一大班人想自拍，就算出齊自拍棍同魚眼鏡都未必 wide ，旁邊 D 人更加會變晒形，而今次我依莉詩就搵到部真正的「自拍神器」— ZERO TECH DOBBY，仲搵咗水哥同娜姐一齊玩添！
同手機一樣大，旅行自拍無難度
用無人機自拍唔係新概念，不過呢部 DOBBY 相當袖珍，折疊後只係 4部手機疊埋咁大，亦僅有 199g，放係褲袋都唔過份，加上用手機控制，唔駛帶多個搖控，旅行、行山都可以隨時拎出嚟自拍。而用的時候只需打開 4塊機翼，唔駛重新安上螺旋槳步就可以起飛，相當方便。雖然係科技產品，不過珍珠白色的圓角機身十分可愛，男女使用都非常適合。
▲ 折疊後的無人機只有一部手機的大小，就好似番梘一樣。
▲ 而厚度都係 4部手機厚，放係褲袋都唔會逼爆。
9分鐘續航時間，要帶多幾舊電
雖然做到相當細小，但 DOBBY 都係未解決無人機的一大缺點，就係續航時間只有 9分鐘，一顆充滿的 970mAh電池大約只能拍攝 200張照片。如果係室外要抗拒風阻就更加耗電，隨時未玩得夠喉已經要降落。好在電池使用USB Type-C Quick Charge 2.0，只需20分鐘便充滿約80%，大約30-40分鐘便可充滿電池。如果去旅行，帶 2-3舊電應該都夠玩，番到酒店又可以再充電。而 DOBBY 係電量低過 17% 會自動減速降落，唔怕突然墜機。
▲ 電池使用USB Type-C Quick Charge 2.0，只需20分鐘便充滿約80%，大約 30-40分鐘便可充滿電池。而且只需一鍵電池即可了解電量，無需再打開 APP 先知，避免換換下唔知邊舊用過。
室內室外控制同樣穩定
因為 DOBBY 分別係室內及室外使用光流、超聲波定位系統或GPS及GLONASS雙衛星定位系統，所以無論室內外都可以穩定飛行。不過，雖然話 DOBBY 可以頂到 4級風速，不過有風會難控制，所以室內穩定好多，而且戶外會較易過熱，亦會更加食電。至於控制方面相當簡單，除了無人機老手玩慣的搖桿模式外，仲有新手容易控制的體感模式，就算我地無乜控制無人機的經驗都可以係幾分鐘內學識。而起飛有 3個方法，可以係手上、地下同聲控，但聲控只係認得到普通話，所以都係覺得係手上升降最有型。另外，DOBBY 的一鍵 Flip 都好利害，充滿一次電可以連續做到 5次，唔駛學做到呢個效果，真係一秒變老手。
▲ 手機 App 可以自己校控制模式及左右手控制等，相當容易操控。
▲ 亦可以自行設定機頭機尾，想自拍定影風景都得，更易控制。
▲ DOBBY 分別係室內及室外使用光流、超聲波定位系統或GPS及GLONASS雙衛星定位系統，所以無論室內外都可以穩定飛行。
室內拍片穩定，但相片比較朦
起到機都要睇埋相片質素，DOBBY 採用 SONY IMX214 感光元件，支援 4K 影像採集並經過EIS三軸電子穩像後輸出 1080P 高清視頻同最高1300萬像素靜態照片。室內拍片相當穩定，不過係室外就有少許波浪，而影相就相對唔清晰。
▲ 影相可揀單張拍照、延時拍照以及多張連拍，換上航拍角度可以拍到超級 V臉。
▲ 鏡頭可以上下調教 -90° 至 22.5°，可以輕鬆大包圍自拍。
▲ DOBBY 更有目標跟隨，可以對活動中的人或物體進行跟隨拍攝，不過使用的條件都幾多，要係衛星 show 到 10粒星以上的 5米以上高空拍攝，而且環境要空曠，目標要穩定先得，所以都要試好多次先成功。
依莉詩：「唔駛再用棍！3分鐘學識自拍夠晒型」
平時無人機俾我的感覺都係好難控制，而 DOBBY 可以體感控制變得相對簡單，而且室內飛行都好穩定，我學咗幾分鐘就識係手上升降。雖然相片影出嚟有 D 朦，不過鏡頭夠 wide 夠遠，可以影到一大班人的團體相。機身輕巧旅行自拍都好方便，相信會係自拍神棍外，另一個好選擇。唯一的缺點就係耗電快，每 9分鐘就要換電，未必夠喉。
ZERO TECH – DOBBY
香港地區售價：$2,999
查詢：OTG Store (3586 0842 )
分享到 :
最新影片
