經過 Pokemon Go 同 iPhone 嘅日夜洗禮，編輯部嘅同事個個唔夠瞓到喪屍咁嘅樣。最近我依莉詩就搵到個神奇眼罩，聲稱瞓兩個鐘就好似瞓咗八個鐘咁精神，到底係咪真係咁勁呢？
眼罩質料舒適
呢個眼罩其實 2013 年已經喺 Kickstarter 集資成功，但就遲遲未有實物，到最近香港終於有現貨賣。眼罩外表上只係一個厚少少嘅普通布眼罩，使用抗過敏嘅布質同海綿製成，所以外型無想像中咁型，不過內有一個可以隨時拆除嘅傳感設備，監察自己嘅腦電波、肌肉活動同眼球運動，以監控睡眠質素。眼罩帶上眼都幾舒適，唔會太焗，戴著瞓一整晚，點轉姿勢都唔會阻，仲可以遮擋大部份的光線。不過如果可以調校鬆緊就會更好，避免瞓醒嘅時候唔知眼罩飛咗去第二度。
▲ 眼罩的包裝非常簡單，只係用卡紙盒裝住眼罩同 USB線。
▲ 外表上就係一個厚少少嘅普通布眼罩，並唔似科技產品。
▲ 特別在於眼罩內有一個可拆除嘅傳感設備。
Apps 監察睡眠質素
眼罩內嘅傳感設備不但會收集腦電波、肌肉活動同眼球運動，更可以連接手機 Apps 了解自己的入睡時間、睡眠質素同睡眠模式。連接的步驟相當簡單，只要開啟傳感設備，再係 Apps 選擇睡眠模式同調鬧鐘，按下開始睡眠嘅掣就可以瞓覺，不過 Apps 需要長期開著，如果習慣熄手機瞓的朋友就未必鍾意了。
▲ 每次瞓之前都需要喺 Apps 按下開始睡眠嘅掣，而且需要長期開著，看來唔可以熄手機瞓了。
▲ 傳感設備以矽膠包住電路板，只有 3個接觸點貼住眉心位置。
▲ Apps 會記錄每次的睡眠時間、睡眠深淺度同心跳，雖然數據同我本每日戴的智能手錶有好多差異，不過都可以參考一下。
光療調節睡眠週期
只係了解自己的睡眠習慣當然未夠，傳感設備內有兩粒 LED燈放在雙眼位置，瞓覺的時候燈光會轉變以喚醒沉睡中的你，令睡眠由大家慣常嘅單相睡眠（Monophasic）轉為多相睡眠（Polyphasic），把一整個睡眠分開為不同階段，從而增加深層睡眠嘅時間。同時，眼罩會喺用家處於最淺層睡眠嘅時候叫醒自己，咁就算瞓得少，起身果陣都唔會攰。除了一般嘅起床模式外，眼罩仲提供倒時差模式、小憩模式及生物時鐘調節模式，方便忙碌生活的都市人可以提高補眠的效果，甚至調整生理時鐘。
▲ 眼罩會透過 LED燈喺處於最淺層睡眠嘅時候叫醒你，咁起身果陣就唔會攰。
▲ 使用一整個晚上後，發現當中深層睡眠的時間的確增加了，起身時亦更加精神。
依莉詩：「戴眼罩瞓好唔慣」
雖然呢個眼罩嘅質料都算舒服，不過我始終無戴眼罩嘅習慣，所以幾夜測試都失敗，不但起身時眼罩唔知飛咗去邊，仲因為擔心佢甩，一晚醒幾次，瞓得仲差過平時。幸好習慣後，能夠使用一整個晚上，並以智能手錶量度睡眠質素，發現當中深層睡眠的時間的確增加了，起身時亦更加精神。呢個眼罩真係好啱經常唔夠瞓，日夜癲倒的朋友呢！
售價：$2,999
查詢：SearchingC
