港女去過嘅咁多次旅行之中，其中最頂唔順，就係同個旅伴唔啱 Key，真係會嘔血。我有一次近近地去旅行散下心，就遇上一個唔識睇人眉頭眼額，偈又傾唔埋，價值觀又有天淵之別的朋友，平時相處真係無乜野，但正所謂「相見好同住難」，一齊玩幾日真係辛苦過我返工，所以我非常明白《跟住矛盾去旅行》入面啲人物嘅心理。上一段《曾鈺成 X 長毛》其實真的還好，佢地都叫做有共通點，今次呢段《葉蘊儀 X 連詩雅》未睇就知大鑊，近日 viuTV 仲自己剪左條連詩雅中英夾雜講野嘅片出黎，引起好多人討論「港女」（雖然平時都已經有好多人討論 LOL），而唔係「女神」。仲有人即刻就住連詩雅喺節目入面嘅表現，整左做「港女性格測試」，港女叫得做「港女」當然要做下呢個測試，睇下自己有幾「港女」啦～～～如果有女神測試我都想做下喎～（誤）
1、永遠見唔到佢素顏
哈哈哈！！！！簡直係天大的笑話！！！！實不相瞞，我成日都唔化妝返工（大笑）。以前公司得三、四個人，返工去數碼港又遠，化完返到去都甩左一大半，成日俾人話我好似無化妝咁；而家轉左工但都係冇乜近到，情況都係差唔多，所以有時索性唔鬼化，反正返到去都係對住個 mon 成日。不過有樣野叫「梅菲定律」，就係你無化妝嗰日就一定有啲野搵你出去做，例如有一次返學上堂教拍攝，老師隨手捉左我出去 示眾 示範，嘩嗰日我真係頹到一個點，好在條片唔出街。
2、鍾意攬公仔
我喺公司成日都攬住個咕臣係咪唔計… 不過我知依莉絲好鍾意囉（出賣同事，誤）
3、機不離手
嘩～呢個全人類都中啦下嘛？尤其我呢啲，做科技野架嘛（好似係），有咩可能唔無時無刻㩒住/碌住佢呀～
4、鍾意 Shopping
生活喺「消費主義」的社會，其實好難唔鍾意 Shopping 架喎，不過咁，我就奇怪啲嘅，我出街最鍾意行家品舖、電器舖同書店，由細到大無咩變過，買下杯杯碟碟床單咕臣，最近愛上咗上網買書，因為有得送貨，啱啱又買左一小箱… 未睇完又買，都幾大鑊… 哈哈～
5、一見到昆蟲就大叫
昆蟲黎講呢，蝴蝶、蜻蜓個啲我 OK 嘅，但係蟲、曱甴、蚊、蜜蜂……………..等等我都係會大叫的（最近係牛蛙繁殖期，我屋企樓下有好多牛蛙周街跳下跳下，都會嚇死我，雖然佢唔係昆蟲）。即使喺屋企得我一個人，俾我見到都會嗌出黎，跟住走開。
6、使人唔使本
認真，我覺得我唔係呢種人喎，我都好樂意 take up responsibility 架喎（ABC 港女上身），同埋我超怕麻煩到人，所以有咩自己搞得掂我都唔會搵人幫手嘅。
7、為買名牌捱肚餓
從來唔會，不過會因為工作、返學、幫人而唔記得食野，我諗咁樣唔計掛～
8、見到鍾意嘅嘢會高八度尖叫
我一直以為呢個係好正常嘅反應，哈哈哈！！！ 原來係好「港女」架咩？Sorry 囉，我認我係。
9、經常性遲到
返工我就好少遲到嘅，遲走就有，不過出街約左人就都幾經常… 尤其是周末，如果你約我三點前，除非係我屋企，如果唔係通常都遲到 XD
10、經常性自拍
做咩啫，去旅行梗係要自拍架啦，我上年去中東，因為信唔過啲人，我同朋友啲相有九成都係自拍架，用神棍囉，唔得咩～～
11、說話非常嬌嗲，夾雜偽 ABC 腔
認真，我覺得我講英文幾好聽，但自從出左黎做野，我就少左中英夾雜。因為以前有個老細唔識英文，成日俾人鬧我講野中英夾雜佢聽唔明。而家就成日講 Big Data、Data Analytics、Growth Hacking、iPhone、Samsung… 呢啲算唔算呢可～
12、對社會大事不關心
有睇開我啲文就知啦，唔解釋喇。
13、唔識自己搵路，人哋行錯路淨係識埋怨
等我重推返我啲教人用 Google Map 嘅文出黎先～～～
14、嬌生慣養，少少事就頭暈身興
下，我身體真係好差，一定係工作太辛苦，早兩日先同同事講起話我好容易暈低，之前都有寫過一篇文講個 iPhone 內置有個 Health App 可以有咩事俾人睇到病歷。
總結：7 個中－輕度港女症患者
原來港女都唔係好「港女」????，死火喇，咁我是咪要改名，叫返我妍嫣啦都係。
