上星期同大家測試過 Apple 最新推出嘅「巨無霸」平板 iPad Pro，好多人覺得呢部機應該係 Apple 主攻專業界別嘅用家，例如：設計師、畫家、工程師、醫療機構等等。咁真係專家又點睇部機？Edward 就專訪咗 5 大界別嘅人，包括：微電影導演 + 唱作人、設計師、建築師、記者同埋 gadget lover，睇睇佢哋又覺得部 iPad Pro 點？
玩下 OK 但做嘢唔夠用
微電影導演 + 唱作人文恩澄
輕過我部 MBP 好多
如果聽歌資歷有一定年資嘅 wire 民，應該都會記得文恩澄 Rannes 吧？近年 Rannes 已經主力已唔係寫歌唱歌，而係做影片製作及拍攝微電影，閒時亦會幫人影婚照拍片一腳踢。佢上星期五玩過部 iPad Pro 之後，就覺得部機真係輕過平時用部 MacBook Pro 好多：「平時出街做嘢，帶住部 MBP 真係幾重，加上攝錄器材都有番咁上下重量，負擔真係幾大！但 iPad Pro 真係好輕，就算加埋個 Smart Keyboard 都輕過平時部 MBP 好多，拿出街真係超方便！」
iPad Pro 上的 iMovie 比預期好用
不過 Rannes 試過用 iMovie 剪片後，就覺得 iPad Pro 對佢工作上幫助唔算太大：「因為平時拍片都係用大機（即係 Canon 5D Mark III 個類），頭先試過將影片用 Lightning 手指過落部 iPad Pro 度嘗試剪片，但發覺似乎出現格式唔支援嘅問題，而我哋又總唔可以係個客面前拿部 iPhone 出來拍片吧？加上平時剪片都係用開 Adobe Premiere Pro 或者 Final Cut Pro，而 iPad Pro 又暫時無呢兩個軟件，用來做嘢真係幫助唔大。」不過 Rannes 係 iPad Pro 上面試過 iMovie 後，都驚訝原來而家 iMovie 都做到好多嘢，加上係部咁大熒幕嘅平板上面剪片，真係幾方便，如果閒時用來剪下非工作嘅影片，又真係幾方便。
但 Rannes 都覺得 iPad Pro 有 12.9 吋大熒幕，當剪好片之後拿出街 show 俾客睇，點都比係部 iPhone 咁細嘅熒幕舒服得多，而且又輕過部 MBP，如果唔洗即時 edit，iPad Pro 真係可以幫到佢出去見客時唔洗咁重負擔。唯一係支 Apple Pencil 無得吸係 iPad Pro 機身上面，如果用完唔即時袋番埋真係會好易唔見……
彈到兩個八度
另外，Rannes 作為唱作人，平時都有作下歌彈下琴，佢手癮起拿起 iPad Pro 就打開 Garageband 玩下，佢覺得 iPad Pro 有成 12.9 吋熒幕，加上解像度又夠高，平時係 iPad Air 彈琴都係彈得一個八度，但係 iPad Pro 上面就可以彈到兩個八度，用來彈琴或者打鼓真係爽好多！不過都係個句：平時用來玩下輕鬆下就 OK，用來作歌都係係番電腦上面方便啲。
用來執相好正！
設計師 Rayman
有真筆的感覺
咁設計師又點睇 iPad Pro？我哋就搵來 Rayman 來試下。佢一向都鐘意畫畫，而且主力畫掃描畫為主，所以拿起部 iPad Pro，再打開 Procreate 3，再拿起支 Apple Pencil 試玩：「真係好正！估唔到 iPad Pro 配合支 Apple Pencil，真係做到好似一般用畫筆同紙畫掃描畫嘅感覺，加上佢有 palm rest 設計，就算放隻手係熒幕上面畫畫都唔怕誤觸，唔洗吊住隻手來畫，呢個設計都幾正。」Rayman 仲補充話支 Apple Pencil 靈敏度好高，用來畫畫唔會有斷線情況，加上壓感真係做到佢想畫嘅效果，鍾意畫畫嘅人佢推薦真係可以考慮入手。
做到七成 iMac 執相效果
