相信美劇迷今個秋季都已經忙到透唔過氣，皆因有眾多新美劇開播而且套套都係重磅戲：有由靚湯主演Minority Report嘅電視劇版《關鍵報告》﹑恐怖喜劇《Scream Queens》﹑再度翻生嘅《Heroes：Reborn》以及兩位女英雄《Supergirl》同埋《Jessica Jones》等等。但與此同時，冬季亦都已經啱啱開始已經有幾套新劇開播，嚟緊一月﹑二月更加會有啲重頭美劇。如果你仲未追的話，小編就一次過係度同你介紹番今季將會有邊幾套新劇係不容錯過嘅啦！
已開播新劇：
The Expanse 無垠太空
由 Syfy 製作，同名科幻小說改編而成嘅 The Expanse 早係十二月頭開播，係 2015-16 冬季新劇第一套，至今已播出四集。故事講述當一名年輕女性失蹤之後，經驗豐富嘅偵探Joe Miller 決定同一艘非法掘冰船嘅船長 Jim Holden 聯手調查事件真相。佢地將穿越整個太陽系，揭露人類歷史上最大陰謀。呢部故仔大受好評，而今次劇集嘅製作團隊陣容亦非常犀利：係由獲得奧斯卡獎提名嘅資深編劇兼製片人Mark Fergus 同 Hawk Ostby 聯手創作，前兩集更由著名電視劇導演 Terry McDonough 所負責。
老老豆豆，近排太多劇，小編都未有時間開始睇呢套；但係開播前淨係睇個 trailer 已經覺得氣勢相當大，好有壓場感。加埋係 IMDb 有 8.4 咁高分，你唔係唔睇吓佢到底點解會有咁好評價啊？
Childhood’s End 童年的終結
同樣都係由 Syfy 所製作，由同名科幻小說改編而成嘅 Childhood’s End 第一季三集已經全播出。呢部早係 1953 年出版嘅《童年末日》劇本早被電影業買走，但一直都無相關電影上映，嚟到 2015 冬季終於出現係美劇。故仔講述神秘外星人以和平名義嚟到地球。佢地承諾幫人類消除貧困、戰爭和疾病，將全人類帶入一個和平、建康、安全嘅黃金時代。人類將佢稱為 OverLord 領主。經過十幾年後，地球變成烏托邦，但與此同時人類已經喪失獨立嘅文化。但當中有部分人仍然懷疑人類會為呢份「免費午餐」付出慘重代價。而隨住劇情發展， OverLord 的真正動機慢慢曝光，人類終究意識面對嘅唔係夢想成真，而係一場惡夢。
整套劇節奏拿捏唔錯，故仔又夠意思：到底我地理想中嘅「烏托邦」真係出現時係咪真會如我地想像中咁美好？抑或係扼殺咗人類嘅本能以至文化？無競爭﹑無病痛，人活在世上只有「無聊」，呢種所謂嘅幸福其實最終只會令人類變到跟動物無異。如果你本身鍾意科幻故仔而又鍾意有內涵值得思考嘅情節， Childhood’s End 會係你今個冬季必睇美劇。
The Magicians 魔法師
同樣由 Syfy 製作，同樣係由同名小說所改編而成（小編：睇嚟 Syfy 都幾想趕係聖誕前出晒幾套改編劇）嘅仲有 The Magicians 。故事講述男主角 Quentin 自細就係 NY 讀過關於魔法奇幻世界嘅事，一直深信佢嘅存在；而佢嘅青梅竹馬 Julia 則唔相信。兩人其後被送到魔法世界做潛力測試： Quentin 成功，而 Julia 失敗。 Julia 接受唔到，最後被另一團人發現而納入其中。至於 Quentin 在魔法世界的學校中認識到 Alice ﹑ Eliot ﹑ Penny ﹑ Kady 等，佢地即將發現魔法會為人類帶嚟一場大浩劫。
被稱為「成年人版嘅哈利波特」的 The Magicians ，小編就始終覺得只係一個 gimmick 。佢嘅故事情節走向有些少似哈利波特，但其實成套劇就連魔法都唔係「哈利波特向」而係「超能力向（Heroes?）」。不過第一集主要係 intro 形式帶過，好難比到咩評價，但感覺有佢嘅可看性，希望佢唔會爛尾啦。（P.S. 第一集男女主角召喚錯死人害死自己校長是哪一招啊！）
Telenovela 肥皂人生
