今日 Apple Pay 正式在香港推出，相信各位使用 iDevices 的 wire 民都已經或打算登記同埋用啦掛？其實唔止在店舖可以用 Apple Pay 付款，就算在 APP 內都一樣可以用到 Apple Pay。究竟有咩 APP 而家已經支援到 Apple Pay？又有冇咩特別優惠？而家就同大家介紹一下。
教學：點樣係 APP 用 Apple Pay 俾錢？
究竟點樣係 APP 度用 Apple Pay 俾錢？其實好簡單！而家就等 Edward 教教大家啦，筆者剛巧肚餓，就用 Deliveroo 作示範吧。
Step 01：
首先進入 APP，大家可以見到最上方已經顯示用 Apple Pay 付款有優惠。等我揀好想叫的外賣的餐廳及食物先！
Step 02：
點齊食物，點按「查看購物籃」，就可以結賬！大家可以在「我的購物籃」中看到預設已經加入了使用 Apple Pay 扣除了 30 元的優惠。另外在 Deliveroo 大家需要有戶口才能點餐，如果未有戶口就需要先登記及登入。
Step 03：
完成登入後會回到上面「我的購物籃」的介面，點按結賬，然後不要先著急按 Apple Pay，要送餐自然要先輸入送餐地址，所以點按「新增地址」，然後輸入你的地址、電話及對速遞員有沒有特別指示（例如：到達樓下時先打電話俾你）。完成後點按「加入地址」，然後會回到「結賬」介面，此時就可以點按 Apple Pay 按鍵了。
Step 04：
之後會出現下圖畫面，如果使用預設信用卡的話，只要將手指按在 Touch ID 上就可開始付款程序；如果想換另一張信用卡，就點按一下付款卡一欄，然後選擇希望想使用的信用卡。
Step 05：
當手指按在 Touch ID 上後，就會先後出現「正在處理付款」–>「處理中」的字句，當出現「完成」時，就代表付款已完成，整個付款過程（由 Step 04 開始計算）大約 6 至 10 秒左右，視乎網絡質素而定吧。
Step 06：
之後在 APP 中可以看到訂單已完成，亦會接到訂單已送抵餐廳的訊息通知，而在等候過程中大家亦可以看到外賣準備成點。
Step 07：
大家亦會即時收到訂餐確認的電郵通知。
Step 08：
食物送到，食得囉！
相關文章:
台北悠遊卡推出手機貼紙 多年未支援 Apple Pay 惹批評 Apple 向歐盟市場讓步 開放 NFC 支付技術予第三方使用
10 大可用 Apple Pay APP 巡禮（有優惠！）
好了，介紹完點樣在 APP 內使用 Apple Pay 付款後，其實今日已經有 10 款 APPS 可以用 Apple Pay 在 APP 內付款，而且涵蓋生活各大類別，仲要大部分 APPS 都有優惠！究竟有咩 APPS 支援？又有咩筍優惠？而家即刻同大家介紹下。
美食類
Deliveroo / foodpanda
兩款 APP 均是用來叫外賣的，亦同樣由今日開始可以用 Apple Pay 俾錢。至於優惠方面，Deliveroo 的話，只要消費 $85 或以上，就可以獲得 $30 減免優惠；而 foodpanda 的話，首次惠顧滿 $200，即可享有 $100 減免優惠。
下載連結：<Deliveroo 點按此>、<foodpanda 點按此>
外遊類
1) 訂機票：國泰航空
如果大家想訂國泰 / 港龍航空的機票，現在亦可以用 Cathay Pacific 的 APP 預訂，並用 Apple Pay 付款。不過要留意的是，如果要用 Apple Pay，它只支援 AE 信用卡，如果用 VISA 或 MasterCard 等其他信用卡種，暫時仍要以傳統方式過數。
下載連結：<Cathay Pacific 點按此>
2) 訂酒店 / 民宿：HomeAway
訂完機票自然到訂酒店，HomeAway 這個 APP 就可以幫到大家，它可以訂到不同種類的外國住宿，由套房、apartment 到豪華別墅甚至特別如船屋或私人島嶼都得！現時不但可以用 Apple Pay 俾房租，仲一律有九折優惠，雖然唔算多，但都 ok 啦。
下載連結：<HomeAway 點按此>
3) 預訂門票：Klook 客路
去得外國玩，有時都會搭特別的交通工具、入主題樂園玩、或者參與特別的 local tours，這款 Klook 客路 APP 就可以幫到大家預訂到這些活動或旅行團的門票，當然亦可以用 Apple Pay 付款啦。如果經此 APP 並以 Apple Pay 付款，可獲得九二折優惠，同 HomeAway 一樣：唔多，但好過無囉。
下載連結：<Klook 客路點按此>
潮流網購類
1) 獨特 Tee 著上身：Snaptee
平時大家應該都鍾意網購吧，筆者身邊都有唔少人會在網上買衫，但如果買平時在街見到的衫就無意思啦。這款 Snaptee APP 就可以幫大家自訂衣服上印著的相片或字句（可以將名人金句印上去），而且種類都多，有 T-Shirt、衛衣及運動衫。現在以此 APP 買衫並以 Apple Pay 付款，可以有七五折優惠，都幾抵！
下載連結：<Snaptee 點按此>
2) 名牌衫此中尋：HBX
有時大家都會買下名牌衫，一來質量較佳可以著耐啲，二來上網買隨時比在門市買更多款及更便宜！HBX 這款 APP 就搜羅了全球超過 300 個時裝品牌，由頭到腳的衣裝都可以在此 APP 內買到。現時以此 APP「裝身」並以 Apple Pay 付款，可享有九折優惠，又係個句：唔算好抵，但 OK 啦。
下載連結：<HBX 點按此>
3) 個人化手機殼入手：Casetify
Casetify 這個本地 startup 品牌，相信不少 wire 民都聽過吧！現時如果用此 APP 設計及購買以個人相片設計出來的手機殼並以 Apple Pay 付款，可享免運費及八五折優惠，OK 啦。
下載連結：<Casetify 點按此>
4) 買禮物唔洗煩：Boutir Collect
有時要買禮物送俾親友，可以是一件好麻煩的事。Boutir Collect 這款 APP，就可以從各購物專家精選的商品及獨立設計師創作的潮物中選擇你想送禮的禮物，唔洗出門口都可以買到禮物，真係幾方便。不過而家透過此 APP 買禮物，唯一是方便咗，因為可以用 Apple Pay 付款，但就無任何優惠，係咪值得大家自己衡量了。
下載連結：<Boutir Collect 點按此>
5) 未來科技一齊 back：Kickstarter
Kickstarter 這個平台，相信都不用筆者多介紹了吧？以後如果大家用 Kickstarter APP back 項目，就可以用 Apple Pay 付款，確實比以往方便。不過與 Boutir 一樣，無任何優惠，是否使用大家自己決定了。
下載連結：<Kickstarter 點按此>
相關文章:
台北悠遊卡推出手機貼紙 多年未支援 Apple Pay 惹批評 Apple 向歐盟市場讓步 開放 NFC 支付技術予第三方使用
分享到 :
最新影片
