都內建 B&O 名廠喇叭，可以預期音質應該都有番咁上下。仲有一項特點，就係佢個鍵盤底座，大家平時可以拆個熒幕出來當 tablet 用，當要打字個時將熒幕部分放入接口就可以變身成為手提電腦，而且接口採用磁力吸附設計，無論要拔出熒幕定接駁鍵盤，都真係 so easy！佢仲採用 Intel Bay Trail-T Atom 處理器，熒幕為 10.1 吋 1,280 x 800 解像度，呢一點就似乎比較失色。其他規格包括：2GB RAM、32GB 內建儲存空間、USB 2.0 插槽、支援 USB Type-C 插槽、內建 Micro-HDMI 視頻輸出及 12 小時使用時間。售價為 $3,899，都幾抵買。
▲火紅色機身，真係幾靚！
▲連鍵盤底座都係紅色，襯埋一套㗎！
▲採用磁力吸附設計，無論拆出定係接駁都超 easy！
▲採用 B&O 喇叭，可以預期音質應該都會唔錯。
▲採用最新 Intel Atom 處理器。
輕薄高效！Dell XPS 13
如果大家想買番部正正經經嘅商務手提電腦，Dell XPS 13 都係一部值得留意的機款，佢重量只有 1.18kg，厚度最薄位置只得 9mm，作為一部 13 吋熒幕手提電腦，真係幾輕薄。另外，佢亦內建 UltraSharp QHD+ 3,200 x 1,800 觸控熒幕，加上 Intel i7-5500U 處理器、8GB RAM 及 512GB SSD 硬碟，使用時間更可長達 11 小時，真係一部幾乎完美的商務機款。售價方面都算幾貴，售 $14,999。
▲Dell XPS 13 作為一部商務 13 吋熒幕手提電腦，1.18kg 真係好輕。
▲值得留意係佢雖然內建 13 吋熒幕，但由於採用幼邊框設計，所以機身都唔係太大。
▲預載 Windows 10 作業系統。
▲XPS 13 的 QHD+ 熒幕，解像度超高，顯示細字都好清晰。
▲採用 full-size 鍵盤，筆者試過打字起來都幾舒服。
▲XPS 13 規格認真強橫。
Kitty 迷必買！Hello Kitty Grace 10 / 10 Light
其實呢部 Hello Kitty 迷上身的 Windows 10 平板電腦，之前都已經曝過光，今日 Edward 終於有機會試玩一下。事實上規格並不是太強，都係採用 Intel Baytrail-T X86 Z3735F 處理器、2GB RAM、32GB 內置儲存空間及 10.1 吋 1,280 x 800 解像度熒幕，不過機背、機身同埋牆紙都加入 Hello Kitty 元素，如果妳係 Kitty 粉絲，應該對呢部機完全零抗拒力吧？售價方面為 $2,488（Grace 10）/ $2,788（Grace 10 Light），都算抵玩。
▲Hello Kitty Grace 10 Light 採用粉紅色 + 黑色鍵盤底座加上黑色機身，真係幾靚。
▲機背及枕手位都印有 Hello Kitty logo！
▲就連 Windows 10 入面都預載了 Hello Kitty 牆紙。
▲而 Hello Kitty Grace 10 就採用全白色機身。
▲機背同埋枕手位同樣有 Hello Kitty 圖案，不過由於 Grace 10 比較平，所以線條同圖案會比 Grace 10 Light 簡單。
▲Grace 10 一樣都有 Hello Kitty 牆紙預載係 Windows 10 內。
▲另外 Grace 10 及 Grace 10 Light 均是採用合體設計，可當作一般平板使用，要打字時都可以插入鍵盤底座使用。
分享到 :
最新影片
