出前一丁可以話夠咗唔少單身男女，無論 8號風球定寂寞嘅夜深，清仔都會陪大家渡過。最近清仔更加走出廚房，係同甜品工房 crossover，係尖沙咀開設首間「出前一丁棒丁麵 x 甜品工房」限定概念店，$60 就有得食齊出前一丁拉麵同清仔 Yummy 甜品，我依莉詩當然急不及待去試啦！
一個月限定 清仔陪你食
雖然呢間 「出前一丁棒丁麵 x 甜品工房」概念店只係為期一個月，不過佈置上都幾大陣仗，一入到去幾乎鋪天蓋地都係清仔同清妹縱影，無論牆身定桌面都貼滿清仔家族，就連待應都著住清仔嘅衫，大玩 cosplay 添！
▲ 無論牆身定桌面都貼滿清仔家族，完完全全被包圍。
▲ 雖然無特別嘅影相位，不過每張枱面都貼滿貼紙架！
$60 食棒丁麵拉麵定食
可能你會話，食出前一丁去茶記都得啦！不過今次嘅棒丁麵麵條長度有24厘米，口感軟腍，同平時食嘅公仔麵好唔同，而且仲有清仔魚蛋、日式叉燒同半隻糖心蛋，加上大家都唔陌生嘅九州濃湯豬骨湯味同黑蒜油豬骨湯味，絕對上得大枱。以 $60 就可以食到一碗拉麵同一款清仔 Yummy 甜品，打卡之餘，又飽肚，非常抵食！
▲ 呢碗並唔係普通出前一丁咁簡單，除咗大家都唔陌生嘅九州濃湯豬骨湯味或黑蒜油豬骨湯味湯底，上面仲有清仔魚蛋、日式叉燒同半隻糖心蛋，加上 24厘米長嘅棒丁麵，絕對上得大枱。
▲ 除咗九州濃湯豬骨湯味同黑蒜油豬骨湯味外，仲有期間限定味噌湯可以揀，不過噚日一日已經賣晒了。
清仔甜品有特色
嘆完濃郁又滋味嘅棒丁麵，當然要食埋甜品啦！5款清仔清妹甜品都有佢地嘅嘜頭，睇怕都要相機食先！
▲ 紫葡之戀
近排興食紫色甜品，呢個紫葡之戀就啱晒相機食先嘅朋友！幼細刨冰上鋪滿提子、巨峰硫璃珠、小丸子 同 香芋雪糕糯米糍，非常大堆頭！
▲ 清妹黑白蜜語
清妹黑白蜜語就加入咗黑蒜油豬骨湯味嘅元素，黑蒜油味嘅黑色窩夫脆杯鹹鹹地十分特別，配埋白芝麻軟雪糕一齊食，味道好夾，再食埋黑芝麻流心湯圓，一冷一熱，非常香口。
▲ 清仔草莓派對
單單士多啤梨同牛奶布甸放埋一齊已經夠晒浪漫，加埋士多啤梨、芝士蛋糕、開心果脆粒及士多啤梨雪糕，Fancy 之餘又有不同口感，就好似食完一杯芭菲咁幸福。
▲ 清仔DOUBLE HAPPINESS
呢個並唔係普通木槺布甸咁簡單，除咗面頭嘅清仔大頭白朱古力片外，豆乳奶油及瑪莉餅碎中間混入呜日本紅豆蓉同黃豆蕨餅，多層口感。
▲ 清仔ICHIBAN
熱辣辣嘅班戟淋上蜂蜜糖漿，配上抹茶雪糕、雜錦鮮果及鮮忌廉，有冷有熱，刺激味蕾。
必掃清仔杯緣子
食飽飽當然要買埋棒丁麵同多款精美限定紀念品番屋企啦！
▲ 杯緣子 $50
▲ 康樂棋 $50
▲ 多士爐 $230
依莉詩：「拉麵加甜品晚餐宵夜一次過」
呢間「出前一丁棒丁麵 x 甜品工房」限定概念店相當有誠意，雖然只係一個月限定，而且無特別影相位，但佈置都算有心思。至於食物方面，$60又有拉麵又有甜品，係尖沙咀嚟講，非常抵食呢！
甜品工房 (尖沙咀分店)
地址：尖沙咀厚福街12－12A號地下
營業時間：中午12時至凌晨12時
期間限定：2016年11月1日至2016年11月30日
電話：2732-2722
*每人最低消費$40，另設加一服務費
相關影片:
分享到 :
最新影片