Rayman 平時除咗畫畫，工作上都需要執相或者畫圖，所以佢都即時下載咗 Adobe 嘅 Photoshop Fix 同埋 Adobe Illustrator Draw 來用，前者主要用來執相，後者就用來畫圖。「用 Photoshop Fix 真係有驚喜，用 Apple Pencil 加上 iPad Pro 真係可以做到係 iMac 上面執相嘅 7 成效果，就連 clone 等功能都做到，如果真係買咗，以後簡單嘅執相工序隨時係街都可以搞到相，唔洗返到 office 先係 iMac 上面做，效率會快好多！至於 Illustrator Draw，佢似乎暫時未支援壓感，配埋支 Apple Pencil 好似同手指畫分別唔大，如果真係要畫圖似乎都係 Procreate 3 好用好多。」
未取代到 Notebook
整體來講，Rayman 以前未試過係紙以外畫 sketch 同埋畫圖，今次感覺幾新鮮。「iPad Pro 真係幾輕幾方便，有時要係張相度 mark 位俾同事做 retouch，Apple Pencil 細緻嘅筆觸都可以幫到手。另外以前 present 會用 iPad 2，但做嘢都係用手提電腦、甚至 iMac。不過如果有個鍵盤座，拿出去 present 都方便，只要唔洗長時間拿住部機就 OK。」不過 Rayman 都覺得手提電腦始終有佢難以取代嘅功能：「有時要 output 出去同印刷廠夾，手提電腦係過 file 同支援上真係仍然比 iPad 好得多，要講取代手提電腦大部分可能要俾多幾年時間。」不過 Rayman 覺得 iPad Pro 始終係行 iOS，係佢工作上始終好難取代手提電腦。
以後唔洗帶紙筆出街做嘢！
建築師 + 室內設計師 Edward
反應好快 PDF 即畫即有
Edward 佢本身係建築師，亦有兼做室內設計，行內亦獲得過唔少獎項。佢試玩過 iPad Pro 同埋 Apple Pencil 之後，都好驚訝一部平板可以做到咁多嘢：「以前出去 present 都會拿部 iPad Air 去做，但熒幕唔夠大，所以最終都係用番手提電腦。iPad Pro 熒幕夠哂大，拿出去 present 完全夠用。另外，佢反應都好快，而且用支筆（Apple Pencil）係 PDF 文件上面可以即時因應客戶回應而加入附註，仲唔止係文字，亦可以畫圖、圈低重點，然後圖文並茂咁 send 番比另一 team 同事跟進，可以配合到我哋嘅專業需要。」不過 Edward 都覺得 PDF 附註個度，線條粗幼得 3 款可以揀，似乎比較少，如果可以多幾種選擇，或者可以用 Apple Pencil 直接用壓感畫到粗幼，咁就最好了。
個 Keyboard 先係重點
至於掃描方面，Apple Pencil 支援壓感令畫出線條可粗可幼可深可淺，對 Edward 工作上都有好大幫助：「好多時開個新 project，最開始都要用掃描畫低構思，以前可能要帶紙同埋鉛筆或者鋼筆出街畫，而家係部 iPad Pro 上面，加埋支 Apple Pencil，再配合可以支援 Apple Pencil 嘅 APP，就可以做到相同效果，真係幾令我意外。」Edward 亦試過 Smart Keyboard，佢覺得個鍵盤手感幾好，反應都幾快：「之前有試過 iPad Air 嘅鍵盤，會有 lag 嘅情況出現，但 iPad Pro 嘅 Smart Keyboard 流暢度好好，打字起來手感同係手提電腦差唔多，可以幫到我哋快速隨時隨地回覆客戶電郵，或者記下開會重點，我覺得佢比支 Apple Pencil 更能幫到我嘅工作！」
另外，室內設計上，佢覺得 iOS 入面可供選擇嘅 APP 唔多，始終未能取代手提電腦上面現有 3D 軟件咁仔細嘅效果：「不過初步展示方案或者比較都可以係 iPad Pro 上面做到，某程度上都幫得到，但唔算多。」
用來畫 storyboard 好正
著名記者柳俊江 Ryan
按鍵回彈力不錯
