3 月 31 日生日嘅 Ewan McGregor 終於都正式踏入四十五歲啦！「男人越老越有味道」完完全全呈現係 Ewan McGregor 身上啊。既然能夠成為小編心目中嘅「我最喜愛男演員」之一，當然唔少得佢所嘅電影作品演出啦；今次就帶大家一次過睇下到底 Ewan McGregor 有邊幾套經典作品，當中又有幾多套你錯過咗，又有幾多套係你至愛啦！
《猜火車》（Trainspotting） 1996
由 Danny Boyle 執導嘅《猜火車》絕對稱得上 Ewan 嘅成名作！《猜火車》故事講述一群愛丁堡嘅海洛因癮君子的生活。黑色幽默加上涉及毒品題材，令到呢部電影係多地惹起爭議過，但係當時可以話相當創新，亦都因為咁令人留下深刻印象，最終更成功獲得咗奧斯卡最佳改編劇本。即使過咗咁多年，仍然有人覺得呢部電影影響好比「邪教」咁教壞人。（小編：《猜火車》呢部電影的確就好似佢入面嘅主題一樣，好似毒品咁上癮）
而重點就係：經過二十年後，《 Trainspotting 2》終於都係 2016 表示要返嚟啦！而且今次仲會繼續係由 Danny Boyle 執導，以及所有原班人馬再次聚首，預計將會係今個五月底開始拍攝，預期年尾上映。到底經過咗二十年嘅沉澱，今次 Ewan 又會演繹出一個點樣嘅 Mark 呢？
《紫醉金迷》（Velvet Goldmine） 1998
大家聽到 Velvet Goldmine ，如果未睇過電影的話，相信即時諗起嘅應該會先係 David Bowie 嘅同名歌曲吧。Ewan 從係《猜火車》角色 Mark 嘅頹廢，突然跳轉到妖艷四射嘅男主角 Curt ，呢部探討誇性別議題嘅獨立電影聲音雖然不及《猜火車》大，但其實一直深受觀眾歡迎。 Ewan 化身妖艷嘅搖滾歌手 Curt ，加上精湛嘅電影敘述技巧，成功將當時嘅 Glam Rock 呈現出。而小編最鍾意嘅台詞，相信對各個《紫醉金迷》粉絲一啲都唔陌生：
「We set out to change the world… ended up just changing ourselves.」（我們想改變世界，但卻只改變了自己）
《情陷紅磨坊》(Moulin Rouge!) 2001
《情陷紅磨坊》可以話係將 Ewan 係電影事業推上另一個高峰嘅作品，而呢部係亦係小編第二最愛愛情電影（第一緊係要留俾《斷背山》XD）。由 Nicole Kidman 同 Ewan 一齊主演，講述窮書生 Christian 來到夜總會編寫一系列歌舞作品，結果碰上妓女 Satine 後墮入愛河，可惜到咗最終兩人嘅愛情注定成為悲劇。被稱為史上最好歌舞電影之一，《情陷紅磨坊》獲得奧斯卡多項提名，更獲得最佳藝術指導以及最佳服裝設計，係金球獎上更成為咗最佳音樂及喜劇電影。呢部唯美得嚟又勾人心弦嘅作品，相信係唔少人正式愛上 Ewan 嘅原因之一吧！
《基爸愛留情》（Beginners） 2010
中文譯名有好多個，《基爸愛留情》係小編在維基上見到的，亦唔知正唔正確啦（始終都係睇慣晒英文戲名多）。由 Mike Mills 編劇兼執導嘅 Beginners ，故事其實係根據佢自己嘅親身經歷所改編而成：爸爸突然有一日同兒子宣佈自己得咗癌症嘅同時，亦都向兒子宣佈出櫃。兒子一開始都難以接受，直至看到爸爸與同性戀人的相處，他才開始慢慢接受起來。即使父親離世後，但佢「實際上並無離去」，一直影響著兒子。係人與人相處嘅過程之中，我地都係一個初學者。父親也好，兒子也好。
《影子滅殺令》（The Ghost Writer） 2010
改編自 Robert Harris 小說，由 Ewan 所飾演電影中主角之一 – 職業代筆作家（亦即 Ghost writer）。故事講述英國前首相 Adam Lang 打算出回憶錄，搵來職業代筆作家來為佢執筆。 Adam其實早前已要求過佢自己助手代筆，但助手卻離奇死去，只留下一份手稿。其後， Adam 就被爆出非法將英國公民交比美國中情局折磨嘅醜聞，並且被指控其任內發動反恐戰爭中犯下咗戰爭罪行。而代筆作家無意下發現助手手稿，搵到 Adam 同中情局嘅特殊連繫呢項關鍵線索，但當佢想再查清楚之際就身陷險境。
其他有份參與而又為人熟悉嘅電影包括：
Billy：「比起佢嘅作品 我更欣賞嘅係佢嘅生活態度！」
嚟到最後，當然要分享一下點解小編特別鍾意 Ewan McGregor 啦！雖然最先吸引住我當然係佢帥氣嘅外形同相當出色嘅演出，加上對於唔同極端角色都唔抗拒，亦有很好拿捏，係作為一個演員上的確幾 impressive 。
但小編特別鍾意 Ewan ，係因為佢並無沉迷於演員呢個身份而迷失咗生活。 Ewan 一直對於自己嘅私生活都保密得非常好，關於佢生活嘅新聞其實並唔多；呢個界線係好多演員都無法定落嚟的。而更令小編欣賞嘅係，佢對於自己接拍嘅電影有一套自己嘅態度。對於自己演員之路，佢有自己一套嘅看法，而唔係隨波逐流咁只接大戲，其實從佢一直以來嘅電影作品可看得出，當中不乏獨立電影。（不過近年確實明顯有轉向 Hollywood 大片）
而且相信有留意 007 的話， Ewan Mcgregor 呢個名字已經係數年前被提起過擔任 James Bond ，當時 Ewan 選擇拒拍，因為佢唔想好似前幾任 James Bond 演員咁被定型，視野亦因此變得較陝窄；而就係早幾個月， Daniel 宣佈即將退下來不再出演 007 ， Ewan Mcgregor 再次被提起，而佢自己亦都表示「係呢個階段嘅我，已經有一啲具深度而又為人熟悉嘅作品，所以唔需要再擔心角色定型問題，可以做到 James Bond 應該會幾型（若然真係再次受到邀請）」（至於嚟緊 007 會唔會真係有機會見到 Ewan ？小編都唯有同大家一齊拭目以待啦！）
最後，就緊係要祝我最親愛嘅男神 Ewan Mcgregor 四十五歲生日快樂，期待更多你嘅作品啊！
