近年手作興起，唔少人都反撲歸真，嘗試一手一腳去製作小飾物，但另一方面，紙媒係大時代裡漸漸被電子媒體取代。那麼本來屬於少眾，又漸漸增多的手作愛好者，會否是紙媒的其中一條出路？係機緣巧合下，小編有幸認識了一位從事傳媒工作多年的大姐姐 — Yuki。她為了興趣，不但辭去原本雜誌社的工作，更決心運用以住的知識創作出屬於香港人的手作雜誌。
創意心機並非用金錢衡量
談到手作，Yuki 由細到大都好鍾意手作，由最初每樣都想接觸，直到 6-7年前係留學期間被外國的紙藝所吸引，開始鑽研各式各樣的機關卡。現在除了擺市集售價作品，更會開班受徒，算是一個全情投入的手作人。但她坦言，雖然這一兩年手作文化開始興起，但總覺得在香港，唔少人對手作的觀感和態度欠缺了一份專重。「你買的是別人的創意，而唔係多過個價格本身。」但 Yuki 認識唔少手作人都有怨言，好多人拎上手望下，問完價錢，覺得唔啱就放抵。佢地著重的只有價錢，而唔會理佢地背後做緊乜。相反我係外國都有擺過市集，佢地會好好同你傾計，了解手作點整，背後創作的理念，睇得出佢地好欣賞自己的作品。」亦因如此，Yuki 希望能做一點事，將手作變得更生活化，讓大家都了解手作人做一件作品背後要花多少心力同時間，從而更懂得如何欣賞一件作品。
▲ Yuki 認為紙藝就是由一張紙開始，享受拼貼的樂趣。
創立平台為香港手作人發聲
除了是一個熱情的手作人，Yuki 亦從事傳媒工作多年，有做過報紙、雜誌，所以好想親手做一本手作雜誌，令更多人留意手作人背後的理念，讓更多人知道香港都有好多好有創意，好高質素的手作。Yuki 覺得外國好多好專門的手作雜誌，例如專講機關卡整蝴蝶結的都有，但偏偏香港連一本綜合的手作雜誌都無。「因為我自己都係手作人，所以好唔忿氣，明明香港好多手作人都好叻，但點解只可以買外國的雜誌，睇人地的故事。」但唔忿氣的同時，Yuki 都好明白做雜誌的難處，「大家都知紙媒係式微的行業，以前做雜誌的時候都睇住銷量係咁跌，不過手作係一個好少眾的題材，我好想試！因為佢係我的夢想。」
▲ 在「手創」內集合了多名手作人的訪問，Yuki 表示：「我好開心做咗呢本雜誌之後，有受訪者話佢知，因為個訪問令佢爸爸媽媽更了解佢做緊 D 咩，成為手作人同佢地屋企人之間的橋樑。」
逆市出雜誌全因拎上手的質感
「香港地 想破產 搞出版」，唔少人都認為紙媒好難做，不但有印刷費、存倉費等成本，加上大家閱讀習慣的改變，好多人都勸 Yuki 不如做電子媒體。不過 Yuki 笑言「我係衰嘅，我係老人家嚟，鍾意睇實物，可以揸係手。」Yuki 相信大部份手作人都有呢份執著，「手作來身就係要用手去做，要有個觸感先會感受到手作的價值」，所以一本手作雜誌應該都要拎得上手。另外一個原因是電子媒體太快，一個電子媒體暫停一兩日，就好難再係茫茫的網絡中搵得番，相反一本雜誌就唔同，如果你出過，可以係香港出版註冊處，憑書號去搵番。
「手創」由 Yuki 和其他 3位拍檔一開始每人集資大約 10萬創刊，不過其他人都有正職，只有 Yuki 做主力，另一位負責攝影。由 2015年 7月的試刊號開始，「手創」已經推出了接近一年，都算穩定下來，但 Yuki 坦言：「其實我初初出都無信心，有 D 讀者想訂一年，但我好坦白同佢地講，我地自資出版，唔知可以捱到幾多期。」其實 Yuki 最想做到的，不是賺錢，而是想拋磚引玉，俾人睇到手作雜誌有市場，咁就有更多人關注手作圈子的人。
示範 — 母親節機關卡
母親將至， Yuki 在這裡想教各位 wire 民整張手袋卡送俾媽媽。
▲ 首先需要一張長方形的紙、2張花紋紙，一些配件，如立體花、絲帶，仲有膠紙同印模。然後係長方形紙大約 2/3 的位置對摺，再將其餘部份向上摺。之後用雙面膠紙係兩邊貼好，形成袋口。
▲ 係紙的邊可以用印模打花邊，如果無都可以用花紋鉸剪剪波浪。
▲ 之後係背後貼上絲帶，並貼上另一張花紋紙蓋住絲帶口。
▲ 而前面貼上另一樣花紋紙及裝飾。
▲ 用寶麗龍膠水隨個人喜好貼上立體紙花。
▲ 然後用雙面海綿膠紙貼上立體的心型，作鈕扣用途。
▲ 最後祝大家母親節快樂！
分享到 :
最新影片