一口氣同大家講咗三套科幻劇啦，但如果你係鍾意喜劇的話啱啱亦有新劇推出，佢就係《肥皂人生》。故事講述一部長篇電視肥皂劇嘅幕後故事。女主角 Ana Sofia 係個野心勃勃嘅長篇電視肥皂劇明星，主演最著名嘅西班牙語肥皂劇，但佢並唔識講西班牙語。加上其他問題，佢為咗保持自己名譽同地位，必須竭盡全力同渴望搶鏡嘅劇組成員爭。而其後劇組竟然僱用佢前夫飾演佢嘅螢幕情侶。故仔就如同一套真正嘅肥皂劇咁，充滿戲劇性情節。
以上個啲都已經係十二月開播咗，大家隨時都可以睇得到啦；但如果以上幾套都唔啱心水的話亦唔需要太灰心，皆因嚟緊一月同二月都會有好幾套重頭美劇開播，以下就同大家重點介紹五套。
2016 即將開播：
Shadowhunters 闇影獵人
相信大家睇海報都估到今次 Shoadowhunters 係翻拍咩掛？無錯，佢就係 Cassandra Clare 嘅著作《骸骨之城》系列，由電影版《The Mortal Instruments: City of Bones》再重新翻拍成電影劇集版本 – Shadowhunters 。
故事講述 18 歲嘅 Clary Fray 係佢生日當天發現咗佢嘅真實身份係一個獵殺惡魔嘅天使同人類所生混血兒。當 Clary 母親 Jocelyn 被綁架時，Clary 同一名神秘暗影獵手 Jace 以及佢最要好朋友 Simon 被拋到一個獵殺惡魔嘅世界。同仙子﹑術士﹑吸血鬼加上狼人生活在一起，Clary 開始咗探索自我旅程。自戀（而又幾型）嘅 Jace 係一個出色嘅暗影獵手，佢成為戰士參與對抗惡魔嘅戰爭。係佢父親被殺死後， Jace 立誓要搵到殺害父親嘅兇手並要佢血債血償。
Legends of Tomorrow 明日傳奇
相信大家最為注視嘅今個冬季新劇必定會係呢套： Legends of Tomorrow ！由 The Flash 同 Arrow 所共同衍生劇集《明日傳奇》，而唯一嘅新角色就係可以穿越時空嘅 Rip Hunter 。 Rip Hunter 因為見到未來嘅慘況，所以回到現在，召集一支強大團隊，以共同應付即將面臨嘅威脅。今次《明日傳奇》將會係英雄同壞人聯手合作，打倒未來嘅對手。而更重要的係，今次劇集並唔會完全跟足漫畫，有部分角色會迷失係時間線中，無法完成所有時間旅行嘅行程。
The X-Files (2016) X檔案
至於對於小編嚟講，最期待嘅當然係 The X-Files 終於都係 2016 年再度回歸。有唔少人會叫佢做第十季，但其實今次 The X-Files 只係一齣迷你劇（劇組表示會根據觀眾反應而再決定是否繼續製作）。只有六集嘅 The X-Files 2016 將會延續以前風格，每一集有一個單元性嘅案件。今次 The X-Files 有唔少回歸角色，亦有唔少新加入角色。想知更多就記得要留意開播啦！
Lucifer 路西法
唔知大家仲記唔記得《路西法》呢？其實呢套都係由 DC 漫畫改編而成嘅電視劇集早係八月已經推出咗試播集，而小編亦都有同大家講過（請按此）。而佢亦都即將係 2016 年 1 月尾正式開播，睇咗試播集而又鍾意嘅觀眾就嚟有得睇啦！
故事大致講述墮落天使 Lucifer 覺得地獄無無聊聊，放棄王國王位統治走上人間，黎到洛杉磯開 Club ，順便幫 LAPD 打擊罪犯。LAPD重案組探員 Chloe 迷戀路西法不過被其嫌棄，不過隨住時間推進路西法慢慢被 Chole 既善良打動，不過天使 Amenadiel 被派往 LA 勸路西法番返地獄。
Angel From Hell 地獄來的天使
而如果好似小編咁特別鍾情睇喜劇的話，嚟緊二月亦有新喜劇： Angel From Hell 。故事講述 Jane Lynch 扮演自命不凡嘅 Amy 突然闖入女主角 Allison 生活，聲稱係佢守護天使，並同 Allison 成為朋友。但係 Allison 並不確定 Amy 究竟係真天使定係個癲婆。
雖然呢套新劇並無上面幾套話題性咁大，但都由《歡樂合唱團》嘅 Jane Lynch 所主演，佢飾演起瘋瘋癲癲嘅角色亦相當神似。如果鍾意喜劇的話不妨等佢開播睇吓係咪咁好笑！
