聖誕將至，各個商場除了用卡通人物的裝飾作招來外，不少更加入科技元素，希望遊人有新的互動體驗，而其中一個裝置就是以應用程式改變聖誕樹上的 LED 燈變色。依莉詩早前就有幸訪問到裝置的設計者「星之子」陳易希。
▲ 不管你記唔記得陳易希是誰，不過當年的小子今日已經長大成人，仲同拍拖 4年幾的女朋友一同展示成果。
6 位數字創作互動聖誕樹
一開始小編見到眼前一棵只有一條長長 LED 燈的聖誕樹，心諗到底有咩特別呢？陳易希就自信滿滿介紹佢的新作，「我自己認知入面未見過有聖誕樹可以互動，所有就開始設計呢棵可以透過應用程式控制燈光的聖誕樹，想重拾番細個睇燈飾時的興奮感。」佢更透露整個 project 用了 6位數字，由佢同團隊花了 3-4星期製作，製作認真。不過當小編問到這棵樹同 K11 的 4D聖誕樹技術上有分別的時候，陳易希坦言沒有見過。
▲ 只要成功以藍芽連接到聖誕樹的人就有 20秒時間，可以自由轉換聖誕機 LED 燈的顏色。成功連接一次後要等 5分鐘先可再次連接。
困難之處在於藍芽連接
對於這個新奇的互動，小編想起智能燈泡。陳易希自言「智能燈膽係屋企用，襟制可以控制開關同顏色，而我呢個就可以俾公眾人士參與，可以鬥快搶線控制，係目的上有唔同。」至於當中最大的難度，佢認為係燈光要夾番場內裝飾，而且商場有好多干擾，所以要做好多唔同測試來確保手機同聖誕樹連接的穩定性。
合作非因「星之子」之名
對於作為一間 start-up 可以同 MTR Malls 合作，陳易希認為未必因為自己係「星之子」。佢表示「最緊要 portfolio 要好，要有相關的經驗。另外，雖然創意好緊要，但都要同有限資源之間取得平衡」，更建議其他新公司要唔怕蝕底，一開始就提交好多概念、設計，令客戶感受到自己好有熱誠同能力做呢份事。
生存到因為比人發展得早
陳易希公司創立未到 4年，但已經有接近 20個員工。佢認為自己可以係云云 start-up 中乞立至今，主要係因為「自己好早就開始 Apps 業務，係大家仲用緊金屬殼 iPhone 的時候，我地已經開始寫好 library、模塊嘅嘢，掌握到技術。好似今次客戶想有晒 5個功能，我地可能係較短時間、較低成本做出來。」另外，佢更認為自己做硬件出身都係一個優勢，「我地同其他軟件公司唔同，可以軟硬兼施。就好似今次除了設計應用程式，仲要識得揀聖誕樹上的電子零件，例如揀 D 環保、慳電同安全的 LED燈。」談到如果要佢今日先開始創業，佢坦言未必會做 App，「時機好緊要，係適當時候做適當的事，而且要有前瞻性，一些同大數據分析、人工智能有關的都會睇好。」
▲ 應用程式的另一個功能是可以讓小朋友填顏色。
▲ 還有可以加相框。
大企業支持比政府資助更緊要
對於成為創新及科技諮詢委員會的成員，陳易希希望可以幫到政府去發現到 start up 或年輕企業家遇到的問題，不過佢同時覺得「大企業的支持比起政府資助更緊要。因為大企業真係市場上的需要，好過政府想推 D 乜就比幾萬蚊資助等人做D咩，可能最後的成品係無市場。」最後，佢指出「香港人唔係無創意，甚至比起鄰近地區的人更有創意。好多人都有好多 idea ，但點將 idea 把握機會，實現出來，就要睇你有無團火去實行。」
後記
膚淺的小編當初同好多人都一樣覺得佢死好命，因為一個「星之子」的名可以會考 12分拔尖入大學，甚至乎到現在可以與大企業合作，製作一棵這麼創新的聖誕樹。(雖然後來我經過商場，沒有人發現到聖誕樹的特別之處。) 不過，從言談間我感覺到佢應該都受過了不少苦頭先有今日的成就，這些事可能是外界人所不知的事，開始對他改觀了。
日期 ：2015年 11月21日至 2016年 1月3日
地點：德福廣場、青衣城、PopCorn
分享到 :
最新影片