Edward 自己都係記者，作為廿一世紀嘅文字工作者，自然深深明白鍵盤同埋一部輕身裝置對於需要四圍走採訪做嘢嘅記者有幾重要。我哋亦搵來著名前記者，而家係專欄作家嘅柳俊江 Ryan 試下部 iPad Pro，重點自然係試下個 Smart Keyboard：「平時我都會用 Mac 電腦打稿，但個鍵盤按鍵有少少金屬質地，好易痴手油，要抹都幾麻煩，而且按鍵邊位有空隙，好易跌塵入去；而 iPad Pro 個鍵盤表面有層纖維，但採用密封設計，加上有生活防水功能，就算倒瀉咖啡上去都唔驚整壞，個設計真係幾好。加上按鍵本身回彈力都唔錯，感覺好似比係 Mac 電腦上面打稿更正！」
畫 Storyboard 好正
至於畫畫方面，Ryan 試過感覺都好正：「佢支筆支援壓感，平時度節目我都要畫 storyboard 然後同客戶 present，以前主要都係喺部 Mac 手提電腦上面配合埋畫板做，加埋仲要配合好多 APP，例如：Photoshop 等，都幾麻煩。而家 iPad Pro 加埋支 Apple Pencil，配合 Procreate 3 來用，用來畫 sketch 畫 storyboard 真係幾方便，可以拼埋圖入去再係上面畫嘢，如果有咗佢出街做嘢以後就方便好多，唔洗等到番屋企先做。」
Ryan 仲補充話以前出去做嘢好多時都會帶 MacBook Pro，因為除咗寫嘢，好多時見客 present 都要部啱洗嘅電腦 show 圖像，所以都幾重。之前 Microsoft 推出 Surface Pro 佢都有心動過，但用落感覺同部 MBP 差好遠。但今次試過 iPad Pro 之後都幾吸引，加上定價唔算太高，佢都會考慮入手 4G 版，因為工作上，尤其是畫嘢上真係幫到手。
令 iPad Air 定位更尷尬
Gadget Lover Dom
未取代到 Notebook
最後，相信有唔少 gadget lover 都有考慮過係咪入手 iPad Pro，於是我哋都訪問過本身係 Apple fans，亦年中試唔少產品嘅 Dom。佢試用過 iPad Pro 之後，就一試愛上：「佢個 Smart Keyboard 打字幾舒服，打字起來都幾正，不過打字聲比以前用開配對 iPad Air 2 嘅 Logitech 鍵盤大，而且鍵盤無設獨立熒幕擷取鍵，轉換輸入法 hotkey 又同 Mac OS 好唔同，如果要用佢取代手提電腦，呢一點 Apple 睇來可以重點加強。」
初步感覺比 Wacom 更好
之後 Dom 再試用 Apple Pencil，同樣感覺好好：「我用 Paper 個時都覺得無乜嘢，只係覺得佢支筆畫畫比用 Paper 支筆落筆快好多，基本上一畫線條就跟住筆頭出現，我覺得甚至比 WACOM 更好。之後再試 Procreate 3，感覺真係做到真紙筆嘅效果，無論係壓感定係筆觸，都做到就算好仔細嘅線條都可以好準確咁畫出來，以後完全唔洗拿紙筆出街都畫到畫同 jot notes 了。」佢覺得如果經常需要用紙筆 take notes，又或者畫家鍾意去到邊畫到邊，iPad Pro + Apple Pencil 呢個組合真係必買：「唯一係擔心支筆好易唔見囉！」
不過 Dom 都覺得呢部 iPad Pro 令 iPad Air 系列定位更尷尬：「如果真係要買大熒幕 iPad，真係寧願會考慮 iPad Pro，因為熒幕更大，又做到哂 iPad Air 本身嘅功能，又唔算重得好多，如果好似我咁經常要出差，又要成日打字，夜晚番到酒店又想有番啲娛樂嘅話，iPad Pro 真係完勝；相反如果真係要好輕，咁啲人就會走咗去買 iPad mini 系列。」不過 Dom 話佢啱啱先換咗用 iPad Air 2，應該都未必會入手 iPad Pro，但當第二代推出個時，而佢又咁啱要換平板，iPad Pro 系列將會係佢嘅首選。
