由發現嘉頓迷你焗爐開始，我依莉詩已經下定決心要得到佢。捱咗幾日麵包，呢個的的骰骰的焗爐終於到手，我同水哥決定發揮佢的潛能，嘗試「玩生命，樂讀者」！係玩生命麵包先啱！仲搞到個焗爐出晒煙添！
點樣換 ?
今日水哥同我依莉詩玩的迷你焗爐仔，只有 22.5 厘米闊、 24.5 厘米高 、32.5 厘米深，容量有 8公升。如果每朝烘兩塊麵包應該無問題。不過呢款焗爐並唔係就咁買就得，要係 2016年 4月8日至 5月31日憑任何 3個嘉頓指定方包或生命麵包包裝上的條碼再加 $220 先換到。今次仲唔係要你日日捱麵包？
真機四四方方超可愛
迷你焗爐的真身比睇相更可愛，白色機身四四方方咁，玻璃門上面仲有生命麵包特色的藍白圖案。至於 22.5 厘米闊、 24.5 厘米高 、32.5 厘米深 的機身，原來容量比想像中大，大半條生命麵包都塞得入，焗高身的 4吋蛋糕都得。另外，焗爐可以分開選擇底面火，如果焗D 唔想個面唔上色的食物，特別蛋撻會比較靈活。不過焗爐唔可以校溫度，同埋時間制最多只有 15分鐘，如果要焗一 D 對溫度較有要求的食物，例如馬卡龍同疏乎厘就未必啱。
▲ 迷你焗爐大約有 2排可樂咁高。
▲ 爐仔細細，估唔到可以塞得入大半條生命麵包。
▲ 焗爐面標示了麵包、熱狗同 Pizza 的建議烤烘時間，都係以簡單的翻熱食物為主。
▲ 而焗爐的下方有兩個扭掣，分別控制時間同發熱模式，簡單又傳統。
實試麵包鹹甜食法
個爐迷你成到底咁有咩用呢？買咗咁多條生命麵包，當然要食埋佢啦，依家就教各位 unwire.hk 讀者鹹甜兩食，早餐＋下午茶，等你快快消滅晒 D 麵包佢！
鹹食 — 芝士火腿焗蛋多士
近年好興焗蛋多士，只要係麵包中間掘個窿，打隻蛋入去再焗，就變成睇得又食得的愛心早餐了。
材料：
麵包…………….2塊
火腿…………….1片
芝士…………….1片
蛋………………..1隻
▲ 首先放上芝士同火腿，次序無乜所謂。
▲ 之後係另一塊麵包上面整個窿，咩形都得，不過愛心早餐當然係心形啦！
▲ 之後就係最關鍵的一刻，要好小心咁打隻蛋落去，我地就失敗咗幾次。
▲ 最後放入焗爐用底面火焗 10-15分鐘，如果中途發覺個面上咗色，就轉用底火焗，直到蛋白熟為止。
▲ 原來要令蛋白唔漏出嚟其實都幾難架，媽媽真係唔易做。
甜食 — 邪惡棉花糖士多啤
另一款潮流美食就係棉花糖多士，內軟外脆的棉花糖滿滿咁鋪係麵包面，加埋士多啤梨，糖得嚟帶少少酸，味道唔錯架！
材料：
麵包…………….2塊
棉花糖…………9粒
士多啤梨……..4粒
果醬……………適量
▲ 因為棉花糖好甜，所以中間先塗帶酸的果醬以中和甜味。
▲ 然後放上另一塊麵包。
▲ 鋪上 9粒棉花糖，如果唔想太甜，4粒其實都夠，不過影相出嚟就無咁吸引。
▲ 要先以底火焗 5分鐘，令麵包烘好，再以上下火焗 2-3分鐘令棉花糖上色。
▲ 當棉花糖金黃就好出爐，唔係會好易燶。
▲ 平時唔整嘢食的水哥覺得呢個整發好簡單，又似蛋糕，如果唔記得買生日蛋糕，用嚟補鑊都唔知喎。
小朋友咪學 — 玩命爆谷
玩咗咁耐，好似好普通，而咁啱我最近係 DIY 材料店買咗包爆谷米，於是就手癢放入焗爐試下。不過，小朋友千奇唔好學，唔係就會好似我地咁，搞到個焗爐出晒煙。雖然焗爐底部還設有一個碎屑盤，防止食物跌落發熱線，不過爆谷的威力太強啦，彈晒落發熱線。結果未有排清潔囉！
▲ 爆谷米好似好得意咁。
▲ 望住 D 爆谷米爆開好治療啊！但睇睇下就出煙了，Oh～
▲ 結果水哥未要用筷子逐粒夾番出嚟囉！
▲ 痴到發熱線的爆谷都黑晒了。
水哥 + 依莉詩 用後感
呢個迷你焗爐除咗可愛，亦都好實用。日常焗麵包，焗雞翼都 OK ，體積細細啱晒小型家居。不過因為無得教溫度，如果要整一 D 需要控制得好準確的食物，例如馬卡龍就未必得了。
查詢：嘉頓（2578 8126）
分享到 :
最新影片
