好啦，昨晚為大家速試過 iPad Pro 兩件必買配件，今日就等筆者回歸番部機，同大家試下 iPad Pro 本身嘅表現啦，而首先就由熒幕開始。
史上最大解像度 iPad 熒幕
今次嘅 iPad Pro，重點自然放係熒幕上面，唔止因為佢係史上最大熒幕尺寸嘅 iPad（以前最大都係 10.1 吋，而 iPad Pro 為 12.9 吋），仲要係熒幕解像度最高嘅 iPad（以前最高 Retina 熒幕都係 2048 x 1536，而 iPad Pro 就達到 2732 x 2048，足足達到 560 萬像素！而顯示範圍方面，比 iPad Air 2 仲要大 78%，而筆者手上拿來相同解像度嘅 iPad mini 4，同 iPad Pro 比一比，果然 iPad Pro 睇網頁個時真係睇得更多內容！可見擁有最大解像度兼最大尺寸熒幕嘅 iPad Pro，應該無論睇文件、睇雜誌、睇網頁、甚至睇戲，都有唔錯效果。值得一提嘅係，根據 Apple 官方表示，當你拿住 iPad Pro 睇戲嘅效果，可以媲美你坐係梳化睇住 65 吋電視嘅視覺效果，所以大家第日要係「大電視」睇戲，就真係隨街都睇到啦。
▲用 iPad mini 4 睇設定頁，橫向睇個時可以見到最底項設定只係 TouchID 與密碼。
▲再用 email 睇，可以見到只係睇到 7 封 email，右邊都係睇到第三段文嘅標題位置。
▲用 iPad Pro 睇，睇到嘅範圍仲大，見到選項最底去到私隱，而且右邊空白空間多咗好多。
▲再係 iPad Pro 上面睇相同 email 戶口，可以見到左邊已經睇到 9 封 email，而右邊更加可以睇哂整篇文章，可見 iPad Pro 熒幕真係睇多好多嘢。
▲其實 iPad Pro 個熒幕咁大，用來打機都真係幾爽！
熒幕色準 + 可視角度維持高水準
至於色水方面，iPad Pro 維持一貫 Apple 產品優質熒幕嘅標準，雖然都仍係採用 LED 背光 IPS LCD 熒幕，但色準都仲係好準確，而且顏色都幾自然，無論係睇 YouTube 影片、睇 iTunes 影片、甚至打機，都有好舒服嘅效果。此外，可視角度都仍然係好高，從兩側睇都唔覺有變色或者變暗情況，效果真係幾好。
▲係 iPad Pro 上面用 Safari 無論係睇 unwire.hk 定係上高登，都睇得幾舒服，細字唔洗放大都睇得清楚。
▲睇片方面，筆者係 iTunes 借咗《破風》HD 版來睇，質素都算唔錯，色彩亦十分自然。
▲筆者亦用來玩《Real Racing 3》，畫面亦十分細膩。
▲可視角度都好高，係側面睇都唔覺色彩同正面睇有唔同，亦唔覺有變暗嘅情況。
為咗拿到較客觀數據，筆者再用 Spyder 5 測試 iPad Pro 熒幕嘅顏色準確度，照睇白平衡來講，佢嘅白色讀數測試出來為 6843K，同真正白色嘅 6500K 幾接近，所以可見 iPad Pro 嘅熒幕，確實係準色嘅。
▲用 Spyder 5 測試 iPad Pro 熒幕嘅色準程度。
▲白色讀數結果為 6843K，白平衡算係幾準㗎啦！另外最光情況下亮度都有 368.86 cd/m2，應該都已經好夠光。
相關文章:
【教學】iPhone 連 Wi-Fi 自動關流動數據 離開 Wi-Fi 自動啟動 、不怕誤用數據 【教學】ChatGPT 香港人付款攻略 毋須外國信用卡訂閱 ChatGPT Plus 【教學】iOS 18.2 Image Playground 好玩教學 生成自己樣子 Emoji + 用自己樣製作卡通圖片
小心影片唔夠 res 會起格
之前都同大家分享過，iPad Pro 擁有史上最高解像度嘅 iPad 熒幕，但佢似乎無任何為影片升頻嘅晶片或軟件，於是就會出現一個問題：如果你睇解像度唔夠高嘅影片，極有可能會出現起格情況。筆者就試過用來睇 1080p 都仲還好，如果睇 720p 或更低解像度嘅影片，就會出現俗稱「起狗牙」嘅情況。所以如果大家要係 iPad Pro 上面睇片，真係要確保影片有足夠解像度先好，當然如果你唔介意影像質素，其實又無乜大不了嘅。
▲由於 iPad Pro 熒幕解像度超高，所以睇唔夠解像度嘅影片，可能會出現「起狗瓦」情況，筆者試過用 YouTube 1080p 60fps 影片測試，效果都仲算 OK。
▲放大 100% 來睇，可以見到都未至於去到「起狗瓦」情況。
▲當筆者再用更低解像度嘅影片（maybe 720p）去測試個時，就見到有明顯「起狗瓦」情況，只有字幕文字係夠銳利。
▲放大 100% 來睇，大家就更加見到個「起狗瓦」情況了。
總結：熒幕算係幾唔錯
整體來講，iPad Pro 挾著最大尺寸同最高解像度 iPad 熒幕嘅優勢，係顯示上見到其造工都一啲唔馬虎，質素仍然保持到過往歷代 iPad 嘅水準之餘，又可以令大家睇多啲、 睇闊 / 長啲，對於用來睇雜誌、睇相或者睇網頁，就尤其好用！如果你問 Edward，對熒幕其實就無乜好大意見，用落真係幾滿意，如果大家係追求有一定質素熒幕嘅大平板，iPad Pro 真係可以考慮！
相關文章:
【教學】iPhone 連 Wi-Fi 自動關流動數據 離開 Wi-Fi 自動啟動 、不怕誤用數據 【教學】ChatGPT 香港人付款攻略 毋須外國信用卡訂閱 ChatGPT Plus 【教學】iOS 18.2 Image Playground 好玩教學 生成自己樣子 Emoji + 用自己樣製作卡通圖片
分享到 :
最新影片
