出名為食嘅癲噹因為念念不忘夢見屋嘅美食,毅然去應徵做店長,仲搵埋好友阿讚幫手做廚師添!我依莉詩今日就去咗愉景新城的荃灣店探班,順便試下佢地嘅新菜單。
和服癲噹無處不在
未入到餐廳,門口已經有兩隻身穿和服同店長 look 嘅癲噹分身出嚟歡迎你。原本日式風格嘅店內,無論壁畫、掛畫、卡通吊燈 同 門簾都換成癲噹同阿讚嘅嘜頭,佈置十分有心思。而且每張枱都有癲噹公仔陪你食嘢,真係忍唔住要同佢嚟個深情擁抱。如果好彩,仲有機會見到癲噹店長真身,粉絲記得拎定相機同佢合照啊!
▲ 門口嘅癲噹一身店長打扮拎住癲噹餐牌歡迎你,相當萌啊!
▲ 坐位上面已經有多隻唔同大細嘅癲噹公仔得緊你同佢食嘢。
▲ 餐廳佈置非常細心,能夠係和風裝修中加入癲噹元素,又不失餐廳原有嘅風格,係靛藍色嘅和風門簾上印有和服造型嘅癲噹就更加分不少。
鹹甜點款式多
夢見屋係 Italian Tomato 旗下餐廳之一,甜品當然有番咁上下水準,而今次限定嘅癲噹 menu 鹹甜點樣樣齊,丼飯、烏冬、芭菲、班戟等,去食正餐定 tea 都得。依家仲加埋癲噹同阿讚嘅萌樣,就加更要相機食先。而我最鍾意食萌貓芝心年糕,唔單止印有癲噹嘅可愛大頭,而且相當”芝”味,煙韌嘅年糕包住半熔芝士,一啖咬落去,流心芝士湧出嚟,夾埋爽脆嘅紫菜,味道同口感又提升到另一種層次。
▲萌貓芝心年糕 $32
印有癲噹嘅可愛大頭,不過千奇唔好掛住影相,因為要襯熱食,年糕先會夠煙韌,有流心芝士嘅效果架!
▲ 香趣雞塊伴貓咖喱飯定食 $83
用紫菜粉灑出嚟嘅癲噹飯造型可愛,配上獨家調製日式咖喱,唔會好辣,又有咖喱香味。入面嘅雞塊雖然唔算大,不過都炸得金黃嫩滑。
▲ 調皮貓湯烏冬定食 $55
大大塊嘅腐皮吸收咗湯底嘅精華,變得非常清甜,而燙有癲噹圖案嘅鳴門卷又相當可愛。呢個定食味道清新,而且份量比較少,適合細食嘅女仔。
▲ 滑蛋吉列豬扒癲丼定食 HK$78
呢個定食只係用咗癲噹碗盛載,食物方面無特別處理,未必滿足到相機食先嘅朋友仔啦!
▲癲噹兒童定食 $58
如果去過愉景新城嘅朋友都應該會發現呢度幾乎所有餐廳都有兒童餐。癲噹咁可愛,當然都唔例外,玩具車上放有奄列茄汁雞肉飯配雞尾腸沙律、曲奇、棉花糖同橙汁或牛奶,小朋友一定鍾意。而且叫兒童定食仲會送上一本超得意嘅癲噹填色簿添!
▲ 填色簿上有多隻癲噹教小朋友生字,食得健康又有教育成份,父母就更安心。
▲ 士多啤梨梨貓屋吐司 $65
甜品嘅貌相永遠都係最吸引!燙上癲噹貓樣嘅吐司上面放上鮮甜厚肉嘅士多啤梨 同 奶味香濃嘅北海道 3.7牛乳軟雪糕,睇得又食得。另外仲有蜜糖同抹茶紅豆口味,同樣都係咁大埋頭架!
▲ 香蕉朱古力喵班戟 $54
除咗吐司,班戟亦都非常吸引。又厚又鬆軟嘅班戟伴以香蕉 同 北海道 3.7 牛乳軟雪糕,最後加上甜甜嘅朱古力醬同朱古力碎,食落冷熱交替,令人一試難忘。另外仲有士多啤梨同蜜糖班戟選擇,賣相同樣精緻。
▲彩虹喵芭菲 (左)、噹噹紅芭菲 $55
北海道 3.7 牛乳軟雪糕加上層層水果同粟米片,色彩豐富之餘更有多層口感,每一啖都有唔同嘅感覺。
▲ 愛睡貓之夢 $58
呢個甜品之所以叫愛睡貓之夢因為你可以自己揀每日新鮮製造嘅蛋糕同雪糕口味,雙重甜蜜,食完一定可以發個好夢。
▲ 北海道 3.7 牛乳貓咪軟雪糕、抹茶貓咪軟雪糕 $22
如果主食食得太飽但又想食個甜品令餐飯圓滿 D ,可以叫番個軟雪糕食下。用有癲噹同阿讚嘅萌樣甜品杯裝住,食落都唔同 D !
▲癲噹熱牛奶抹茶、癲噹熱朱古力 $32
牛奶抹茶入口清新,帶點點青澀,而朱古力味道香濃,最啱秋冬暖身。
▲ 雖然呢間主題餐廳無 Pop-up Store,不過你都可以惠顧任何食品,加 $148 將「夢見屋 X癲噹餐具禮盒」帶番屋企。癲噹碗同貓耳盤可以分開用,合埋又變番完整嘅貓頭,超萌啊!
依莉詩:「無特別加價,加咗癲噹更睇得!」
癲噹嘅人氣始終比唔上叮噹或者蛋黃哥,不過 Italian Tomato 食品一向有番咁上下水準,而且今次限定嘅癲噹 menu 鹹甜點都有,想食正餐定下午茶都得,而且無特別加價,應該可以吸引唔少人慕名而來。至於佈置方面,估唔到和風裝修同癲噹都可以咁夾,環境都坐得幾舒服,值得食番個甜品,坐番個下晝!
夢見屋 x 癲噹主題餐廳
地址:荃灣青山公路398愉景新城商場 1 樓 1028 號舖
電話:2493 2183
營業時間:11am-10:00pm
分享到 :
最新影片
![](https://cdn.unwire.hk/wp-content/uploads/2024/09/iphone16_d_web2-694x390.jpg)